Èhàwo 104
104
Ènuɖoɖowo kpata be Ɖotɔ
1Do àkpe na Tɔhonɔ̀, Oò! Èkla nyè.
Tɔhonɔ̀ Mawu nyè, wò lòlò ŋutɔ.
Wò sɔ bùbu ku nyiɖìɖi sɔ wɔ̀ àwù do.
2Wò sɔ kɔ̀kɔ̀ɛ sɔ wɔ̀ àvɔ cɔ̃.
Eye wò vlũ jiŋùkusi sìgbè èxɔ̀gbàdenu nène.
3Wò ɖo nɔ̀pe wòa ɖo lilikpowo be èta mè boo.
Wò sɔ lilikpo sɔ wɔ̀ àhùakèkevi,
eye wò sɔ àya sɔ wɔ̀ àwàda kèwo wò sɔ zrònà.
4Àyawo nyi àpo àmèdɔ̃dɔ̃wo,
eye èzò be àɖewo nyi àpo sumɔ̃viwo.
5Wò li ànyigbã ɖo yebe dodoewo ji
eye mu la hũhũ kpɔ ò.
6Wò sɔ èsì cɔ̃ e ji sìgbè àvɔ nène,
eye èsìa yì ji wu ètowo cã.
7Vɔ̀ e sina lè àpo àmè jizĩzĩ be ŋùmèkãkã mè.
E miɔ̃ hũi lè àpo èji be ègbèɖèɖe nu.
8Eye e lia ètowo, gbà ɖiɖi jè bàlìwo mè
kaka yì kɔ̀ ɖo fikè wò ɖo be bèa yì nɔ̀a.
9Wò wɔ̀ lipò kè èsìwo mu la gbà fla gbèɖe òa na ɛ̀.
Nène a, mu la gbà va gbã kaka la xɔ̀ ànyigbã ji ke ò.
10Wò ta èmɔ̃ na èsìwo so kaka woabe jɔ̀sope yì èsì sàsrawo mè.
Eye wo srànà to ètowo dòmè.
11Gbemèlãwo kpata kpɔna èsì nùnà lè woa mè.
Ègbemè be èsɔ àkɛtɛwo be ètù fana lè woabe sìkɔtìamèwo nu.
12Woawo to ye àyamè xèviwo wɔ̀nà woabe àtɔ̃wo ɖo,
nɔ jì èhà lè àti be àlɔ̀zɛ̃wo mè.
13So kaka jiŋùkusi ye wò na èsì jànà kɔ̀ ɖo ètowo ji.
Wò lena ŋùku ɖo e ŋuti ne èsì bèa sù ànyigbã.
14Wò nana ègbe mìɔ̃ nà na èlãwo
kudo gbekuiwo na àgbètɔ be zãzãwo.
Nène a ye ànyigbã nana ènuɖùɖu vòvòvòwo.
15Vɛ̃ nana àgbètɔ be èjì hayana,
eye yebe ŋùmè wɔ̀nà wɛwlɛ sìgbè àmì kè le sràa nène.
Eye ènuɖùɖuwo ya nana ŋusɛ̃ àmè.
16Tɔhonɔ̀ be àtiwo ɖɔ kudo èsì vivi,
Libàn be sedàti kèwo wò do a.
17Funu ye xèviwo wɔ̀nà àtɔ̃ ɖo,
eye èglò sɔna èkpo be sedàtiwo mè wɔ̀nà nɔ̀pe.
18Èto gãgãwo nyi ègbɔ-dɔ̃-ètewo be tabèpe,
eye àkpã totrowo nyi àgbògbò na wɛ̀tɛ̀klɛ̀wo.
19Tɔhonɔ̀ wɔ̀ wètri sɔ do mamã hùenuwo dòmè
eye wò na èwè nya yebe èxɔ̀ɖoɖo be gàmè.
20Wò ɖo vìvìti, e ye le nyi èzãdodo,
kè mè gbemèlãwo kpata ɖìnàsà lè.
21Eye jãŋùtaviwo kpata gbona lè, sɔ jina ènu kè wo la lea.
Wo biɔna woabe ɖùɖua so Mawu simè.
22Eye ne èŋù kèa, wo bɔ̀nà woa nɔ̀nɔwo,
yì mlɔ̃na ànyi lè woabe èdowo mè.
23Àgbètɔwo to yìnà woabe èdɔwɔ̀wɔwo gbe,
eye wo yì jènà àgbàgba kaka ɖo wètrɔ mè.
24Tɔhonɔ̀, wò wɔ̀ èdɔ jiŋɔ sùgbɔ!
Wò wɔ̀ woa kpata ku ènunya.
Ànyigbã ji ɖɔ kudo àpo ènu nyuɛ̃ kèawo.
25Àpùa cã yeŋuã. E kèkè gbàjà gbà wɔ̀ ègũ.
Èlã wiwli ku gãgã èdòmàlè-ŋutiwo blìbɔ̀nà lè e mè.
26Àpùjihũwo zɔ̃nà e ji yìnà, Blòsò kè wò ɖo,
be bèa nɔ jròwoe lè e mèa, lè funu.
27Ekèawo kpata le kpɔ àsi wò nu
ne wòa na wo nuɖùɖu ɖo àmè hùenu.
28Ne wò kè àpo àlɔ̀a, wò nana wo ènu nyuɛ̃wo
eye wo ɖùnà, ɖɔnapò.
29Ne wò wla àpo ŋùmè do woa, wo cina siayi;
ne wò xɔ̀ gbɔ̃gbɔ̃a lè woa sia, wo kuna
eye wo trɔna ɖiɖɔɛ, yìnà ànyigbã mè.
30Ne wò trɔ na wo gbɔ̃gbɔ̃a, wo gbɔ̀nà àgbè;
eye wò gbìgbɔ̀ wɔ̀nà ànyigbã be ŋùkumè yeye.
31Tɔhonɔ̀ be gogo ne nɔ̀ ànyi kaka sɔyì!
Tɔhonɔ̀ ne jɔ̀jì ɖo yebe èdɔwo ŋuti.
32Ne wò ɖèkɔ̀ kpɔ ànyigbã a, e hũhũna;
eye ne wò tɔ àsi ètowo kpòa, wo tùnà àzìzɔ.
33Mù la jì èhà na Tɔhonɔ̀ kaka kè mù lè àgbèa.
Mù la jì kafu-ha na Mawu nyè, kè mù gbe lè àgbè kpòa.
34Na ne àpe susuwo ne nɔ jè ŋùmè na wò, Tɔhonɔ̀.
Mù le jɔ̀jì ɖo Mawu nyè ŋuti.
35Na ne ènu bàɖàwɔ̀tɔwo ne crɔ̃ lè ànyigbã ji
eye àmènyrãkuwo mu gbà nɔ̀ ànyi ɖe ò.
Ɛ̃ɛ, mù le do àkpe na Tɔhonɔ̀.
Mì kafu Tɔhonɔ̀!
Currently Selected:
Èhàwo 104: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
