Joshuwa 22
22
Joshuwa am'bweza mishowo yakumabveladzuwa kumiyi yawo
1Joshuwa adachemela nshowo wa Rubheni nawa Gadhi nakati-nakati yanshowo wa Manase, 2#Kuw 32:20–32; Jos 1:12–15achiti kwayiwo, “Mudateyeza bzentse bzamudawuziwa na Mozisi mulanda wa Chawuta, mudatetekela bzandidakuwuzani kuti muzachite. 3Ntsiku zizinji zimwezi mulibe kusiyana naabale wanu a Izraeli, mukhateyeza bzamudawuziwa na Chawuta Mulungu wanu. 4Nakutenepo Chawuta Mulungu wanu wapeleka mpumulo kwaabale wanu kuteyeza kulumbila kwaadachita kwayiwo. Tsapano imwe bwelelani kumatenti yanu, kudziko lanthaka yanu lamudapasiwa na Mozisi mulanda wa Chawuta kung'ambu kwa Jorodhani chakumabveladzuwa.” 5Koma uchenjelele kuteyeza bzifundiso nantemo wamudawuziwa na Mozisi mulanda wa Chawuta ule uniti, “Funa Chawuta Mulungu wako, ufambe munjila zake, nakuteyeza mitemo yake, umamatile payiye nakumutumikila nantima wanu nanzelu zanu zentse.” 6Nakutenepo Joshuwa adaadalisa achiwawuza kuti ayende, iwo adayenda kumatenti yawo. 7Tsapano kati nakati yanshowo wa Manase, Mozisi akhadaapasa kale dziko lawo mu Bhashani, pomwe kati nakati inango, Joshuwa akhadaapasa kale dziko pafupi naabale wawo chakumadokelo kung'ambu kwa Jorodhani. Joshuwa adaadalisa, achiwabweza kumatenti yawo, 8adati kwayiwo, “Bwelelani kumatenti yanu nachuma chanu chizinji nabzifuwo bzanu nasiliva nagolidhe nankuwa nasimbi, nabzakubvala bzizinji. Gawanani naabale wanu sipodyo yaazondi wanu.”
9Nakutenepo wanthu wa Rubheni nawa Gadhi nakati-nakati yanshowo wa Manase adabwelela kumiyi yawo. Adasiya a Izraeli ali pa Shilo mudziko la Kenani, iwo achibwelela kudziko lawo kudziko la Giliyadhi, laadatola kukhala nthaka yawo kuteyeza bzidalewedwa namulomo wa Chawuta kwa Mozisi.
Mbuto yakupelekela ntsembe pa Jorodhani
10Tsapano nshowo wa Rubheni nawa Gadhi nakati-nakati yawanthu wa Manase paadafika kufupi na mphimpha ya Jorodhani, mudziko la Kenani, akali chakumadokelo kwa Jorodhani adamanga mbuto ikulu yakupelekela ntsembe. 11Wanthu wa Izraeli adabva kuti, “Wanthu wa Rubheni nawa Gadhi nakati-nakati yanshowo wa Manase amanga pakupelekela ntsembe kumalile kwadziko la Kenani, pafupi na Jorodhani, ng'ambu ino mudziko lawanthu wa Izraeli.” 12Tsapano wana wa Izraeli paadabzibva, adakochezana pa Shilo, kuti achite nawo nkhondo.
13Pamwepo a Izraeli adatuma Finiyasi mwana Eliyezari nyantsembe wa Mulungu kunshowo wa Rubheni nawa Gadhi nakati-nakati yanshowo wa Manase mudziko la Giliyadhi. 14Adayenda namanduna khumi, panshowo wokha-wokha wamabanja yaa Izraeli pakhachoka m'bodzi, ali n'tsogoleli panshowo waa Izraeli. 15Paadafika mudziko la Giliyadhi, kwawanthu wa Rubheni nawa Gadhi nakati-nakati yanshowo wa Manase, adati kwayiwo, 16#Kuts 12:13,14“Gunyenye lentse la Chawuta lati, ‘Thangwe lanyi kuchita umaluku tenepa kwa Mulungu wa Izraeli. Mwapandukila Chawuta, nakubzimangila kwamwachita mbuto yakupelekela ntsembe? 17#Kuw 25:1–9Ko chakuyipa chamudachita pa Peyori ching'ono? Chidabwelesa matenda kugunyenye lentse la Chawuta, nalelo tinati tabzichenesa pachakuyipa chimwecho. 18Koma lelo mwaakupandukila Chawuta pomwe? Tsono lelo mukamupandukila Chawuta, mangwana an'zakalipila gunyenye lentse la Izraeli. 19Peno dziko lanu nilakupsipa kuti mupembeze Chawuta, yambukilani kuno kudziko la Chawuta kuna Tenti ya Chawuta, mukatole nthaka yanu pakati pathu. Imwe lekani kupandukila Chawuta panango kumpandukila ise pakubzimangila mbuto inango yakupelekela ntsembe, kunja kwambuto yakupelekela ntsembe ya Chawuta Mulungu wathu. 20#Jos 7:1–26Ko Akani mwana wa Zera, saadataya chikhulupililo nathangwe lakutakula bzinthu bzakuyela bzikhadapelekewa kwa Chawuta? Pamwepo ukali wa Chawuta udafikila gunyenye lentse la Izraeli. Iye alibe kufa yekha nathangwe lakutaza kwake.’ ”
21Pamwepo wanthu wanshowo wa Rubheni nawa Gadhi nakati-nakati yawanthu wa Manase adadayila akulu-akulu wamabanja yaa Izraeli adati, 22“Chawuta wamphamvu, Mulungu Chawuta, Chawuta wamphamvu, Mulungu Chawuta! An'dziwa, lekani Izraeli idziwe! Peno bzatidachita kukhali kupanduka panango kutaya chikhulupililo patsogolo pa Chawuta, lelo lekani kutichiza. 23Koma peno kumanga kwatidachita mbuto yakupelekela ntsembe patsogolo pa Chawuta kukhali kupanduka, panango kuti tipeleke mpfupo yakutenthelatu panango ntsembe yamphunga panango ntsembe yakuyanjana pamwepo, Chawuta pachake anfunika kutilanga. 24Nee, koma ise tidabzichita, tichibva mantha kuti kutsogolo wana wanu akazati kwawana wathu, ‘Ko imwe ndimwe yani kwa Chawuta Mulungu wa Izraeli? 25Pakuti Chawuta adayikha kamadzi ka Jorodhani kukhala malile pakati payimwe nayise, imwe wanthu wa Rubheni nawa Gadhi, mulibe chigawo kwa Chawuta.’ Nakutenepo wana wanu angazachitise kuti wana wathu azaleke kugopa Chawuta.” 26Nakutenepo ise tidazati, “Ngatimange mbuto yakupelekela ntsembe, koma ikhali lini yakupelekela ntsembe zakutentha panango mpfupo, 27koma izakhale mboni pakati payimwe nayise, pakati pamibadwe yathu im'bwela, kuti ise tiphatile basa Chawuta mu Tenti yake yakuyela nakupeleka ntsembe zakutentha nazakuyanjana. Pakuti wana wanu muntsiku zim'bwela an'zati kuwana wathu, ‘Mulibe chigawo mwa Chawuta.’ ” 28Ise tidakumbuka kuti, wana wanu akazabzilewa kwayise panango kum'badwe wathu un'zabwela, ise tin'zati, “Wonani, chifanikizo chambuto yakupelekela ntsembe kwa Chawuta, chaadamanga makholo yathu, mpakupelekela lini mpfupo zakutentha panango ntsembe zakutentha, koma kuti chizakhale umboni pakati payimwe nayise. 29Ise tingapandukile lini Chawuta, tingaleke lini kumuteyela thangwe lakuti tidamanga mbuto yakupelekela ntsembe zakutentha nantsembe zamphunga. Tingamange lini inango mbuto yakupelekela ntsembe kunja kwambuto yakupelekela ntsembe kwa Chawuta Mulungu wathu, ile ili patsogolo panyumba yakuyela.”
30Finiyasi nyantsembe wa Mulungu namanduna yagunyenye, naatsogoleli wamabanja yaa Izraeli waakhanayo, adabva bzidalewedwa nawanthu wanshowo wa Rubheni na Gadhi nakati-nakati yawa Manase, ibzi bzikhali bwino m'maso mwawo. 31Finiyasi mwana wa Eliyezari nyantsembe wa Mulungu adati kwawanthu wa Rubheni nawa Gadhi nakati-nakati yawa Manase, “Lelo tawona kuti Chawuta ali pakati pathu, thangwe lakuti imwe mulibe kupandukila Chawuta, koma imwe mudachiza a Izraeli kuchoka m'manja mwa Chawuta.”
32Pamwepo Finiyasi mwana wa Eliyezari nyantsembe wa Mulungu namanduna yaakhanayo adabwelela kuchoka kwawanthu wa Rubheni nawa Gadhi mudziko la Giliyadhi. Adabwelela ku Kenani kwaa Izraeli achikaalongosolela bzidachitika. 33Wanthu wa Izraeli paadabva bzidachitika adakondwa kwene-kwene, achilemekeza Mulungu. Alibe kuzalewa-lewa pomwe bzakuyenda kachita nawo nkhondo, nabzakukaphwanya dziko likhakhala wanthu wa Rubheni nawa Gadhi.
34Nakutenepo wanthu wa Rubheni nawa Gadhi adapasa dzina mbuto yakupelekela ntsembe ile kuti Mboni, pakuti iwo adati, “Ndiyo mboni pakati payimwe nayise kuti Chawuta ni Mulungu wathu.”
Currently Selected:
Joshuwa 22: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
