Èhàwo 102
102
Ŋùɖo lè vevesèse be gàmè
1Ènuwɔ̀donɔ̀ kè ŋusɛ̃ vɔ̀ na a be kuefã. E sɔ yebe èhùɛjèje ɖo ŋùkumè na Tɔhonɔ̀.
2Tɔhonɔ̀, ɖo èto àpe kuefã,
ne wòa na àpa dodo nyèa ne sù gbɔ wò.
3Mù gbà wla àpo ŋùkumè do mù lè èfũ zã nyèwo mè ò.
Pu èto ànyi ɖo ŋuti nyè, tɔ̀ na mù kaba lè àzã kè gbè mù la fã yɔ wòa.
4Ɖo àzã nyèwo nu va le yì sìgbè àzìzɔ nène.
Eye àpe èpuwo le fiɔ̃ sìgbè ènu kè èzò fiɔ̃a nène.
5Èjì nyè yrɔ̀, gbà pu sìgbè ègbe nène.
Ekèa na be mù ŋlɔ̀nabe ènu ɖùɖu cã.
6Mù le ŋɛ̃ kaka be èpu nyèwo
ku àgbàzea kpò ye kpɔ̀tɔ̀.
7Mù lè sìgbè àluge nène lè zògbè ji,
mù gbà ɖì àzexe lè àxue kè gbãa mè.
8Mù ci ŋùzɔ̃, eye mù lè sìgbè xèvi
kè ci àkòŋùgò lè èxɔ̀ taa nène.
9Àpe kɛ̃tɔwo le dovlo mù tɛ̀gbɛ̀.
Wo sitè ɖo ŋuti nyè eye wo le sɛ̃kpɛ̃ na mù màjìjɔ.
10Hũhũ ye nyi àblo kè mù le ɖù,
eye àɖàsì nyèa ye trɔ zũ èsì nùnu na mù.
11Ɖo Tɔhonɔ̀, wò bijì do mù,
àpo àdɔ̀mèzea dà mù ɖo àzɔ̀ge boo.
12Àgbè ŋùkèkè nyèwo le yì
sìgbè vɔ̃vɔ̃lì kè le ɖo èxɔ̀a nène,
eye mù jo pu sìgbè ègbe nène.
13Vɔ̀a, èwò Tɔhonɔ̀ ye nyi èfìɔ tɛ̀gbɛ̀
eye ŋùɖo wòa lè kaka sɔ yì.
14Ɛ̃ɛ wò la so, la ku ŋuzĩzĩ na Yèruzàlɛm, ɖo àzãa sù vɔ̀.
Nyàwo, ɖàgbè kè wò la wɔ̀ na ɛ̀a be àzã sù.
15Ɖo àpo sumɔ̃viawo lɔ̃nà èkpewo.
Woabe hũhũa ŋutɔ cã vena na wo.
16Eye Tɔhonɔ̀ be nyikɔ la ɖo vɔ̃vɔ̃ na dùkɔ̃wo
eye èfìɔwo la ɖo sìsi na àpo gogoa.
17Ne Tɔhonɔ̀ gbìgbɔ̀ tù Ziɔ̀n be èdùa,
e la ɖè yebe gogoa fiɔ.
18E la le ŋùku ɖo ènuwɔ̀donɔ̀ be kuefã ŋuti,
eye mu la ɖèkɔ̀ lè yebe biɔbiɔwo ŋuti ò.
19Wo la ŋlɔ̀ ekèa dà ɖɛ na ŋùgbesitɔwo
eye àmè kèwo la va jɔ̀ a la kafu Tɔhonɔ̀.
20Ɖo e kpɔnu so yebe àxue kɔ̀kɔ̀ɛ be cicria mè;
Tɔhonɔ̀ ɖèkɔ̀ kpɔ ànyigbã so jiŋùkusi.
21Sɔ sè gàmènɔ̀tɔwo be ŋɛ̃ŋɛ̃,
ne bèa ɖè ègà àmè kèwo lè èku mèa.
22Eye wo la kafu Tɔhonɔ̀ be nyikɔ lè Ziɔ̀n,
wo la jì kafu-hawo lè Yèruzàlɛm.
23Wàlɛbɛ ŋuã dùkɔ̃wo kudo
fìɔduwo kpata la bɔ̀ ɖodu sɔ sɛ̃ Tɔhonɔ̀.
24Tɔhonɔ̀ sòkà lè lãmè na mù lè àgbè mɔa ji;
e ɖè àpe àgbèzãwo ji kpɔ̀tɔ̀.
25Ekèa ŋuti ye mù gblɔ̃ be:
“Mawu, mù gbà xɔ̀ àgbèa lè àsi nyè kaba ò;
èwò kè lè na àkɔwo kpata kpataa!”
26So blèmà blèmà ye wò li ànyigbã be dodoe,
eye jiŋùkusi nyi àpo àlɔ̀nudɔ.
27Wo la va yì, vɔ̀ èwò ya, wò la nɔ̀ ànyi tɛ̀gbɛ̀.
Jiŋùkusi kudo ànyigbã la doxo sìgbè àvɔ nène.
Wo la dɔ̀lì wo sìgbè àwù nène,
eye wo mu la gbà nɔ̀ ànyi ò.
28Sĩ vɔ̀a, lekè wò lèa kpò wò kpɔ̀tɔ̀ lè
eye àpo àgbèa mu ɖo vɔ̀vɔnu ò.
29Àpo sumɔ̃viwo be jìjimèwo la nɔ̀ ànyi,
eye woabe nukuwo la likè goŋu lè àpo ŋùkumè.
Currently Selected:
Èhàwo 102: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
