Joshuwa 21
21
Maguta yaa Levi
1Akulu-akulu wamabanja yaazipayi waa Levi adabwela pafupi na Eliyezari nyantsembe wa Mulungu nakwa Joshuwa mwana wa Nuni, nakwaakulu-akulu wamabanja yanshowo wawanthu wa Izraeli. 2#Kuw 35:1–8Ali pa Shilo mudziko la Kenani iwo adati kwayiye, “Chawuta adawuza Mozisi kuti, tidapasiwa maguta yakukhalamo, pabodzi nambuto zakudyesela bzifuwo bzathu.” 3Nakutenepo wana wa Izraeli adapasa a Levi maguta aya nambuto zakudyesela bzifuwo bzawo kuchoka munthaka yawo, kuteyeza bzidalewedwa namulomo wa Chawuta. 4Kuwombeza kwakuyamba kudagwela kwadzinza la Kohati kuteyeza mabanja yawo. A Levi wam'badwe wa Aroni nyantsembe wa Mulungu, adapasiwa maguta khumi namatatu kuchoka munshowo wa Judha nawa Simiyoni nawa Bhenjemani. 5Wanthu wentse wadzinza la Kohati akhadasala adapasiwa maguta khumi nanjila yakuwombeza kuchoka kumabanja yanshowo wa Efulemu, pomwe kuchoka munshowo wa Dhani nakati-nakati yawanthu wanshowo wa Manase. 6Wanthu wadzinza la Gerishoni adapasiwa maguta khumi namatatu nanjila yakuwombeza, kuchoka munshowo wa Isakari, nakunshowo wa Asheri nawa Nafitali, nakati-nakati yanshowo wa Manase mu Bhashani. 7Dzinza la Merari kuteyeza mabanja yawo, adapasiwa maguta khumi namawili kuchoka kum'badwe wa Rubheni, wa Gadhi nawa Zebhuluni. 8Wana wa Izraeli adachita bzakuwombeza kuti apase a Levi maguta nambuto zakudyesela bzifuwo, kuteyeza bzaadawuziwa na Chawuta mwa Mozisi. 9Kuchoka kunshowo wawana wa Judha nanshowo wawana wa Simiyoni adapeleka maguta aya yalewedwa namadzina, 10kuti yakhale yam'badwe wa Aroni, wadzinza la Kohati wanshowo wa Levi, pakuti kuwombeza kudagwela iwo pakuyamba. 11Adaapasa guta la Kiriyati-aribha mudziko lamapili la Judha, tsapano lin'chemelewa kuti Hebhuroni pabodzi nambuto zakudyesela bzifuwo. (Aribha akhali apayi wa Anaki.) 12Koma minda yagutalo namiyi yayene bzikhadapasiwa kale Kelebho mwana wa Jefune kukhala bzake.
13M'badwe wa Aroni nyantsembe wa Mulungu adapasiwa guta la Hebhuroni, guta lakupotela munthu akhapha mwanzake mwakusaya kukumbukila nambuto zakudyesela bzifuwo, na Libhina nambuto yakudyesela bzifuwo, 14na Jatiri nambuto yakudyesela bzifuwo na Eshitemowa nambuto yakudyesela bzifuwo 15na Holoni nambuto yakudyesela bzifuwo na Dhebhiri nambuto yakudyesela bzifuwo 16na Ayini nambuto yakudyesela bzifuwo na Juta nambuto yakudyesela bzifuwo bzawo na Bheti-shemeshi nambuto zakudyesela bzifuwo. Maguta yentse yadachoka munshowo wa Judha na Simiyoni yakhali pfemba. 17Kushowo wa Bhenjemani adapasiwa Gibheyoni nambuto zakudyesela bzifuwo na Gebha nambuto zakudyesela bzifuwo 18na Anatoti nambuto zakudyesela bzifuwo na Alimoni nambuto zakudyesela bzifuwo. Maguta yentse yakhali manayi. 19Maguta yadapasiwa m'badwe wa Aroni nyantsembe wa Mulungu yakhali khumi namatatu nambuto zakudyesela bzifuwo.
20Wanthu wentse wadzinza la Kohati wamabanja yaa Levi adasala adagawiliwa maguta nanjila yakuwombeza kuchoka kunshowo wa Efulemu. 21Iwo adapasiwa guta la Shekemu, guta lakupotela munthu akhapha mwanzake, nambuto zakudyesela bzifuwo bzawo, mudziko lamapili la Efulemu na Gezeri nambuto yakudyesela bzifuwo, 22na Kibhizayimu na Bheti-horoni, nambuto zakudyesela bzifuwo bzawo, maguta yentse yakhali manayi. 23Kunshowo wa Dhani kudachoka, Eliteke nambuto zakudyesela bzifuwo na Gibhetoni nambuto zakudyesela bzifuwo 24na Ayijaloni nambuto zakudyesela bzifuwo na Gati-rimoni nambuto zakudyesela bzifuwo, maguta yentse yakhali manayi. 25Kukati-nakati yanshowo wa Manase kudachoka, Tanaki nambuto zakudyesela bzifuwo, Gati-rimoni nambuto zakudyesela bzifuwo, adapasiwa maguta mawili. 26Maguta yentse yadzinza lam'badwe wa Kohati ukhadasala yakhali khumi, nambuto zakudyesela bzifuwo bzawo.
27Kudzinza laa Gerishoni, wabanja linango la a Levi adapasiwa maguta mawili kuchoka kukati nakati yanshowo unango wa Manase, Golani mu Bhashani nambuto zakudyesela bzifuwo, guta lakupotela munthu akapha mwanzake na Bheeshitera nambuto zakudyesela bzifuwo, maguta yentse yakhali mawili. 28Kunshowo wa Isakari kudachoka, guta la Kishoni na Dhabherati nambuto zakudyesela bzifuwo 29na Jarimuti nambuto zakudyesela bzifuwo na Eniganimu nambuto zakudyesela bzifuwo, maguta yentse yakhali manayi. 30Kunshowo wa Asheri kudachoka maguta manayi, Mishali nambuto zakudyesela bzifuwo na Abhidhoni nambuto zakudyesela bzifuwo, 31na Helikati nambuto zakudyesela bzifuwo na Rehobhi nambuto zakudyesela bzifuwo maguta yentse yakhali manayi. 32Kunshowo wa Nafitali adapasiwa maguta matatu, Kedheshi ili mu Galileya nambuto zakudyesela bzifuwo, guta lakupotela munthu akapha mwanzake na Hamoti-dhori nambuto zakudyesela bzifuwo na Karitani nambuto zakudyesela bzifuwo. 33Maguta yamabanja yentse yadzinza la Gerishoni yakhali khumi namatatu nambuto zakudyesela bzifuwo.
34A Levi adasala wam'badwe wa Merari, adapasiwa maguta kuchoka kunshowo wa Zebhuluni, adapasiwa Jokineyamu nambuto zakudyesela bzifuwo na Karita nambuto zayene zakudyesela bzifuwo 35na Dhimina nambuto zakudyesela bzifuwo na Nahalali nambuto zakudyesela bzifuwo, maguta yentse yakhali manayi. 36Kunshowo wa Rubheni adapasiwa, Bhezeri nambuto zakudyesela bzifuwo na Jahazi nambuto zakudyesela bzifuwo 37na Kedhemoti nambuto yakudyesela bzifuwo, na Mefayati nambuto zakudyesela bzifuwo, maguta yakhali manayi. 38Kunshowo wa Gadhi kudachoka maguta manayi, Ramoti mu Giliyadhi nambuto zakudyesela bzifuwo bzawo, guta lakupotela munthu akapha mwanzake na Mahanayimu nambuto zakudyesela bzifuwo 39na Heshibhoni na Jazeri nambuto zakudyesela bzifuwo bzawo, maguta yentse yakhali manayi. 40Nakutenepo maguta yadagawiliwa mabanja yam'badwe wa Merari nanjila yakuwombeza namabanja yaa Levi akhadasala yakhafika khumi namawili.
41Maguta yadapasiwa a Levi nambuto zakudyesela bzifuwo bzawo nkati mwanthaka yawana wa Izraeli kuti ikhale yawo, yakhali makumi manayi namasele. 42Maguta yamweya, paguta lokha-lokha pakhana mbuto yakudyesela bzifuwo.
A Izraeli antola dziko kukhala nthaka yawo
43Nakutenepo Chawuta adapasa a Izraeli dziko lentse laadalumbila kuzapasa makholo yawo. Adalitola kukhala lawo, iwo nkukhala m'mwemo. 44Chawuta adachita kuti mudziko lentse mukhale nan'delekho, kuteyeza kulumbila kwaakhadachita kumakholo yawo. Palibe ne m'bodzi paazondi wawo adakwanisa kuyimisana nawo, pakuti Chawuta akhaapasa mphamvu zakukunda azondi wawo. 45Palibe ne chibodzi chabwino chaakhadatsimikiza Chawuta kwaa Izraeli chidagwela pantsi, bzentse bzidachitika.
Currently Selected:
Joshuwa 21: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
