Kuyamba 32
32
Jakobho ankonzeka kagumana na Esau
1Jakobho adayenda ulendo wake, ngilozi za Mulungu zidagumana naye; 2Jakobho paadaziwona adati, “Iyi ninkhondo ya Mulungu.” Nakutenepo mbuto imweyo adayipasa dzina lakuti Mahanayimu.
3Jakobho adatuma atumiki patsogolo pake kwankulu wake Esau uyo akhakhala mumbuto ya Seyiri mudziko la Edhomu, 4achiwawuza kuti, “Yendani kwa Esau mbuya wangu mukamuwuze kuti, ‘Mulanda wanu Jakobho wati, ndidakhala kwa Labhani kwandikhakhala kufika lelo, 5ndina ng'ombe namadhonki namabila nambuzi naalanda wachimuna nawachikazi. Tsapano ndatuma atumiki kwayimwe mbuya wangu kuti mundikomele ntima.’ ”
6Atumiki adabwelela kwa Jakobho, achikati, “Tidafika kwankulu wanu Esau. Tsapano iye akubwela kuzagumana nayimwe, ana wanthu mazana manayi.” 7Jakobho paadabva mafalayo adabva mantha kwene-kwene achishupika. Iye adapatula wanthu waakhanawo namabila mubzipani bziwili, 8achikumbuka kuti, “Peno Esau anfika achimenya chipani chibodzi, chinango chipani chinthawa.”
9Jakobho adati, “Mulungu waayavu wangu Abhurahamu, Mulungu waapayi wangu Isaki, imwe Chawuta ndimwe mudati kwayine, ‘Bwelela kudziko lako, kudziko laabale wako. Mudati bzinthu bzentse bzininfambila bwino.’ 10Pakuti ine ndikhafunika lini kuwona ntsisi nachikhulupililo chentse chamudawonesa mulanda wanu. Pandidayambuka Jorodhani ndikhana mpsimbo basi, tsapano ndakhala bzipani bziwili. 11Ndaphata minyendo yanu, ndipulumuseni m'manja mwankulu wangu Esau. Ndikugopa, pakuti angafike achitipha tentse, azikazi nawana. 12#Kuya 22:17Koma imwe mudati, ‘Nin'zakuchitila bzabwino, ndichizachita kuti m'badwe wako uzawande ninga n'chenga wamunyanja, an'zawanda bzakusaya kuwelengeka.’ ” 13Nakutenepo Jakobho adagona pamwepo usiku umwewo. Mangwana yache adasankhula pabzaakhanabzo achibzipeleka mpfupo kwankulu wake Esau, 14mbuzi zikazi adachosa mazana mawili, mbuzi zikono makumi mawili, mabila makazi mazana mawili namikono yamabila makumi mawili, 15nangamela zikazi makumi matatu nabziwana bzayene nang'ombe zikazi makumi manayi namikono yang'ombe khumi, namadhonki makazi makumi mawili namikono yamadhonki khumi. 16Jakobho adayikha bzifuwobzo m'manja mwaalanda wake, ntiti nantiti ukhali pawene wokha. Iye adati kwaalanda wake, “Imwepo muyende patsogolo pangu nabzifuwo, koma pakhale nambuto pakati pantiti unango nawunango.” 17Adawuza akhana chipani chapatsogolo kuti, “Mukagumana nankulu wangu Esau, akakubvunzani kuti, ‘Ndimwe alanda wayani? Ko mukuyenda kuponi? Ko bzifuwo bzamunabzo m'bzayani?’ 18Imwe munkati, ‘M'bzamulanda wanu Jakobho, nimpfupo zatumiziwa kwa mbuya wangu Esau, iye ali kuteyela m'mbuyo mwathu.’ ” 19Adawuza bzibodzi-bodzi kuchipani chachiwili nachachitatu nawentse akhateyela mbuyo kuti, “Mukagumana na Esau munkamuwuze bzibodzi-bodzibzo, 20imwe munkati, ‘Mulanda wanu Jakobho akuteyela mbuyo.’ ” Iye adakumbuka kuti, “Panango ningampembze nampfupo zaninintumiza ndichikawonana naye panango achikanditambila.” 21Nakutenepo, adatumila mpfupo patsogolo pake, iye achisala usiku umwewo ali pansasa.
Jakobho an'chita mabimbili na Mulungu pa Penuyeli
22Usiku umwewo Jakobho adasumuka, nkutola azikazi wake awili, naalandakazi wake awili nawana wake khumi naam'bodzi nkuyambuka kamadzi ka Jabhoko. 23Adaayambusa kamadzi achiyambusambo pomwe bzinthu bzake bzentse bzaakhanabzo, 24#Hos 12:3,4koma Jakobho adasala pamwepo ali yekha.
Pamwepo adachita mabimbili namunango mwamuna mpaka kumadandakucha. 25Mwamunayo paadawona kuti wataza kukunda Jakobho, adam'menya nampsimbo yake panchafu, iye nkubzuguduka bondo. 26Mwamunayo nkuti, “Ndileke ndiyende pakuti nkumadandakucha!”
Koma Jakobho adati, “Ninkuleka lini uchiyenda ulibe kundidalisa.” 27Mwamuna umweyo adati, “Ko dzina lako ndiwe yani.”
Iye adati, “Ndine Jakobho!” 28#Kuya 35:10Mwamuna ule adati, “Kuyambila lelo uchachemelewa lini kuti Jakobho, waakuchemelewa kuti Izraeli, pakuti wachita mabimbili na Mulungu nawanthu uchikunda.”
29 #
Ato 13:17,18 Jakobho adati, “Ndaphata minyendo, ndiwuzembo dzina lako.” Mwamunayo adati, “Thangwe lanyi unfuna kudziwa dzina langu?” Pamwepo adamudalisa. 30Mbuto imweyo Jakobho adayipasa dzina lakuti Penuyeli adati, “Ndawonana na Mulungu maso namaso, koma ndilibe kufa.” 31Jakobho paakhachoka mu Penuyeli dzuwa likhatochoka, koma iye akhagwinthama pakuti akhadabzuguduka mwendo wake. 32Ndibzo bzidazachitisa kuti a Izraeli aleke kudya midzipe yamunchafu mpaka lelo. Pakuti mwamunayo adamenya Jakobho pabondo yapanchafu.
Currently Selected:
Kuyamba 32: KUNDA
Highlight
Share
Compare
Copy
Want to have your highlights saved across all your devices? Sign up or sign in
Bhaibheri reChikunda © Bible Society of Zimbabwe
