Kuyamba 33
33
Jakobho an'gumana na Esau
1Jakobho adanyangana, nkuwona Esau achibwela pabodzi naamuna mazana manayi (400). Adagawa wana wake pakati pa Liya na Rakelo naalandakazi wake awili. 2Jakobho adayikha alandakazi wake nawana wawo patsogolo, achiteyelewa na Liya nawana wake, Rakelo na Jozefi ndiwo akhali kwakumalizila pana wentse. 3Jakobho adayenda patsogolo pawo, adamukotamila kanomwe mpaka adazafika pafupi nankulu wake. 4Esau adathamanga achikagumana naye, adamukumbatila, achimuphsoda, iwo adalila. 5Esau adanyangana nkuwona akazi nawana, iye adati, “Ko awa wawunawo mbani?” Jakobho adati, “Awa ndiwo wana waadapasiwa mulanda wanu na Mulungu mwachifundo chawo.” 6Pamwepo alanda adafika pafupi, iwo nawana wake achimukotamila; 7Liya adachita bzibodzi-bodzi, iye nawana wake adafikambo pafupi achimukotamila; pakumalizila Jozefi na Rakelo adafika pafupi achimukotamila.
8Esau adati, “Ko mititi yandagumana nayo inilewanyi?” Jakobho adati, “Kuti ndibvelewe chifundo nambuya wangu.” 9Koma Esau adati, “Nkulu wangu, ine ndina bzizinji kwene-kwene! Chengeta bzawunabzo.” 10Jakobho adati, “Nee, ndaphata minyendo, peno mwandibvela chifundo, tambilani mpfupo zandikukupasani; pakuti chadidi kuwona nkhope yanu kuli ninga kuwona nkhope ya Mulungu, nachifundo chakutenepa mwanditambila. 11Tambilani, ndaphata minyendo, mpfupo yangu yabwelesewa kwayimwe, pakuti Mulungu wandichitila chifundo, pakuti ndinabzo bzizinji.” Nakutenepo Jakobho adamuwumiliza mpaka iye adabzitambila.
12Esau adati, “Ngatiyende ulendo wathu, ine ndichatsogola.” 13Koma Jakobho adati kwayiye, “Mbuye wangu mun'dziwa kuti wana alibe mphamvu, pomwe ndina mabila nang'ombe bziniyamwisa, bzintofuna ine kuti nimbabzinyangana, ndikabzifambisa mwakuthamanga kuti tifike nantsiku ibodzi, mabila yentse yanifa. 14Ndaphata minyendo lekani mbuya wangu ayende patsogolo pamulanda wake, ine ninkuteyelani pang'ono-pang'ono kuteyezela kufamba kwabzifuwo bzandinabzo, ndichiteyeza pomwe kufamba kwawana, mpaka ndafika kwambuya wangu ku Seiri.”
15Esau adati, “Ndaakukusiyila anango wanthu wandinawo.” Jakobho adati, “Mungachite lini tenepo mbuya wangu, lekani ndiwone chifundo pamaso pambuya wangu.” 16Nakutenepo Esau adabwelela ulendo wake ntsiku imweyo, kuyenda ku Seiri. 17Koma Jakobho adayenda ku Sukoti, kwaadakabzimangila nyumba, achimanga mathanga yabzifuwo bzake; nakutenepo mbuto imweyo ikuchemelewa nadzina lakuti Sukoti. #33:17 Sakoti bzinilewa kuti, “Mathanga.” 18Jakobho adafika bwino muguta la Shekemu, mudziko la Kenani, paadachoka ku Padhani-aramu; adazika matenti yake yadanyanganana naguta. 19#Jos 24:32; Yoh 4:5Jakobho adagula mbuto kuchoka kwawana wa Hamori apayi wa Shekemu adagula nantengo wamasheleni dzana, nkuzikapo tenti yake. 20Adamanga mbuto yakupelekela ntsembe kumweko, yaadapasa dzina lakuti Mulungu-Mulungu wa Izraeli.
Currently Selected:
Kuyamba 33: KUNDA
Highlight
Share
Compare
Copy
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
