Joshuwa 24
24
Joshuwa anilewa-lewa nawanthu pa Shekemu
1Joshuwa adakocheza pabodzi mishowo yentse yaa Izraeli ku Shekemu. Adachemela akulu-akulu naatsogoleli naatongi namanduna yamu Izraeli, achikayima patsogolo pa Mulungu. 2#Kuya 11:27Pamwepo Joshuwa adati kwawanthu wentse, “Chawuta Mulungu wa Izraeli wati, ‘Kholo lanu Tera nawana wake Abhurahamu na Nahori, awo kale akhakhala chakumabveladzuwa kung'ambu kwakamadzi ka Ufuratesi adatumikila anango amilungu. 3#Kuya 12:1–9; Kuya 21:1–3Pamwepo ndidatola kholo lanu Abhurahamu kung'ambu kwakamadzi ka Ufuletesi ndichimuyendesa mudziko lentse la Kenani. Ndidachita kuti m'badwe wake ukhale uzinji kwene-kwene. Ndidampasa Isaki, 4#Kuya 25:24–26; Kuya 36:8; Kuts 2:5; Kuya 46:1–7Isaki ndidamupasambo Jakobho na Esau. Esau ndidampasa dziko lamapili la Seyiri kuti likhale lake, koma Jakobho nawana wake adapolika kuyenda ku Ijipiti. 5#Kub 3:1—12:42Tsapano ndidazatuma Mozisi na Aroni, ndidamenya Ijipiti nabzandidachita pakati pawo, pakumalizila ndidakuchosani. 6#Kub 14:1–31Ndidachosa makholo yanu mu Ijipiti. Paadafika panyanja, wanthu wa Ijipiti adateyela makholo yanu nangolo zawo zankhondo nawamahachi mpaka pa Nyanja Ifuyila. 7Makholo yanu yadalila kwa Chawuta, iye adayikha n'dima pakati payimwe nawanthu wa Ijipiti. Chawuta adachita kuti nyanja iwagwanile. Pomwe maso yanu yadawona bzandidachita kwawanthu wa Ijipiti. Mudakhala muchipululu kwantsiku zizinji. 8#Kuw 21:21–35Pamwepo ine ndidakubwelesani kudziko laa Amori, awo akhakhala kung'ambu kwa Jorodhani chakumabveladzuwa. Imwe pamudamenyana nawo ine ndidaayikha m'manja mwanu, muchitola dziko lawo, ndichiwacheneka patsogolo panu. 9#Kuw 22:1—24:25Pamwepo Bhalaki mwana wa Zipori, mambo wa Moabhi adasumuka kamenyana na Izraeli. Iye adatuma fala kwa Bhalamu mwana wa Bheyori kuti akutembeleleni. 10Koma ine ndilibe kufuna kutetekela Bhalamu, ndidatochita kuti akudaliseni, nakutenepo ndidakupulumusani kuchoka m'manja mwake. 11#Jos 3:14–17; Jos 6:1–21Mudazayambuka Jorodhani muchibwela ku Jeriko. An'chilo wa Jeriko pabodzi naa Amori naa Perezi naa Kenani naa Hiti naa Girigashi naa Hivi naa Jebhusi adamenyana nayimwe. Koma ine ndidakukundisani wanthu amwewa. 12#Kub 23:28; Kuts 7:20Tsapano ine ndidatumila malumi kumazimambo mawili yaa Amori, ndiyo yadaathamangisa patsogolo panu. Mulibe kukunda namabhemba panango utati. 13#Kuts 6:10,11Ndidakupasani dziko lamulibe kushupikila, namaguta yamulibe kumanga. Mudakhala m'mwemo, muchidya michelo yam'minda yamivayini nayam'minda yamiolive yamulibe kubzala.’ ” 14Joshuwa adati, “Tsapano imwe gopani Chawuta, mumutumikile nantima wanu wentse mwakukwana mwakukhulupilika. Chosani amilungu adapembezewa namakholo yanu, kung'ambu kwakamadzi ka Ufuratesi na Ijipiti, tumikilani Chawuta basi. 15Peno bzidayipa m'maso mwanu kutumikila Chawuta, lelo sankhulani wamunfuna kutumikila, panango kutumikila amilungu akhapemphelewa namakholo yanu mudziko lakung'ambu kwakamadzi ka Ufuratesi, panango amilungu waa Amori wamudziko lino lamukukhala. Koma ine nabanja langu tin'zatumikila Chawuta.”
16Pamwepo wanthu adadayila, “Koma ise tingasiye lini Chawuta tichitumikila anango amilungu, 17pakuti Chawuta Mulungu wathu ndiye adalombola makholo yathu muwulanda mudziko la Ijipiti, adachita bzilatizo bzatidawona namaso yathu. Adatichengeta pawulendo watidafamba nkati mwamishowo mwatikhapita namo. 18Chawuta adatithamangisila mishowo yentse kuphatanizila a Amori akhakhala mudziko lino. Nayisembo pomwe tin'zatumikila Chawuta pakuti ndiye Mulungu wathu.”
19Joshuwa adati kwawanthu, “Imwe mungakwanise lini kutumikila Chawuta, pakuti Mulungu niwakuyela, ni Mulungu wanchanje an'zakulekelelani lini bzakuyipa bzanu, panango kutaza kwanu. 20Mukasiya Chawuta muchikatumikila anango amilungu wachilendo, iye an'zakulinzani ngoto achizakulangani, an'zakumalani, an'zakuchitilani bzakuyipa, pambuyo pakukuchitilani bzabwino.”
21Wanthu adati kwa Joshuwa, “Nee! Ise tin'zatumikila Chawuta.”
22Pamwepo Joshuwa adati kwayiwo, “Imwe mwabzichitila umboni mwekha kuti mwasankhula kutumikila Chawuta.”
Iwo adati, “Inde, ise takhala mboni.”
23Joshuwa adati, “Tsapano chosani amilungu wachilendo ali pakati panu, ikhani mitima yanu kwa Chawuta Mulungu wa Izraeli.” 24Wanthu adati kwa Joshuwa, “Ise tin'zatumikila Chawuta Mulungu wathu, tin'zatetekela bzentse bzaan'zalewa.”
25Nakutenepo Joshuwa adachita chibvano nawanthu ntsiku imweyo, adaapasa mitemo pa Shekemu kuti ayiteyeze. 26Pamwepo Joshuwa adanemba mafalayo mubhukhu lantemo wa Mulungu, adatola mwala ukulu achiwuyikha pantsi pamuti wamuoki pambuto yakuyela ya Chawuta. 27Joshuwa adati kwawanthu wentse, “Wonani, mwala uwu un'zakhala mboni pakati pathu, pakuti wabva mafala yentse yalewedwa na Chawuta kwayise, nakutenepo un'zakhala mboni yakukupasani mulandu, kuti muleke kutazila Mulungu wanu.” 28Nakutenepo Joshuwa adawuza wanthu kuti abwelele kumadziko yanthaka yawo.
Kufa kwa Joshuwa na Eliyazari
29Pambuyo payibzi, Joshuwa mwana wa Nuni mulanda wa Chawuta, adafa wawa namagole dzana nakhumi. 30#Jos 19:49,50Adamuyikha mudziko lanthaka yake ku Timunati-sera, mudziko lamapili la Efulemu, nachakudzulu kwaphili la Gaashi.
31Wanthu wa Izraeli adapitiliza kutumikila Chawuta muntsiku zentse za Joshuwa, namuntsiku zaakulu-akulu akhadayikhiwa na Joshuwa, awo adawona mabasa yentse yadachitiliwa a Izraeli na Chawuta. 32#Kuya 33:19; 50:24,25; Kub 13:19; Yoh 4:5; Mab 7:16Mabondo ya Jozefi yadatakuliwa ku Ijipiti naa Izraeli yadayikhiwa ku Shekemu, muchigawo chamunda udaguliwa na Jakobho kwawana wa Hamori, apayi wa Shekemu, nabzigodo bzamasheleni dzana. Mbuto imweyo idazawa nthaka yam'badwe wa Jozefi.
33Eliyezari mwana wa Aroni adafa, achimuyikha pa Gibheya, muguta lamwana wake Finiyasi, laadapasiwa mudziko lamapili la Efulemu.
Currently Selected:
Joshuwa 24: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
