Joshuwa 23
23
Joshuwa an'gonekana naa Izraeli
1Tsapano pakudapita ntsiku zizinji, Chawuta adapumuza a Izraeli kwaazondi wawo akhadaazungunuka. Nthawe imweyo Joshuwa akhadakalamba kwene-kwene. 2Joshuwa adachemelesa a Izraeli wentse naakulu-akulu naatsogoleli wamabanja naatongi namanduna adati kwayiwo, “Ine ndakula, ndakalamba kwene-kwene. 3Imwe mudawona bzentse bzidachitiwa na Chawuta Mulungu wanu, kumishowo yentse thangwe layimwe, pakuti Chawuta Mulungu ndiye akhakumenyelani nkhondo. 4Wonani, ndidakupasani madziko yale yadasala kumishowo minango kuti ikhale nthaka yanu, pabodzi namadziko yadatolewa kale, kuchokela pa Jorodhani kufika kunyanja ikulu kun'nyulila dzuwa. 5Chawuta Mulungu wanu an'zaagwinya kumambuyo patsogolo panu, achizaathamangisa pamaso panu, imwe muchizakhala mudziko lawo kuteyeza bzidalewedwa na Chawuta Mulungu wanu. 6Nakutenepo limbikilani kuchengeta, nakuchita bzentse bzidanembewa mubhukhu lantemo wa Mozisi. Paleke kuwoneka nee chibodzi chinkupatusani, kuyenda kujanja ladidi panango lanzele, 7kuti muleke kuphatana namishowo iyi idasala pakati panu. Lekani kudoma madzina yaamilungu wawo, panango kuwalumbila, panango kuwatumikila panango kuwakotamila. 8Koma imwe mamatilani pana Chawuta Mulungu wanu, ninga bzamudachita kufika lelo. 9Chawuta adakuthamangisilani mishowo yamphamvu patsogolo panu, palibe adakwanisa kuyimisana nayimwe kufika lelo. 10#Kuts 32:30; Kuts 3:22Munthu m'bodzi pakati panu ankwanisa kuthamangisa wanthu masawuzande khumi, pakuti Chawuta Mulungu wanu ndiye ankumenyelani kuteyeza kulumbila kwaadachita. 11Nakutenepo imwe chenjelelani kuti mufune Chawuta Mulungu wanu kuchitila imwepo mwekha. 12Koma imwe mukapanduka, muchimamatilana namishowo idasala pakati panu, muchiloolelana nawo, wana wanu achiloola wana wawo, wana wawo achiloolambo wana wanu, 13mudziwiletu kuti Chawuta Mulungu wanu an'zapitiliza lini kukuthamangisilani mishowo imweyi patsogolo panu, koma iwo an'zakhala maliwa nawukhukha kwayimwe, an'zakhala nchamu unkumenyani mbali zentse, an'zakhala minga m'maso mwanu, kufikila mwentse mwamala mudziko labwino lamudapasiwa na Chawuta Mulungu wanu.
14“Tsapano ine ndaakuyenda nanjila iniyenda nawentse wapantsi. Mun'dziwa mwentse mumitima yanu namunzelu zanu, pabzinthu bzentse bzabwino bzikhadalumbiliwa na Chawuta Mulungu wanu, palibe ne chibodzi chidagwela pantsi. Bzentse bzidachitika palibe ne chibodzi chidagwela pantsi. 15Koma, ninga Chawuta Mulungu wanu kukuchitilani kwaadachita bzentse bzabwino bzaadalumbila kuzakuchitilani, Chawuta an'zakubweleselani bzakuyipa bzentse, kufikila mwachenekeka mudziko labwino lamudapasiwa na Chawuta Mulungu wanu, 16mukaleka kuteyeza chibvano chamudawuziwa na Chawuta Mulungu wanu, muchiyenda katumikila amilungu anango, muchiwakotamila. Pamwepo ukali wa Chawuta un'zakugakilani, muchizakulumiza kumala mudziko labwino laadakupasani.”
Currently Selected:
Joshuwa 23: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
