Joshuwa 20
20
Maguta yakupotela
1 #
Kuw 35:9–34; Kuts 4:41–43; 19:1–13 Chawuta adati kwa Joshuwa, 2“Wuza wanthu wa Izraeli kuti asankhule maguta yakupotela, kuteyeza kuwuziwa kudachitiwa Mozisi, 3kuti munthu akapha mwanzake mwakusaya kudziwa, munthuyo athawe apotele kumweko kuti alombolewe kwaabale wamunthu waadapha kuchitila kuti angabwezelembo kutayika kwagazi lam'bale wawo. 4Iye angathawile kuguta linango pamaguta yamweyo, achikayima pansuwo ukulu waguta, achikalongosola nkhani yake m'makutu mwaakulu-akulu waguta limwelo iwo ankamutakula achiyenda naye muguta, achimpasa mbuto, iye achikhala nawo pabodzi. 5Nyakubwezela gazi lanyakufa akamuteyela, wanthu wamuguta ngaaleke kuwapasa munthuyo, pakuti adapha mwanzake mwakusaya kudziwa, ne panango akhazondana naye kale. 6Wakutazayo angakhale muguta kufikila wayima patsogolo pagunyenye lawanthu kuti atongewe, kufikila nyantsembe nkulu wa Mulungu akhatonga panthawe imweyo wafa. Pamwepo nyakupha munthu angayende kuguta lake, laadathawa.”
7Nakutenepo iwo adasankhula guta la Kedheshi mu Galileya, mudziko lamapili la Nafitali na Shekemu mudziko lamapili la Efulemu, na Kiriyati-aribha, tsapano in'chemelewa kuti Hebhuroni mudziko lamapili la Judha. 8Kung'ambu kwa Jorodhani kumabveladzuwa kwa Jeriko, adasankhula guta la Bhezeri muchipululu, m'madambo yanshowo wa Rubheni na Ramoti mu Giliyadhi, namudziko la Gadhi na Golani mu Bhashani namudziko la Manase. 9Maguta yamweya ndiyo yadasankhuliliwa a Izraeli, pabodzi nawachilendo akhakhala pakati pawo, kuti yakhale maguta yakuthawila, pakachita munthu aninga wapha mwanzake mwakusaya kudziwa, kuchitila kuti aleke kuphewa namunthu an'zafuna kubwezelambo gazi lam'bale wake, kufikila wayima patsogolo pagunyenye lawanthu.
Currently Selected:
Joshuwa 20: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
