Èhàwo 90
90
XOMA ÈNƐ̀GƆ̃A
(Èhàw 90 yì 106)
Àgbètɔ be àgbè ɖo vɔ̀vɔnu, vɔ̀ Mawu ya lè tɛ̀gbɛ̀
1Mosè, Mawu be àmèdɔ̃dɔ̃a be kuefã.
Tɔhonɔ̀, èwò ye nyi miabe tabèpe so jìjimè yì jìjimè.
2Gbɔ̀xue ètowo jɔ̀, gbɔ̀xue wò ɖo xixea,
èwò ye nyi Mawu so gbèɖegbè kaka sɔ yì.
3Wò gblɔ̃ na àgbètɔwo be:
“Mì trɔ yì fikè wo jɔ̀ mì soa”.
Nène a ye wo kuna gbà trɔna ɖiɖɔɛ.
4Ɖo, lè gbɔ wòa, èpè kàwìvɔàtɔ̃ lè sìgbè èsɔ̀ kè va yìa nène,
e gbà lè sìgbè èzã be gàpòpo ɖewo kpò nène.
5Wò kplɔ̀nà àgbètɔ be àgbèa srà yìnà,
e yìnà sìgbè àlɔ̃ dɔ̃dɔ̃ nène.
E gbà lè sìgbè ègbe kè le mìɔ̃ ŋùdekɛ̃nyɛ̃a nène.
6Lè fɔ̃fɔ̃ mèa, e mìɔ̃ nà gbà pònàse;
wètrɔ mèa, e yrɔ̀nà gbà puna.
7Ɛ̃ɛ, mi crɔ̃na lè àpo àdɔ̀mèze mè,
eye mi hũhũna lè àpo jìbibi be àdã mè.
8Miabe nuvuɛ̃wo lètè gã lè ŋùku mè na wò.
Àpo kɔ̀kɔ̀ɛa kɔ̀nà miabe bèbemè be ènuwo.
9Ɖo, ne wò bijìa, miabe àgbèzãwo jo nɔ̀nà yì yìwɔ̀.
Mi kpɔna miabe àgbèa vɔ̀nà sìgbè àseŋu kè wo kãa nène.
10Miabe Àgbènɔ̀zãwo le nyi èpè èkà takpo ciwo
àlo èkà èvè na àmè kèwo ŋuti ŋusɛ̃ gbà lèa.
Co àgbè dìdì mu nana ènu bu tovò lè èfũ ku dãgbã ŋuti ò.
Èpèwo va yìnà kaba eye mi mu gbà la nɔ̀ ànyi ò.
11Àmè kɛ ye jèsi àpo àdɔ̀mèzea be hɔ̃hlɔ̃?
E xɔ̀asì pɛpɛ sìgbè bùbu kè mi ɖo na wòa ke nène.
12Na ne mia nya àlekè miabe àgbènɔ̀zãwo kpòkpòe ɖoa.
Nène a miabe èjìwo la ɖɔ kudo ènunya.
13Tɔhonɔ̀, ne èjìbibi wòa gbà dìdì ɖekpekpe cã,
gbìgbɔ̀ trɔ kpɔ àpo sumɔ̃viawo gbɔ.
14Ɖɔ mi kudo àpo àdɔ̀mè nyuɛ̃ gbè sia gbè,
ne mia jɔ̀jì gbà haya lãmè miabe àgbèzãwo keŋu.
15Èpè fuwo ye wò dɔ̃ èto na mi eye gbledowo va mia ji.
Fifìa, trɔ wo sɔ wɔ̀ nyɔna na mi.
16Na àpo èdɔ nyuɛ̃wo ne ze na àpo sumɔ̃viwo
ne woabe èviwo la kpɔ àpo gogoa.
17Na Tɔhonɔ̀ miabe Mawu, àpo nyɔnaa ne nɔ̀ mia ji,
ne wòa likè miabe àlɔ̀nudɔwo na mi.
Ɛ̃ɛ, miabe àlɔ̀nudɔwo ne nɔ likè lè àlɔ̀mè na mi.
Currently Selected:
Èhàwo 90: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
