2 TESALONICENSES 2
2
Cristota qhesachajpa jamuynin
1-2Kunanqa, hermanos, mañakuyku Señorninchej Jesucristoj jamuyninmanta, paywan tantakunanchejmantawan, ama yuyayniykichejta usqhayllata kuyuchinaykichejta, nitaj musphanaykichejta, ni ima espiriturayku, ni ima parlayrayku, nitaj ni ima cartarayku, noqaykojpatapis kanman jina, Señorpa p'unchayninñapis ancha qayllapiña kashanman jina. 3Ama piwampis, ni imaynamanta ch'aukiyachikuychejchu, imaraykuchus ñaupajta femanta t'aqakuyraj jamunan tiyan; chay qhepatataj juchallikoj runa rikhurimonqa, wañuypaj t'aqasqa runa. 4Payqa sayaykukonqa, oqharikonqataj tukuy ima Dios sutichasqaj contrampi, chayrí yupaychanaj contrampi; Diospa templonman yaykuspataj Dios jina tiyaykukonqa, kikin Diospis kanman jinataj rikuchikonqa.
5Manachu yuyarikunkichej qankunawan kashaspa kay imasmanta qankunaman willasqayta? 6Kunantaj yachankichej pichus payta jark'asqanta, maychus tiempompi rikhurimunanta. 7Chay pakasqa sajra ateyqa, ñapis llank'ashanña; payqa suyashan jark'ajqa chaupinmanta orqhosqa kanallanta. 8Chaypachataj chay sajra runa rikhurimonqa. Paytataj Señorqa simimpa samayninwan wañuchenqa, jamuynimpa k'anchayninwantaj phirenqa. 9-10Jaqay sajra runaj jamuynenqa, Satanaspa ruwayninwan kanqa, tukuy atiywan, jatuchaj rikuchinaswan, llulla milagroswan ima, tukuy ima llullakuywan wañuyman rejkunapaj; imaraykuchus chay runasqa cheqa kaj munakuyta mana jap'erqankuchu, salvasqas kanankupaj. 11Chayrayku, Diosqa paykunaman pantachej atiyta apachimun, llulla kajta creenankupaj. 12Tukuyninkutaj juchachasqas kanqanku; imaraykuchus cheqa kajta mana creerqankuchu, astawanqa sajra kajta kusiywan qhaterqanku.
Salvakunankupaj ajllasqas
13Noqaykoqa qankunamanta Diosman graciasta qonaykupuni tiyan, Señorpi munasqa hermanosníy, imaraykuchus Diosqa qankunata qallariymantapacha ajllasorqachej salvaciompaj, Espíritoj llimphuchaynimpi, cheqa kaj fepitaj. 14Chaypaj wajyasorqachej evangelioykunejta, Señorninchej Jesucristoj janaj pacha k'anchayninta tarinaykichejpaj.
15Chayrayku, hermanos, sinch'ita sayaychej, jallch'aychejtaj noqaykumanta yachakusqaykichejta, ñaraj siminejta, ñaraj cartaykunejta. 16Kikin Señorninchej Jesucristo, Dios Tatanchej ima munakuwarqanchej, qhasimanta qowarqanchej wiñay kusiyta, sumaj suyaytawan khuyakuyninrayku. 17Pay sonqoykichejta kallpachachun. Tukuy ima allin parlaypi, ruwaypi ima sinch'ita qankunata sayachichun.
Currently Selected:
2 TESALONICENSES 2: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
