Kuyamba 38
38
Judha na Tamari
1Nthawe imweyo Judha adasiya abale wake nkuyenda kakhala namwamuna munango wachi Adhulamu akhachitiwa Hira. 2Kumweko Judha adawona mwana wachikazi wamunango mu Kenani, akhachitiwa Shua, adamuloola nkugona naye. 3Iye adaphata pathupi nkubala mwana wachimuna waadapasa dzina lakuti Eri. 4Adaphata pomwe pathupi achibala mwana wachimuna waadapasa dzina lakuti Onani. 5Adazabala pomwe munango mwana wachitatu waadapasa dzina lakuti Shela. Paadabala mwana umweyo akhakhala ku Kezibhi.
6Judha adaloolela mwana wake wakuyamba Eri, nkazi akhachitiwa Tamari. 7Koma Eri mwana wa Judha wakuyamba akhali wakuyipa patsogolo pa Chawuta, nakutenepo Chawuta adamupha. 8Pamwepo Judha adati kwa Onani, “Yenda kagone nankazi wankulu wako, uchite basa lamulamu kwayiye, abalile wana nkulu wake.” 9Koma Onani adazadziwa kuti wana waachabala an'zakhala lini wake. Nakutenepo paakhagona na Tamari, akhatayila umuna wake pantsi kuti aleke kubalila nkulu wake wana. 10Koma bzidachitiwa na Onani bzilibe kukondwesa Chawuta, nakutenepo adazamuphambo pomwe Onani. 11Pamwepo Judha adati kumuloola wake Tamari, “Bwelela kunyumba kwaapayi wako, ukakhale ndziche kufikila Shela mwana wangu wakula.” Judha adachita tenepo pakuti akhagopela mwana wake Shela kuti angaphewe bzidachitiwa akulu wake. Pamwepo Tamari adabwelela kakhala kwaapayi wake.
12Kwatopita kanthawe nkazi wa Judha mwana wa Shua adafa. Tsapano Judha paadamala kulila nkazi wake, iye nashamwali yake Hira mu Adhulamu adayenda ku Timina kukhagelewa mabila yawo. 13Tamari paadawuziwa kuti, “Atebzala wako akuyenda ku Timuna kagela mabila yawo,” 14iye adabvula bzakubvala bzawudziche bzaakhabvala. Adabzifinika kumaso nadhuku achiyenda kakhala pansuwo waguta likhachemelewa kuti Enaimu, munjila ikhayenda ku Timina. Pamwepo adawona kuti Shela wakula, koma alibe kumpeleka kuti apite nthaka.
15Judha paadawona Tamari adakumbuka kuti nihule, pakuti akhadabzifinika kumaso. 16Judha adapatuka achikalewa-lewa naye kuti agone naye, iye alibe kudziwa kuti nimuloola wake.
Tamari adati, “Munimpasanyi kuti mugone nayine?”
17Judha adati, “Ninkutumila kambuzi kuchoka kubzifuwo.”
Tamari adati, “Ndipaseni chinango chinthu chamunacho kuti ndiphate mpaka mwatumila kambuziko.”
18Judha adati, “Ko ningakupasenyi kuti uphate?” Iye adati, “Ndipaseni lingi yachidhindo nathambo yache, nampsimbo yamunayo.” Nakutenepo Judha adampasa bzinthubzo nkugona naye, iye nkuphata pathupi. 19Tamari adabwelela kunyumba kwake, nkuchosa nguwo ile yaakhadabzifunikisa kumaso, nkubvala bzakubvala bzawudziche wake.
20Judha adazatuma shamwali yake Hira wachi Adhulamu kuti ayende nakambuzi, achikatakula bzinthu bzake bzaakhadaphatisa, koma shamwali yake paadakafika kumweko adakamusaya. 21Hira adabvunza wanthu wamu Enayimu kuti, “Ko hule likhakhala panjila yapa Timina ili kuponi?” Wanthu adati, “Palibe kukhalako hule pano.”
22Nakutenepo iye adabwelela kwa Judha achikati kwayiye, “Ndilibe kumuwona, pomwe wanthu wakumweko alewa kuti palibe kukhalako hule pano.”
23Judha adati, “Ngaakhale nabzo bzinthubzo bzikhale bzake, pakuti tingasekewe, wona ndatumiza kambuzi koma iwe ulibe kumuwona.”
24Kudapita mwezi mitatu, Judha adazawuziwa kuti, “Muloola wako Tamari adachita uhule, tsapano wawa napathupi.” Judha adati, “Mubweleseni atenthewe.”
25Paakhafuna kumutakula kuti ayende naye, Tamari adatumila fala kwaatebzala wake adati, “Ndina pathupi pamwamuna adandipasa bzinthu ibzi. Munyanganisise, ndaphata minyendo kuti lingi yachidhindo nathambo nampsimbo nibzayani.”
26Judha adadziwa kuti bzinthu nibzake, iye adati, “Tamari alibe mulandu. Ndine nyakutaza, pakuti ndilibe kuzampasa mwana wangu Shela kuti amuloole.” Judha alibe kuzagona naye pomwe.
27Nthawe yakubala payidafika bzidazawoneka kuti akhana mapasa. 28Nthawe yakubala, mwana munango adachosa janja lake kunja, an'nyanchikuta nkumangilila kathambo kafuyila kujanja lakelo nkuti, “Uyu ndiye wakuyamba.” 29Koma mwanayo adazabwezela janja lake nkati, pamwepo m'bale wake nkuchoka. Nyan'chikuta adati, “Ko ndiwo mpatuko wawabzichitila uwu?” Mwana umweyo adazampasa dzina lakuti Perezi.#38:29 Perezi: Mpatuko. 30Khalekhale m'bale wake adabulambo ana kathambo kafuyila kujanja, achimpasa dzina lakuti Zera.
Currently Selected:
Kuyamba 38: KUNDA
Highlight
Share
Compare
Copy
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
