Èhàwo 91
91
Èjìdodo ɖo Mawu ŋuti nyànà vɔ̃vɔ̃ keŋu jo
1Àmè kè bɔ̀bɔ̀ nɔ̀ ànyi lè Mawu èjihũitɔ,
ŋusɛ̃kpatatɔa be wlapea, la nɔ̀ yebe vɔ̃vɔ̃lì gɔ̃mè.
2E gblɔ̃nà na Tɔhonɔ̀ be:
“Wò nyi àpe ètabèpe kudo àgbògbò.
Mawu kè ŋuti mù ɖona ŋù ɖoa.”
3Ɛ̃ɛ, dodo Mawu la ɖè wò to lè xèviletɔa be èmɔ̃ mè,
la gbà hlùɛ̃ wò lè èdɔ̀ vuɛ̃ si mè.
4E la sɔ yebe àwà cɔ̃ ji wò,
eye wò la ɖè èjì ɖɛ lè yebe àwàdawo gɔ̃mè.
Yebe nyàwototo ku ànùkua la nyi àkpoxɔ̀nu na wò.
5Nène a, wò mu la gbà vɔ̃ ènu ɖe lè èzã mè
kaka la vɔ̃ àŋùti kèwo le zrò lè ŋùkèkè mèa ò.
6Nène a ke èdɔ̀ vuɛ̃ crɔ̃-àmè
kè le ɖìsà lè vìvìti mè àlo èdɔ̀ cage-àmè
kè gblena ènu dɔ̃ŋùkusu jàsea,
mu la do vɔ̃vɔ̃ na wò ò.
7Àgbètɔ sìgbè àkpe ɖèka nène la nɔ jè ànyi lè àpo àhàdamè,
eye àkpe èwo la jè ànyi lè àpo ɖùsi mè.
Vɔ̀a ènu ɖekpe mu la kãfɛ̃ wò ya ò.
8Ŋùkuvi kpò wò la sɔ ɖɛ, la kpɔ àlekè
wo la dɔ̃ èto na àmè bàɖàwo ɖoa.
9Ɖo wò sɔ Tɔhonɔ̀, Mawu gã,
kè le nyi àpo ètabèpea, wɔ̀ nɔ̀pe.
10Sukpa ɖekpe ma kpe wò ò, nènea ke
èdɔ̀ vuɛ̃ ɖekpe ma gogo àpo nɔ̀pe ò.
11Ɖo Tɔhonɔ̀ la do ègbè àsi na yebe àtikplɔtɔwo ɖo ŋuti wò
ne woa kpɔ èji wò lè àpo èmɔ̃wo kpata ji.
12Wo la kɔkɔ wò ɖo àlɔ̀ mè,
ne àpo àfɔ̀ mu gbà tɔ èkpe ò.
13Wò la zɔ̃ jãŋùta ku flìbo ji,
wò la nyàmà jãŋùtavi kudo èdã.
14Eye Mawu gblɔ̃ be: “Kè e tɔ̀ be e lɔ̃nà mù a,
mù la na ɛ̀ vòvo, mù la lebè na ɛ̀
ɖo e nya àmè kè ŋùkumè mù nyia.
15Ne e yɔ mù a, mù la tɔ̀ na ɛ̀.
Mù la nɔ̀ kudo è lè gbledo hùenu.
Mù la tu èkà na ɛ̀ eye mù la do bùbu e ŋuti.
16Mù la na ɛ̀ àgbè dìdì, be la sù ì,
eye mù la ɖèfiɔ ɛ̀ be mù nyi yebe hlùɛ̃tɔ.
Currently Selected:
Èhàwo 91: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
