2 TIMOTEO 1

Pabloj napaykuynin

1Noqa Pablo, Jesucristoj apostolnin kani, Diospa munayninrayku, Cristo Jesuspi kausay kasqanrayku Diospa qosqayki nisqanman jina. 2Timoteo, munasqa wawáy, kay cartata escribimuyki. Qanwan kachun Diospa yanapaynin, khuyakuynin, sonqo tiyakuynin, Dios Tatanchejmanta, Señorninchej Jesucristomantawan.

Cristomanta willana

3Diosman graciasta qoni, pitachus kasuni ñaupa tatasniymantapacha, ch'uwa concienciawan; maypachachus mana sayk'uspa tuta p'unchay, Diosmanta mañakusqaypi qanmanta yuyarikunipuni. 4Munani rikusuyta waqayniykimanta yuyarikuspa, kusiywan sonqo junt'asqa kanaypaj. 5Yuyarikuni tukuy sonqo creesqaykimanta. Ñaupajtaqa abuelayki Loidapis, mamayki Eunicepis creerqanku. Noqa allinta yachani creesqallaykitataj.

6Chayrayku yuyarichiyki, Dios qosorqa chay atiyta ninata jina larwarichinaykita; chay ateyqa qampi kashan, makisniyta pataykiman churasqayrayku. 7Diosqa mana manchachikoj espiritutachu qowarqanchej. Astawanqa atiyniyoj espirituta, munakuyta, allin yuyayniyojtataj. 8Chayrayku ama p'enqakuychu Señorninchejmanta willayta, nitaj noqamantapis payrayku carcelpi wisq'asqa kasqaymantapis. Astawanqa qampis noqawan khuska llakikuy evangeliorayku, Diospa atiyninman jina. 9Pay salvawarqanchej, wajyawarqanchejtaj llimphu kausayman, mana allinta ruwasqanchejraykuchu; astawanqa paypa munakuyninrayku, khuyakuyninrayku ima. Diosqa wajyawarqanchej Cristo Jesuspi, manaraj kay pacha ruway qallarikushajtin. 10Kunantaj khuyakuynenqa rikuchisqa Salvawajninchej Jesucristoj rikhurimusqanrayku. Pay wañuyta qhechorqa, kausaytataj sut'iman orqhorqa, evangelionejta manaña wañuy kanampaj.

11Chay evangelionejta noqapis churasqa karqani willanaypaj, apóstol, yachachejtaj. 12Chayrayku ñak'arishani kay tukuy imaspi. Chaymantaqa mana p'enqakunichu, imaraykuchus allinta yachani pipichus creesqayta, atiyniyojtaj kasqanta waqaychanampaj chay imatachus qowasqanta jamoj p'unchaykama.

13Noqamanta cheqa palabrasta uyarerqanki chaykunata, sonqoykipi jap'ikuy fewan, munakuywan, Cristo Jesuspi. 14Noqanchejpi tiyakoj Santo Espiritunejta tukuy nisusqayta waqaychay.

15Ña yachankiña, Asiamanta kajkuna tukuyninku saqerpariwanku; chaykunamantataj kanku Figelo, Hermógenes ima. 16Señor khuyakuchun Onesíforoj wasimpi kajkunata, imaraykuchus payqa ashkha kutista mana p'enqakuspa, carcelpi wisq'asqa kachajtiy kallpachawarqa. 17Romapi kashajtiypis mayta mask'awarqa, taripanawankama. 18Señorpa khuyakuyninta tarichun jamoj p'unchaypi. Qan yachanki may jinatachus yanapawasqanchejta Efesopi kashaspa.

Currently Selected:

2 TIMOTEO 1: QCHSB

Highlight

Copy

Compare