Kuyamba 34
34
Dhina ampsipisiwa
1Tsapano Dhina mwana wachikazi wa Leya, waadabalila Jakobho, adayenda kazungila akazi wamudziko la Kenani. 2Shekemu mwana wa Hamori mu Hivi, nduna yamudziko adamuwona, adamuphata achigona naye, achimunyazisa. 3Iye datolewa ntima na Dhina mwana wachikazi wa Jakobho; adamufuna achilewa-lewa naye, mafala yabwino yakumufuna. 4Nakutenepo Shekemu adalewa-lewa naapayi wake Hamori adati, “Ndilooleleni ntsikana uyu akhale nkazi wangu.”
5Tsapano Jakobho adabva kuti Dhina mwana wake wachikazi akhadapsipisiwa; koma wana wake wachimuna akhali nthengo nabzifuwo. Jakobho adanyamala mpaka iwo abwela. 6Hamori apayi wa Shekemu adayenda kwa Jakobho achikalewa-lewa naye. 7Wana wa Jakobho adabwela kuchoka nthengo, paadabva bzikhadachitika, adashupika achikalipa kwene-kwene, pakuti bzidachita Shekemu, kwaa Izraeli bzikhanyazisa.
8Koma Hamori adalewa-lewa nawo, adati, “Mwana wangu Shekemu akufuna mwana wanu wachikazi; ndaphata minyendo yanu, mpaseni kuti amuloole. 9Ngatiloolelaneni, ise tiloole wana wanu, imwe muloolembo wathu. 10Imwe mukhale pabodzi nayise, mungakhale pentse pamunfuna; khalani muchichita malonda m'mwemo, kuti mukhalembo nambuto.”
11Shekemu adati pomwe kwaapayi wa Dhina nakwaazimano wake, “Ndichitilemboni bwino, bzentse bzamuti mulewe ninkupasani. 12Lewani mpagalo nampfupo yanyakuloodwa, ninkupasani bzamuninga mwalewa; chaninfuna ine nkundipasa mwana wanu kuti akhale nkazi wangu.”
13Wana wa Jakobho adadayila Shekemu naapayi wake Hamori, bzakuwaphata kumaso, pakuti Shekemu akhadapsipisa kale nana wawo Dhina. 14Iwo adati kwayiwo, “Tingachite lini tenepo, kupeleka nana wathu kwamunthu alibe kugwatiwa khanda lanyama lachimuna, pakuti kwayise nichinthu chinyazisa. 15Ise tintobvuma kuchita tenepo, imwe mukachita ninga ise, amuna wentse wakwanu akagwatiwa khanda lanyama lachimuna. 16Mukatenepo pan'zakhala nakuloolelana pakati payimwe nayise. Ise tin'zalooza kwayimwe, wana wanu achizaloolambo kwayise, tin'zakhala nayimwe tichizakhala wanthu abodzi. 17Koma mukaleka kutetekela bzatalewa, bzakugwatiwa khanda lanyama lachimuna, tintakula mwana wathu tichiyenda naye.”
18Mafala yawo yadakondwesa Hamori namwana wake Shekemu. 19Mulumbwana umweyo alibe kuchedwa kubzichita, pakuti akhafuna mwana wa Jakobho. Shekemu akhakuziwa kwene-kwene mubanja lake lentse.
20Hamori namwana wake Shekemu adayenda kunsuwo waguta kwaadakalewa-lewa nawanthu waguta lawo, adati, 21“Wanthu awa akukhala bwino nayise; ninga akhala bzawo mudziko lino achichita malonda yawo, pakuti mukanyangana dziko lino ndikulu; ngatiloolelaneni nawo, wana wathu ambaloola wana wawo, wana wawombo ambaloola wana wathu. 22Koma wanthu awa antobvuma kukhala nayise, tichikhala wanthu abodzi, mwamuna wentse ali pakati pathu akagwatiwa khanda lanyama lachimuna ninga bzaali iwo. 23Ko chuma chawo nabzifuwo bzawo sibzin'zakhala bzathumbo? Nakutenepo ngatibvaneni nawo, kuti akhale nayise.” 24Wanthu wentse adayenda kunsuwo waguta adabvuma bzidalewedwa na Hamori namwana wake Shekemu; mwamuna wentse adayenda kunsuwo waguta adagwatiwa khanda lanyama lachimuna.
25Pantsiku yatatu, achali kuwawiwa, wana awili wa Jakobho Simiyoni na Levi, azimano wa Dhina, adatakula mabhemba yawo nkupita muguta mwakusaya kugopa, nkupha amuna wentse. 26Adapha Hamori namwana wake Shekemu nabhemba, adatakula Dhina munyumba mwa Shekemu nkuyenda naye. 27Wana wa Jakobho adayenda kukhana bzitanda, nkupamba guta, nathangwe lakuti nana wawo akhadapsipisiwa; 28adatola mabila yawo, namadhonki yawo, nabzentse bzikhali muguta nan'thengo, 29nachuma chawo chentse, nawana wawo wentse naakazi wawo, nabzentse bzikhali muzinyumba zawo, adabzipamba achibzichita bzawo.
30Pamwepo Jakobho adati kwa Simiyoni na Levi, “Mwandibwelesela nyathwa, mwachita kuti ndinunkhe, kwawanthu wamudziko lino, a Kenani naa Perezi; ise ndise ang'ono-ng'ono, akakochezana adanyanganana nayine an'zandicheneka, ine nawanyumba yangu.” 31Koma iwo adati, “Angaphate nana wathu ninga hule?”
Currently Selected:
Kuyamba 34: KUNDA
Highlight
Share
Compare
Copy
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
