Kuyamba 35
35
Mulungu an'dalisa Jakobho pa Bheteli
1 #
Kuya 28:11–17
Mulungu adati kwa Jakobho, “Sumuka, yenda ku Bheteli, ukakhale kumweko, kumweko ukamangile Mulungu mbuto yakupelekela ntsembe, uyo adabziwonesa kwayiwe pawudathawa nkulu wako Esau.” 2Nakutenepo Jakobho adawuza wanyumba yake nawentse waakhanawo kuti, “Chosani amilungu wachilendo ali pakati panu, mubzichenese, mubvale bzakubvala bzinango; 3ngatiyendeni ku Bheteli, ndikamangile Mulungu mbuto yakupelekela ntsembe, uyo adandidayila muntsiku zakushupika kwangu, pomwe akhana yine kwentse kwandikhayenda.” 4Nakutenepo iwo adapasa Jakobho amilungu wawo wachilendo wentse waakhanawo, namphete zikhali m'makutu yawo, Jakobho adabzifuchila pantsi pamuti wamuoki ukhali pafupi na Shekemu.
5Adafamba ulendo wawo, kugopsa kwa Mulungu, kukhafikila maguta yakhadaazungunuka kuchitila kuti aleke kuteyela wana wa Jakobho. 6Jakobho adafika ku Luzi, ilo likhachemelewa pomwe kuti Bheteli, mudziko la Kenani, iye pabodzi nawanthu waakhanawo. 7Adamanga mbuto yakupelekela ntsembe kumweko, achiyipasa dzina lakuti Eli-bheteli, pakuti Mulungu kumweko adabziwonesa pachake kwayiye paadathawa nkulu wake. 8Dhebhora, nyakuyamwisa wa Rabheka adafa, adamuyikha munyantsi mwamuti wamuoki chakunyantsi kwa Bheteli; Muti umwewo adawupasa dzina lakuti, muoki wakulila.
9Mulungu adabziwonesa pomwe kwa Jakobho, paadabwelela kuchoka ku Padhani-aramu, achimudalisa. 10#Kuya 32:28Mulungu adati kwayiye, “Dzina lako ndiwe Jakobho, koma un'zachemelewa lini nadzina lakuti Jakobho, waakuchemelewa kuti Izraeli.” 11#Kuya 17:4–8Mulungu adati kwayiye, “Ndine Mulungu Nyamphamvu zentse. Balanani muwande; mishowo mizinji yawanthu in'zachoka kwayiwe, namazimambo yan'zachoka kwayiwe. 12Dziko landidapasa Abhurahamu na Isaki, nin'zalipeleka kwayiwe nakum'badwe wako un'zabwela.”
13Pamwepo Mulungu adachoka pambuto paakhalewa-lewa naye. 14#Kuya 28:18,19Jakobho adayimisa mwala wachilemela pambuto yaadalewa-lewa na Mulungu, nkuthululapo ntsembe yavinyu, adathululapo mafuta yamuolivi pamwalawo. 15Jakobho adapasa dzina mbuto yaadalewa-lewa na Mulungu lakuti, Beteli.
Kufa kwa Rakelo
16Jakobho nabanja lake adachoka pa Bheteli nkuyenda. Koma ali patali pang'ono kufika mudziko la Efurata, pathupi pa Rakelo padayamba kuwawa, pakuti nthawe yake yakubala ikhadafika. Rakelo adashupika kwene-kwene pakubala kwake. 17Nthawe yaakhali kuwawidwa namimba an'yanchikuta adati kwayiwe, “Leka kugopa pakuti wapasiwa pomwe mwana wachimuna.” 18Rakelo paakhali pafupi kufa adapasa mwanayo dzina lakuti Bhenuni, koma apayi wake adazampasa dzina lakuti Bhenjemani.
19Nakutenepo Rakelo adafa achiyikhiwa m'mbali mwanjila ikhayenda ku Efurata, mbuto imweyo in'chemelewa pomwe kuti Bhetelehemu. 20Jakobho adayimisa mwala wachilemela kunsolo kwamanda ya Rakelo, mwalawo ulipo nalelo. 21Izraeli adachokapo achikamanga tenti yake nachakum'mbali inango yaguta la Edheri.
Wana wa Jakobho
(1 Mako 2:1,2)
22 #
Kuya 49:4
Izraeli paakhakhala mudziko limwelo, Rubheni adagona na Bhiliha nkazi wapambali waapayi wake; Izraeli adabzibva.
Tsapano wana wa Jakobho akhali khumi naawili. 23Wana wa Liya akhali tenepa, wakuyamba akhali Rubheni, kuchizabwela Simiyoni na Levi na Judha na Isakali na Zebhuloni. 24Wana wa Rakelo akhali, Jozefi na Bhenjemani. 25Wana wa Bhiliha mulanda wachikazi wa Rakelo akhali Dhani na Nafitali. 26Wana wa Zilipa mulanda wachikazi wa Liya akhali, Gadhi na Asheri. Awa ndiwo wana wa Jakobho waadabaliliwa paakhali mu Padhani-aramu.
Kufa kwa Isaki
27 #
Kuya 13:18
Jakobho adabwela kwaapayi wake Isaki ku Mamure, panango kuti Kiriyati-aribha, iyo ikhachemelewa kuti Hebhuroni, kudambakhala Abhurahamu na Isaki. 28Tsapano Isaki adalalama kwamagole dzana namakumi masele. 29Isaki adafa, wakalamba kwene-kwene, adayikhiwa kudayikhiwa wam'badwe wake; wana wake Esau na Jakobho ndiwo adamuyikha.
Currently Selected:
Kuyamba 35: KUNDA
Highlight
Share
Compare
Copy
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
