1 TIMOTEO 6

1Kamachis kajkunaqa patronesninkuta allimpaj qhawaspa kasuchunku, ama Diospa sutin, nitaj yachachisqaykupis qhesachasqa kanampaj. 2Creej patronesniyoj kajkunaqa, paykunata ama qhesachachunkuchu hermanos kasqankurayku. Astawanqa allinta patronespa kamachisqankuta ruwachunku, creejkuna kasqankurayku, imaraykuchus kapuyninmanta yanapata jap'ejkunaqa, munasqa hermanos kanku.

Llullata yachachejkuna

Kayta yachachiy, yuyaychaytaj:

3-4Sichus pillapis waj jinata yachachin, mana Señorninchej Jesucristoj ch'uwa yachachiyninman jina, nitaj Diosta yupaychana kasqanta yachachinchu chayqa, chay runa mana imata yachaspalla jatunchakun. Astawanqa t'ojpisqa jina tapunakuna, churanakuna palabrasta parlan. Chaykunamanta jamunku chhoqonakuykuna, ayñanakuy; Diospaj sajrata rimaykuna, sajra yuyaykuna ima. 5Kallantaj sajra runaspa qhasi mana kaj churanakuynin. Paykunaqa cheqa kajta mana rejsinkuchu, yuyankutaj Diosta yupaychayqa qolqeta jap'inallapaj kasqanta. [Paykunamanta karunchakuy.] 6Diosta yupaychayqa runata qhapajyachin uj imachus kapusqanwan kusisqalla kajtenqa. 7Kay pachamanqa mana imayoj jamorqanchej, jinallataj ni imata kaymanta apasunchu. 8Ajinaqa mikhunayoj, p'achayoj kaspaqa, chaywan kusisqa kakunanchej. 9Qhapajyayta munajkunaqa, sajra munaywan atipachikuspa, tojllapi jina urmanku, tukuy qhasi munapayaykunaman. Chaykunaqa runasta wañuyman apanku, chinkaymantaj. 10Tukuy sajra kajpa saphenqa qolqeta munakuy. Chayta munapayaspa wakenqa Diosmanta t'aqakorqanku, ashkha imaymana llakiykunapitaj rikukorqanku.

Ferayku maqanakuna

11Qanrí, Diospa runan, ayqekuy kay tukuy imasmanta. Kausaytaj cheqan kajpi Diosta yupaychaspa, fewan, munakuywan, pacienciawan, llamp'u sonqo kaywan ima. 12Sumajta maqanakuy ferayku, wiñay kausaymanta jap'iykukuy, chaypaj qanqa wajyasqa karqanki, tukuy rikushajtin Señorta sonqoykipi jap'ikusqaykirayku. 13-14Kunanqa, Diospa ñaupaqempi kamachiyki, pichus tukuy imasman kausayta qoj, Jesucristoj ñaupaqempipis, pichus Poncio Pilatosman allinta parlarqa, Diospa kamachisqanta kasuy, mana juchallikuspa, mana k'amina kanaykipaj Señorninchej Jesucristoj jamunankama. 15K'ata Diosqa maychus tiempompi rikuchenqa Jesucristoj jamuyninta. Paymin yupaychasqa kachun. Payqa kamachejkunaj kamachejnin, señorkunaj Señornintaj. 16Pay k'atamin mana wañojqa. Mana chimpay atina k'anchaypitaj tiyakun. Chaytaqa mana pipis rikorqachu, nitaj pipis rikuyta atinchu. Pay wiñaypaj yupaychasqa kachun. Amén.

17Kay pachapi qhapajkunata kamachiy ama alabakunankuta, amataj kapuyninkupi suyanankuta. Chaykunaqa mana kajlla. Kausashaj Diosqa tukuy imata qowanchej ashkhata chaywan kausananchejpaj. 18Qhapajkunaqa allin kajta ruwachunku, allin ruwasqasninkuta astawan yapachunku, khuyakuywantaj qorichunku mana mich'akuspa. 19Ajinapi paykuna kikinkupaj kapuykunata tantachunku jamoj p'unchaykunapaj, wiñay kausaymanta mana kacharikuspa.

Pablo ujtawan Timoteota yuyaychan

20Ya, Timoteo, allinta waqaychay imatachus nerqayki chayta. Ama kasuychu qhasi mana kaj palabraswan thautiykunata. Amataj kasuychu llulla yachachiytapis, sumaj yachay nisqa chayta. 21Chay llulla yachachiykunata qhatispa wakinkunaqa femanta t'aqakorqanku.

Diospa khuyakuynin qankunawan kachun.

Currently Selected:

1 TIMOTEO 6: QCHSB

Highlight

Copy

Compare