Joshuwa 18
18
Kugawiliwa dziko kwawanthu wentse
1Tsapano gunyenye lentse lawana wa Izraeli adakochezana pa Shilo, adazika Tenti yakugumanilana pamwepo. Dziko limwelo lidagwela m'manja mwawo. 2Koma padasala mishowo minomwe yawana wa Izraeli ikhanati yagawiliwa nthaka yadziko. 3Nakutenepo Joshuwa adati kwawana wa Izraeli, “Thangwe lanyi mukuleka kuyenda katola dziko lamudapasiwa na Chawuta Mulungu waazipayi wanu?” 4“Ndipase amuna atatu kuchoka panshowo wokha-wokha, ndiwatume kuti ayende akanyangane dziko lentse, akanembe dziko lin'zakhala nthaka yawo, achizabwela kuzandiwuza namulomo bzaaninga awona. 5Dziko limwelo azaligawe mubzigawo bzinomwe. Judha an'zapitiliza kukhala mudziko lachakunyantsi, wanyumba ya Jozefi an'zapitiliza kukhala mudziko lachakudzulu. 6Munembe pantsi dziko limwelo mubzigawo bzinomwe, mubwelese bzinembobzo kwayine. Tsapano ine nin'zakuwombezelani patsogolo pa Chawuta Mulungu wathu. 7A Levi an'gawiliwa lini mbuto pakati panu, pakuti unyantsembe wa Chawuta ndiyo nthaka yawo. Nshowo wa Gadhi nawa Rubheni nakati-nakati yanshowo wa Manase adapasiwa kale nthaka yawo kung'ambu kwa Jorodhani chakumabveladzuwa na Mozisi mulanda wa Chawuta.”
8Nakutenepo amunawo adayenda kanyangana dziko, Joshuwa adaawuza kuti, “Yendani mukanyangane dziko lentse mukanemba bzamuninga mwawona, mukamaliza muzabwelele kwayine, ndichizawombeza patsogolo pa Chawuta pa Shilo.” 9Nakutenepo amunawo adayenda kanyangana dziko lentse, adanemba mubhukhu bzinembo bzamaguta mubzigawo bzinomwe. Achibwelela kwa Joshuwa pansasa ku Shilo. 10Joshuwa adawombeza kwa Chawuta paakhali pa Shilo, pomwe adagawa dziko kwawana wa Izraeli kuteyeza nshowo wawo.
Dziko lidapasiwa Bhenjemani
11Nthawe yakuwombezela m'badwe wa Bhenjemani kuteyeza mabanja yawo idafika. Dziko laadapasiwa likhali pakati panshowo wa Judha nawa Jozefi. 12Malile yawo yambali yachakudzulu yakhayambila pa Jorodhani yachiyenda nakumatelo yachakudzulu kwa Jeriko, yachipita nachakumadokelo kwadziko lamapili yachimalila kuchipululu cha Bheti-aveni. 13Kuchoka pamwepo, malileyo yakhapita nachakunyantsi kumatelo yaguta la Luzi, ilo tsapano lin'chemelewa kuti Bheteli. Yakhayenda yachipolika chakunyantsi kwa Ataroti-adhari paphili lachakunyantsi kwa Bheti-horoni. 14Malileyo yadagonyoka kuyenda chakunyantsi kuteyeza mbali yachakumadokelo yaphili yachinyanganana naguta la Bheti-horoni, yachikamalila pamuyi wa Kiriyati-bhaali, uwo un'chemelewa kuti Kiriyati-jeyarimu, guta lam'badwe wa Judha. Aya yakhali malile yachakumadokelo. 15Malile yambali yachakunyantsi yakhayambila kunja kwa Kiriyati-jeyarimu, yachilungama ku Efuroni, mpaka kuntsantsa yamadzi ya Nefutowa, 16pamwepo malile yampolika pomwe namunyantsi mwaphili likhadanyanganana nachigowa cha Hinomu, chakudzulu kum'malila chigowa cha Refayimu, yachiyenda pomwe kunyantsi kwachigowa cha Hinomu, chakunyantsi kwamatelo yaa Jebhusi, mpaka ku Enirogeli, 17yachigonyoka pomwe yachiyenda nachakudzulu yachikafika ku Enishemeshi, yachiyenda naku Geliloti guta likhadanyanganana napampata wa Adhumimu, pomwe yachipolika kumwala wa Bhohani (Bhohani akhali mwana wachimuna wa Rubheni), 18yachipita napamatelo yachakudzulu kwa Bheti-arabha yachipolika kuchigowa cha Jorodhani, 19yachipita pomwe nachakunyantsi kwamatelo ya Bheti-hogila, yachimalila chakudzulu kumpamba wanyanja yamunyu, chakunyantsi yakhamalila pa Jorodhani. Aya ndiyo yakhali malile yachakunyantsi. 20Kamadzi ka Jorodhani ndiyo yakhali malile yachakumabveladzuwa. Iyi ndiyo ikhali nthaka yam'badwe wa Bhenjemani, kuteyeza mabanja yawo, namalile yawo kumbali zentse.
21Maguta yam'badwe wa Bhenjemani kuteyeza mabanja yawo yakhali, Jeriko na Bheti-hogila na Emeki-kezizi na 22Bheti-arabha na Zemarayimu na Bheteli 23na Avimu na Parahi na Ofira na 24Kefaramoni na Ofini na Gebha, maguta yentse yakhali khumi namawili namiyi yayene. 25Kuzabwela Gibheyoni na Rama na Bheeroti na 26Mizipa na Kefira na Moza 27na Rekemu na Iripeyeli na Taralahi 28na Zela na Hayelefu na Jebhusi, tsapano in'chemelewa kuti Jerusalema, na Gibheya na Kiriyati-jeyarimu. Maguta yentse yakhali khumi namanayi namiyi yayene. Iyi ndiyo ikhali nthaka yam'badwe wa Bhenjemani kuteyeza mabanja yawo.
Currently Selected:
Joshuwa 18: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
