1 TIMOTEO 5

Timoteo imaynatachus creejkunawan kausananmanta

1Kuraj runataqa ama k'amiychu, astawanqa tataykita jina yuyaychay. Waynakunatapis hermanosniykita jina qhaway. 2Paya warmitapis mamaykita jina yuyaychay, sipaskunatapis llimphu sonqowan hermanosniykita jina yuyaychay.

3Viudasta yanapay, pikunachus cheqamanta pisichikojkuna kanku chaykunata. 4Chantá, mayqen viudachus wawasniyoj, chayrí, allchhisniyoj chayqa, chay wawasqa yachachunkuraj wasinkupaj k'acha kayta, tatasninkuta yanapayta, aynitataj kutichikuyta. Kayqa k'acha, allintaj Diospa ñaupaqempi. 5Cheqamanta viudaqa mana piniyoj qhepakun chay, Diosmanta suyan, k'uchi kaywantaj Diosmanta mañakun, tuta p'unchay. 6Chantá, pi viudallapis kay pacha kusikuykunallapi purejqa, kausashaspapis wañusqa jina kashan. 7Kayta kamachiy paykuna ama k'aminas kanankupaj. 8Pillapis paypata kajkunamanta mana dakunchu, astawanqa wasimpi kajkunamanta, nitaj yanapanchu chayqa, feninta qhesachan. Chaytaj uj mana creejmantapis astawan sajraman tukun.

9Viudaqa listaman churasqa kachun sojta chunkayojmanta pataman, pichus uj qosayojlla karqa chay. 10Allin ruwanaspi rejsisqa kachun, wawasninta allinta uywaj, wajyarikuyta yachaj, creejkunaj chakisninta mayllaj, llakisqasta khuyaj, tukuy allin ruwanata junt'aj ima.

11Chantá, sipas viudasta ama listaman churaychu; imaraykuchus aychaj munayninwan atipachikuspa, Cristoj contran rikhurinku casarayta munaspa. 12Ajinapi juchachasqas kanku imatachus nisqankuta mana junt'asqankurayku. 13Qhella kayman yachakunku wasimanta wasi purispa; chantá mana qhellasllachu kanku, astawanqa cuentosta apanku, tukuy imaman sat'ikuspa, mana parlanata parlaspa. 14Munani ari, sipas viudasqa casaranankuta, wawasninkuta uywanankuta, wasinkutapis allinta qhawanankuta, enemigos ama sajrata qhawanankupaj. 15Wakinkunaqa qhepaman kutirinku supayta kasuspa.

16Sichus mayqen cristiano warmillapis, familianmanta viudasta yanapashan chayqa, yanapachun, iglesia ama paykunatawan yanapanampaj. Iglesiaqa cheqamanta wajcha viudasllata yanapanan tiyan.

17Kurajkunaqa iglesiata allinta kamachinku chayqa, allimpajpuni qhawasqas kachunku. Astawanqa, pikunachus Diospa palabranta willanku, yachachinkutaj chaykuna. 18Escriturapi nin: Erapi trigota saroj wakaman ama ñukuta churankichu. Jinallataj llank'aj runaqa llank'asqanmanta pagoyoj kanan tiyan.

19Kuraj runata ch'ataykojtinku ama kasunkichu, manachayqa, iskay, chayri kinsa rikojkuna kajtillan kasunki.

20Juchallapipuni kajkunata tukuypa ñaupaqempi k'amiy, wajkunapis manchachikunankupaj.

21Kayta kamachiyki Diospa ñaupaqempi, Señor Jesucristoj ñaupaqempipis, ajllasqa angelespa ñaupaqempi ima. Kay imasta jallch'anaykita munani ama ñaupajmantapacha pitapis sajrapaj qhawaspa, nitaj pimampis kutikuspa. 22Chantá, ama pejpa patanmampis, usqhay usqhaytaqa makiykita churallankichu, iglesiapi kamachejpaj ajllaspa. Amataj wajpa juchanman chhapukuychu. Qanqa llimphu kaypi waqaychakuy.

23Wijsaykirayku sapa kuti onqosqa kasqaykiraykutaj, ama yakullata ujyaychu. Pisi vinotapis ujyallay.

24Wakimpa juchasnenqa sut'inchakun manaraj juzgasqa kashajtinku; wakimpatarí qhepamanraj juzgasqa kasqankumantaña yachakun. 25Ajinallataj allin ruwanasta ruwasqasninkupis sut'inchakun; sajra ruwasqaspis manallataj pakasqas kayta atinkuchu.

Currently Selected:

1 TIMOTEO 5: QCHSB

Highlight

Copy

Compare