Kuyamba 37
37
Jozefi naakulu wake
1Jakobho akhakhala mudziko la Kenani, mukhakhala apayi wake ninga mulendo. 2Iyi ndiyo nkhani ya Jakobho nabanja lake.
Jozefi paakhana magole khumi nanomwe, akhabusa mabila pabodzi naakulu wake wana wa Bhiliha na Zilipa akazi waapayi wake. Koma Jozefi akhawuza apayi wake bzakuyipa bzikhachitiwa naakulu wake.
3Tsapano Izraeli akhafuna Jozefi kuposa wana wake anango wentse, pakuti nimwana waadabala wakalamba. Adamusonela chakubvala chitali chamanja matali. 4Koma akulu wake paadawona kuti apayi wawo akhafunisisa Jozefi kuposa anango wentse, adamuzonda, adaleka kulewa-lewa naye bwino.
5Ntsiku inango Jozefi adalota maloto, paadawuza akulu wake malotoyo, iwo adamuzondelatu kwakupitiliza. 6Iye adati kwayiwo, “Tetekelani maloto yandalota, 7ise tikhali m'munda tichimanga mitolo yatiligu, pamwepo ndidawona ntolo wangu udayima kuti dzololo, pamwepo mitolo yanu idabwela kuzayima kuzungunuka idakotamila ntolo wangu.” 8Akulu wake adati kwayiye, “Iwe unachadidi kuti un'zatitonga tentse? Panango kuti uzatitonga tentse.” Nakutenepo iwo adamuzondelatu nathangwe yamaloto yake namafala yake.
9Jozefi adalota pomwe yanango maloto, nkuwuza akulu wake, iye adati, “Ndalota pomwe maloto yanango, ndawona dzuwa namwezi nanyenyezi khumi nayibodzi bzichindikotamila.”
10Koma paadawuza apayi wake naakulu wake, apayi wake adamutsimula, iwo adati, “Ko nimaloto yanshowo wanyi yamweyo? Ko ukulewa kuti chadidi ine naamayi wako naakulu wako tin'zakukotamila?” 11#Mab 7:9Pamwepo akulu wake adaphatiwa nanchanje, koma apayi wake adayikha bzaadalewa muntima mwawo.
Kugulisiwa kwa Jozefi nakuyendesewa kwake ku Ijipiti
12Ntsiku inango akulu wa Jozefi adayenda ku Shekemu kabusa mabila yaapayi wawo. 13Tsapano Izraeli adati, kwa Jozefi, “Ko akulu wako saali kubusila bzifuwo ku Shekemu? Bwela, ninfuna kukutuma ku kwayiwo.” Iye adati, “Ndili pano.”
14Apayi wake adati, “Ndaphata minyendo, yenda kwaakulu wako kwaakubusila mabila ukawone kuti ali tani, uzandiwuze kuti bzilitani.” Nakutenepo Jakobho adamutuma kuchoka mugowa la Hebhuroni kuyenda ku Shekemu. 15Munthu adamuwona achifamba-famba nthengo. Munthuyo adam'bvunza kuti, “Ko ukupsaganyi?”
16Jozefi adati, “Ndikupsaga akulu wangu, ndaphata minyendo, mungandiwuzeko kwaali kubusila bzifuwo bzawo?”
17Mwamunayo adati, “Ayenda, koma ndaabva adati tiyendeni ku Dhotani.” Jozefi adazaateyela achikaawona ali ku Dhotani.
18Adamuwona ali patali, iye anati wafika iwo nkuyamba kupangana kuti amuphe. 19Iwo adati, “Nyanganani nyakulota ule wabwela. 20Ngatimupheni timuthuse mudindi, apayi akakatibvunza tinkati, ‘Adadyewa nanyama zan'thengo, tiwone kuti maloto yake yan'zathandizanyi.’ ”
21Koma Rubheni paadabzibva adapulumusa Jozefi kuchoka m'manja mwawo, iye adati kwayiwo, “Ngatileke kumupha.” 22Rubheni adati kwayiwo, “Lekani kumupha? Muthuseni mudindi lili muno muchipululu. Ngapaleke kuwoneka an'chita chakuyipa payiye.” Adalewa tenepo achifuna kumuchiza, kuti azam'bweze kwaapayi wake. 23Nakutenepo Jozefi paadafika pakhana akulu wake, adam'bvula chakubvala chake chamanja matali chaakhabvala. 24Adam'phata achimuthusa mudindi, dindi limwelo likhadawuma likhalibe madzi. 25Tsapano akulu wa Jozefi adazakhala pantsi achidya, ali pakudya tenepo adawona wanthu wachi Ishimayeli akhachoka ku Giliyadhi achiyenda ku Ijipiti, nangamela zawo zikhadatakula bzakudzola bzakununkhila nagamu nabhali namura. 26Judha adati kwaabale wake, “Ko bzintithandizanyi kupha mung'ono wathu tichibisa gazi lake? 27Ngatimuguliseni kwaa Ishimayeli, ngatileke kumpweteka pakuti ning'ono wathu, ndise wagazi libodzi.” Akulu wake naang'ono wake adamutetekela. 28#Mab 7:9Nakutenepo a anyamalonda wachi Midhiyani adapita napamwepo, adabulisa Jozefi mudindi, achimugulisa kwaa Ishimayeli namasheleni yasiliva makumi mawili, adatola Jozefi nkuyenda naye ku Ijipita.
29Rubheni paadabwelela kudindi, nkuwona kuti Jozefi mulibe, adang'amba bzakubvala bzake. 30Adabwelela kwaabale wake, adati kwayiwo, “Ndawona mudindi Jozefi mulibe! Ko niniyenda kuponi ine!”
31Pamwepo iwo adapha mbuzi nkunyika chakubvala cha Jozefi mugazi lambuziyo. 32Adatola chakubvala chake nkuyenda nacho kwaapayi wawo kwadakati, “Ibzi ndibzo bzatawona; wonani, ko nchakubvala lini chamwana wanu ichi?”
33Jakobho adachidziwa, iye adati, “Nchakubvala chamwana wangu, adatodyewa nabzinyama bzan'thengo. Jozefi adatong'ambiwa-ng'ambiwa!” 34Pamwepo Jakobho adang'amba bzakubvala bzake. Adabvala masakha achilila mwana wake kwantsiku zizinji. 35Wana wake wentse wachimuna nawachitsikana adayesa kumunyamaliza, koma alibe kukwanisa kumunyamaliza, iye adati, “Nee niniyenda kumbuto yawanthu wakufa kuna mwana wangu ndichilila.” Nakutenepo apayi wake adamulila. 36Nthawe imweyo a Midhiyani adakagulisa Jozefi ku Ijipiti kwa Potifa, nduna yamambo Farawo, nkulu waakhalilizi.
Currently Selected:
Kuyamba 37: KUNDA
Highlight
Share
Compare
Copy
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
