Joshuwa 19
19
Dziko lidapasiwa Simiyoni
1Kuwombeza kwachiwili kudafikila m'badwe wa Simiyoni, kuteyeza mabanja yawo. Adapasiwa nthaka yawo yadziko pakati panshowo wa Judha. 2#1 Mako 4:28–33Maguta yanthaka yawo yakhali, Bheeri-shebha na Shebha na Moladha 3na Hazari-shuwali na Bhala na Ezemu 4na Elitoradhi na Bhetuli na Horima 5na Zikilagi na Bheti-marikabhoti na Hazarisusa 6na Bheti-libhayoti na Sharuheni. Maguta yentse yakhali khumi namatatu namiyi yayene.
7Kuzabwela pomwe, Ayini na Rimoni na Eteri na Ashani. Maguta yentse yakhali manayi namiyi yayene, 8kuphatanizila miyi yentse ikhadazungunuka maguta mpaka ku Bhaalati-bheyeri naguta la Rama laku Rama-negebhu. Iyi ndiyo nthaka idapasiwa m'badwe wa Simiyoni kuteyeza mabanja yawo. 9Nthaka idapasiwa m'badwe wa Simiyoni ikhali nkati mwadziko yanthaka ya Judha, pakuti chigawo chidapasiwa m'badwe wa Judha chikhali chikulu kwene-kwene. Nakutenepo nshowo wa Simiyoni udapasiwa nthaka yawo pakati panthaka ya Judha.
Dziko lidapasiwa Zebhuluni
10Kuwombeza kwachitatu kudagwela m'badwe wa Zebhuluni kuteyeza mabanja yake. Dziko lanthaka yake likhafika pa Saridhi. 11Malile yake yakhapita nachakumadokelo yachikafika ku Marala, yachikafika ku Dhabhesheti nakukamadzi kakumabveladzuwa kwa Jokineyamu. 12Yakhayambila ku Saridhi yachipita nakumbali inango yachakumabveladzuwa kufika kumalile yaku Kisiloti-tabhori, yachipita naku Dhabherati mpaka ku Jafiya. 13Kuchoka pamwepo yachipitilila kuyenda chakumabveladzuwa kufika ku Gati-heferi naku Etikazini, yachiyenda ku Rimoni yachigonyoka kuyenda ku Neya. 14Malile yachakudzulu yakhazungunuka naku Hanatoni yachikamalila kuchigowa cha Ifitaheli. 15Kuphatanizila guta la Katati nala Nahalali nala Shimironi nala Idhala nala Bhetelehemu. Maguta yentse yakhali khumi namawili namiyi yayene. 16Iyi ndiyo nthaka yam'badwe wa Zebhuluni kuteyeza mabanja yawo, maguta yamweya namiyi yayene.
Dziko lidapasiwa Isakari
17Kuwombeza kwachinayi kudafikila m'badwe wa Isakari kuteyeza mabanja yawo. 18Madziko yawo yakhali, Jezireyeli na Kesuloti na Shunemu 19na Hafarayimu na Shiwoni na Anaharati 20na Rabhiti na Kishoni na Ebhezi 21na Remeti na Eniganimu na Enihadha na Bheti-pazezi. 22Malile yamweyo yakhafika pomwe ku Tabhori naku Shahazuma naku Bheti-shemeshi, yachikamalila pa Jorodhani. Maguta yentse yakhali khumi namatanthatu namiyi yayene. 23Iyi ndiyo nthaka yam'badwe wa Isakari kuteyeza mabanja yawo, namaguta namiyi yawo.
Dziko lidapasiwa Asheri
24Kuwombeza kwachishanu kudafikila m'badwe wa Asheri kuteyeza mabanja yawo. 25Dziko lawo likhaphatanizila maguta ya Helikati na Hali na Bheteni na Akishafi 26na Alameleki na Amadhi na Mishali yachikafika pa Karimeli chakumadokelo na Shihori-libhinati, 27yachilungama chakumabveladzuwa yachiyenda ku Bheti-dhagoni yachikafika ku Zebhuluni nakuchigowa cha Ifitaheli chakudzulu kwa Bheti-emeki naku Neyiyeli, yachiyenda nachakudzulu mpaka ku Kabhuli, 28ku Ebhuroni, ku Rehobhi, ku Hamoni, ku Kana, mpaka ku Sidhoni ikulu. 29Tsapano malile yadzikolo yadazagonyoka yachilungama ku Rama, kufika kuguta la Tire, guta lakuchinjiliziwa, yachizungunuka kulungama ku Hosa, yachimalila panyanja, kuphatanizila Mahalabhi, na Akizibhi, 30na Uma na Afeki na Rehobhi, maguta yentse yakhali makumi mawili namawili namiyi yayene. 31Iyi ndiyo nthaka yam'badwe wa Asheri kuteyeza mabanja yawo, maguta yamweya namiyi yawo.
Dziko lidapasiwa Nafitali
32Kuwombeza kwachitanthatu kudafikila m'badwe wa Nafitali kuteyeza mabanja yawo. 33Malile yawo yakhayambila pa Helefi pamuti wamuoki waku Zaananimu yachikafika ku Adhami-nekebhu naku Jabhineyeli mpaka ku Lakumi, yachikamalila ku Jorodhani. 34Malileyo yakhagonyoka yachilungama chakumadokelo, yachipita naku Azinoti-tabhori, yachilungama ku Hukoki yachigumana na Zebhuluni chakunyantsi na Asheri chakumadokelo, na Judha#19:34 Manango mabhukhu aniti Judha. chakumabveladzuwa pa Jorodhani. 35Maguta yakhadachinjiliziwa yakhali, Zidhimu na Zeri na Hamati na Rakati na Kinereti 36na Adhama na Rama, na Hazori 37na Kedheshi na Edhireyi Enihazori 38na Yironi na Migidhaleli na Horemu na Bheti-anati na Bheti-shemeshi. Maguta yentse yakhali khumi napfemba namiyi yayene. 39Iyi ndiyo ikhali nthaka yam'badwe wa Nafitali kuteyeza mabanja yawo, maguta namiyi yayene.
Dziko lidapasiwa Dhani
40Kuwombeza kwachinomwe kudafikila m'badwe wa Dhani kuteyeza mabanja yawo. 41Dziko laadapasiwa kukhala nthaka yawo likhaphatanizila, Zora na Eshitaoli na Irishemeshi 42na Shaalabhinu na Ayijaloni na Itila 43na Eloni na Timuna na Ekironi 44na Eliteke na Gibhetoni na Bhaalati 45na Jehudhi na Bhene-bheraki na Gati-rimoni 46na Mejarikoni na Rakoni nadziko likhadanyanganana na Jopa. 47#Ato 18:27–29Wanthu wa Dhani paadatolelewa dziko lawo, adayenda kamenya guta la Leshemu. Nakutenepo iwo adapamba guta limwelo achipha wanthu akhali m'mwemo. Adapha wanthu wentse namulomo wabhemba achitola dzikolo kukhala nthaka yawo, gutalo adalipasa dzina lakuti Dhani, dzina lakholo lawo. 48Iyi ndiyo nthaka idapasiwa m'badwe wa Dhani, kuteyeza mabanja yawo, maguta yamweya namiyi yayene.
Joshuwa ndiye akhali wakumalizila kupasiwa dziko
49Wanthu wa Izraeli paadamaliza kugawa dziko kukhala nthaka yawo, adapeleka mbali inango yadziko kuchoka nkati mwawo kwa Joshuwa mwana wa Nuni kuti ikhale nthaka yake. 50Ninga kulewa kwaadachita Chawuta, kuti Joshuwa angapasiwe guta lentse laadakumbila. Joshuwa adasankhula guta la Timunati-sera lamudziko lamapili la Efulemu. Nakutenepo iye adamanga pomwe guta achikhala m'mwemo.
51Izi ndizo nthaka zidagawiwa na Eliyezari nyantsembe wa Mulungu na Joshuwa mwana wa Nuni naatsogoleli wanyumba zaazipayi wawo wanshowo wa Izraeli. Adachita bzakuwombeza kwa Chawuta, nthawe yaakhali pansuwo wa Tenti yakugumanilana pa Shilo. Nakutenepo iwo adazamaliza kugawa dziko.
Currently Selected:
Joshuwa 19: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
