Èhàwo 103
103
Mawu nyi lɔ̃lɔ̃
1David tɔ̀.
Mù jro la do àkpe na Tɔhonɔ̀,
mù jro la do àkpe na Mawu kɔ̀kɔea so kaka èjì mè ke.
2Ɛ̃ɛ, mù jro la do àkpe na Tɔhonɔ̀
eye nyè mu la ŋlɔ̀be yebe ɖàgbè wɔ̀wɔ ɖekpe ò.
3Àmè kè sɔna nuvuɛ̃ nyèwo kpata kènà
eye e dànà èdɔ̀wo kpata na mù a.
4Àmè kè ɖè àpe àgbè to lè cɔ̃crɔ̃ mè
eye e sɔ hòmèfà lɔ̃lɔ̃ kudo màje sɔ cɔ̃ èta na mù.
5E nana mù ènu nyuɛ̃wo mù ɖùnà ɖɔnapò.
Ekèa nana àpe ɖèkajɛ mè
gbìgbɔ̀ wɔ̀nà yeye sìgbè èhɔ̃ tɔ̀ nène.
6Tɔhonɔ̀ wɔ̀nà ànùkua gbà
sònà jɔ̀jɔɛ na àmè mà-ɖo àmèwo.
7Tɔhonɔ̀ ɖè yebe èmɔ̃wo fiɔ Mosè
gbà ɖè yebe wɔ̀nawo fiɔ Izràɛlviwo.
8Tɔhonɔ̀ nyi ŋuzĩzĩ ɖèɖe gbà nyi màje ɖèɖe,
mu bina èjì veku-veku ò, e nyi hòmèfatɔ gã ɖe.
9Mu hɛ̃nà ènyà ku àmè gbè sia gbè ò,
mu wlana yebe àdɔ̀mèze ɖo èjì mè kaka sɔ yì ò.
10Mu wɔ̀nà kudo mi ɖo miabe vuɛ̃wo nu ò,
nènea ke mu dɔ̃nà èto na mi ɖo miabe àgɔ̀jèjewo ta ò.
11Ɖo sìgbè àlekè jiŋùkusi lè boo lè ànyigbã gbɔa,
nène sɔ̃ŋu yebe lɔ̃lɔ̃ lè na àmè kèwo dona bùbu e ŋutia.
12Sìgbè àlekè èwèzɛ̃pe dìdì lè èwèɖoxɔ̀pe gbɔa,
nène e ɖènà miabe àgɔ̀jèjewo joa yeŋu.
13Sìgbè àlekè ètɔ kuna ŋuzĩzĩ na èviawoa,
nène ye Tɔhonɔ̀ kuna ŋuzĩzĩ na àmè kèwo
dona bùbu e ŋutia yeŋu.
14E nya miabe ɖoɖomè,
e ɖonaŋù be èkɔ ye mi nyi.
15Àgbètɔ be àgbènɔ̀zã lè sìgbè ègbe nène;
e kènà see sìgbè zògbèji be èsepòpo nène.
16Eye ne àya pò to e jia, mu gbà nɔ̀nà ànyi ò,
eye wo mu gbà jènàsi yebe tèpea cã ò.
17Vɔ̀a, Tɔhonɔ̀ be àdɔ̀mè nyuɛ̃ lè sɔ yì mà-vɔ mè
na àmè kèwo ɖo bùbu na ɛ̀a.
E kpɔ̀tɔ̀ la nɔ wɔ̀ ànùkua kaka sɔ yì.
18Na àmè kèwo lenabè na yebe zòɖùɖua
eye wo le wɔ̀ ɖo yebe èsewo jia.
19Tɔhonɔ̀ li yebe fìɔzìkpea ɖo jiŋùkusi,
yebe fìɔɖùɖu ɖù ènuwo kpata ji.
20Mìa Tɔhonɔ̀ be àtikplɔtɔwo, mì do àkpe na Tɔhonɔ̀.
Mì wɔ̀nà ɖo yebe ègbèɖèɖewo ji ku ŋusɛ̃,
eye mì sènà ètonu na ɛ̀.
21Mìa Tɔhonɔ̀ be àhùakɔ̃wo, mì do àkpe na ɛ̀.
Mìa yebe sumɔ̃vi kèwo sumɔna ɛ̀a.
22Mìa Tɔhonɔ̀ be àlɔ̀nudɔwo kpata,
mì do àkpe na Tɔhonɔ̀ lè yebe jiɖùpewo kpata.
Eye nyè cã mù la do àkpe na Tɔhonɔ̀.
Currently Selected:
Èhàwo 103: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
