Joshuwa 17
17
Dziko la Manase lachakumadokelo
1Dziko lachakumadokelo kwa Jorodhani lidagwatiliwa wanthu wanshowo wa Manase nanjila yakuwombeza, pakuti ndiye akhali mwana wakuyamba wa Jozefi. Makiri mwana wakuyamba wa Manase, Makiri apayi wa Giliyadhi adapasiwa dziko la Giliyadhi nala Bhashani, pakuti akhali nyabezi wabzankhondo. 2Dziko lentse lachakumadokelo kwa Jorodhani lidagawiliwa nshowo wa Manase udasala, kuteyeza mabanja yawo yaniti, Abhiyezeri na Heleki na Asiriyeli na Shekemu na Heferi na Shemidha. Awa akhali amuna wam'badwe wa Manase mwana wa Jozefi, kuteyeza mabanja yawo. 3Tsapano Zelofehadhi akhali mwana wa Heferi, Heferi akhali mwana wa Giliyadhi, Giliyadhi akhali mwana wa Makiri, Makiri akhali mwana wa Manase, Manase alibe kubala mwana wachimuna, adabala wana wachikazi basi, aya ndiyo madzina yawana wake wachikazi, Mahila na Nowa na Hogira na Milika na Tiriza. 4#Kuw 27:1–7Wana wachikaziwo adayenda kwanyantsembe wa Mulungu Eliyezari nakwa Joshuwa mwana wa Nuni nakumanduna kwaadakati, “Chawuta adawuza Mozisi kuti atipasembo nthaka yadziko pabodzi naabale wathu.” Joshuwa adaapasa nthaka yawo yadziko pakati paabale wawo wana waapayi wawo, kuteyeza bzidachoka pamulomo wa Chawuta. 5Nathangwe limwelo Manase adapasiwa bzigawo khumi, kuchosako dziko la Giliyadhi na Bhashani yakumabveladzuwa kung'ambu kwa Jorodhani, 6pakuti wana wachitsikana wa Manase adapasiwambo nthaka yawo yadziko pakati pawana wake wachimuna. Dziko la Giliyadhi lidagawiliwa nshowo wentse wa Manase ukhadasala.
7Malile yadziko la Manase yakhayambila kwa Asheri yachifika ku Mikimetati, chakumabveladzuwa kwa Shekemu yachiyenda nachakunyantsi kumbali yajanja ladidi kukhakhala wanthu waku Enitapuwa. 8Dziko la Tapuwa likhali la Manase, koma guta la Tapuwa lam'malile ya Manase, likhali lawana wa Efulemu. 9Malileyo yakhapolika nakukamadzi ka Kana. Maguta yentse yachakunyantsi kwakamadzi kamweka pakati pamaguta ya Manase yakhali ya Efulemu. Malile ya Manase yakhayenda pomwe nachakudzulu kwakamadzi, yachikamalila panyanja. 10Dziko lachakunyantsi likhali la Efulemu, dziko lachakudzulu likhali la Manase. Malile yawo ikhali nyanja. Asheri infikika nachakudzulu, chakumabveladzuwa kukhana Isakari. 11Manase akhana maguta yanango pomwe mudziko la Isakari namudziko la Asheri yaniti, Bheti-sheyani namiyi yayene na Ibhileyami namiyi yayene namaguta yamu Dhori (Nafati-dhori) namiyi yayene namaguta yamu Enidhori namiyi yayene namaguta yamu Tanaki namiyi yayene namaguta yamu Megidho namiyi yayene, lachitatu likhali guta la Nafati. 12#Ato 1:27,28Koma wanthu wa Manase alibe kukwanisa kutola maguta yamweyo, nakutenepo a Kenani adapitiliza kukhala mumadziko yamweyo. 13Ne wana wa Izraeli paadazalimba, alibe kuthamangisa a Kenani wentse akhakhala pakati pawo, koma akhaaphatisa basa lachibhalo.
Efulemu nawanthu wa Manase wakumadokelo ankumbila kuthimiziliwa mbuto
14M'badwe wa Jozefi udati kwa Joshuwa, “Thangwe lanyi kutipasa chigawo chibodzi chadziko nanjila yakuwombeza kukhala nthaka yathu? Ise ndise azinji kwene-kwene pakuti Chawuta adatidalisa.”
15Joshuwa adati kwayiwo, “Peno ndimwe azinji kulumizani muyende m'mathengo yadziko laa Perezi nalaa Refayimu mukabzikonzele pakukhala pamwepo, pakuti dziko lamapili la Efulemu niling'ono kwayimwe.”
16Wanthu wanshowo wa Jozefi adati, “Dziko lamapili latidawona ise tinkwana lini. Pomwe a Kenani an'khala kudambo ana ngolo zasimbi, nawentse akukhala, mu Bheti-sheyani namiyi yayene naawo akukhala muchigowa cha Jezireyeli.”
17Joshuwa adawuza wanthu wanshowo wa Jozefi nawa Efulemu nawa Manase kuti, “Ndimwe azinji, pomwe ndimwe wakulimba, nakutenepo mungawombezelewe lini mbuto ibodzi. 18Tsapano dziko lamapili lin'zakhala lanu, ne lingakhale thengo, mulichenese likhale lanu mpaka kum'malila malile. Mun'zathamangisa a Kenani akukhala mudziko limwelo, ne angakhale ana ngolo zasimbi, ne angakhale ali wakulimba.”
Currently Selected:
Joshuwa 17: KUNDA
Highlight
Copy
Compare
Share
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
