Màteo 18
18
Àmè kè nyi àmègã lè Mawu be fìɔdua mèa
(Mrk 9.33-37; Luk 9.46-48)
1Gà ŋua mèa, Yesù be nukplaviwo va e gbɔ, biɔ ɛ̀ be: “Àmè kɛ ye nyi àmègã lè Mawu be fìɔdua mè ò?” 2Yesù yɔ ɖèvi ɖe, sɔ ɛ̀ ɖo tè lè woa dòmè, 3gblɔ̃ na wo be: “Nyàwo mù le to na mì, ne mì mu ɖɔ̀lì èdɛ̃, nɔ̀ sìgbè ɖèviwo nène òa, mì mu la ɖo Mawu be fìɔdua mè ò. 4Ye ŋutia àmè ɖekpekpe kè la bɔ̀bɔ̀ ye ɖokoe sìgbè ɖèvi kèa nènea, nènemea ye la nyi àmègã lè Mawu be fìɔdua mè. 5Eye àmè kè la xɔ̀ vifɛ̃ kèa hati ɖèka, lè àpe nyikɔ mèa, ènyè ŋutɔ ye be xɔ̀.”
Àfɔ̀ ɖo àfɔ̀ ji na àmè
(Mrk 9.42-48; Luk 17.1-2)
6“Vɔ̀a, àmè ɖekpekpe kè la dɔ̃ ɖèvi kèwo xɔ̀ ji nyè sèawo dòmètɔ ɖe la wɔ̀ ènuvuɛ̃a, ne wo sɔ ète gã ɖe bla ɖo èkɔ̀ na ɛ̀, sɔ ɛ̀ dãŋùgbe ɖo àpù be gũ mè cã a, e la nyɔ na ɛ̀ wu. 7Hèlu na xixea ɖo yebe àfɔ̀klɛ̃nuwo ŋuti! Nyàwo, ènuvuɛ̃ ɖo la jɔ̀; vɔ̀a, hèlu na àmè kè ji ènuvuɛ̃ la to va xixea mèa. 8Ne àpo àlɔ̀, àlo àpo àfɔ̀ dɔ̃nà wò ɖo ènuvuɛ̃ mèa, sò wo dãŋùgbe. E la nyɔ na wò be wòa ɖo àgbè jɔ̀ àgbè a mè ku àlɔ̀ sòso, àlo àfɔ̀ sòso, wu ne wòa ɖo àlɔ̀ èvè, àlo àfɔ̀ èvè, vɔ̀a, woa sɔ wò dãŋùgbe ɖo èzò màvɔa mè. 9Eye ne àpo ŋùkuvi la dɔ̃ wò ɖo ènuvuɛ̃ mèa, hɔ̃ ɛ̀ dãŋùgbe; ɖo e la nyɔ na wò be wòa ɖo àgbè màvɔ mè ku ŋùkuvi ɖèka, wu be wòa ɖo ŋùkuvi èvè, vɔ̀a, woa sɔ wò dãŋùgbe ɖo èzò màvɔ mè.”
Èlododo so àlɛ̃ kè bua ŋuti
(Luk 15.3-7)
10“Mì kpɔ nyuɛ̃ ɖe, ne mì mu gbà crì ɖèvi kèawo dòmètɔ ɖe ò, ɖo mù le to na mì be, woabe àtikplɔtɔwo lè jiŋùkusi, le Ètɔ nyè kè lè jiŋùkusia be ŋùmè tɛ̀gbɛ̀. [ 11Đo, *Àgbètɔ be Èvia, va ne bèa ji, eye bèa hlùɛ̃ àmè kèwo buawo gã.]”
12“Nukɛ ye mì kpɔ so ènyà kèa ŋuti ò? Ne àmè ɖe ɖo àlɛ̃ èkà èvè takpo eye ɖèka bu lè woa dòmèa, mu la tàsi ɖèka to lè èkà èvè takpoa mè ɖo ètoa ji, la yì ji ɖèka kè bua òa? 13Eye, ne e kpɔ ɛ̀ nyàwo a, mù le to na mì be e la kpɔ jìjɔɛ ɖo àlɛ̃ ɖèka ŋua ŋuti, wu ɖèka to lè èkà èvè takpo kèwo mu bu òa ŋuti. 14Mìa Tɔ kè lè jiŋùkusia cã mu jro be ɖèvi kèawo dòmètɔ ɖèka ne crɔ̃ ò.”
Sɔ àgɔ̀ kè nɔ̀vi wò
15“Ne nɔ̀vi wò jè àgɔ̀ do wòa, yì ɖè àgɔ̀a fiɔ ɛ̀ ne bèa nɔ̀ èwò ku ì dòmè kpò. Ne e ɖo èto wòa, wò la hlùɛ̃ nɔ̀vi wòa gã. 16Vɔ̀a ne mu ɖo èto wò òa, kplɔ̀ àmè ɖèka àlo èvè buwo bɔ̀ ɖo ɖokoe wò ŋuti, ne, lè ɖàsèfo èvè, àlo ɖàsèfo ètɔ̃ dòmèa, woa ɖo èkpe ènyà sia ènyà ji. 17Ne mu ɖo èto wo òa, to e na èhabɔ̀bɔa; vɔ̀a, ne mu ɖo èto èhabɔ̀bɔa cã òa, ne nɔ̀ na wò sìgbè àgbàlè, àlo èdɛ̃jɔ̀tɔ nène, sìgbè àlekè ŋɔ̀ŋlɔ̃ a gblɔ̃ ɛ̀a nène.”
18“Nyàwo mù le to na mì, ènu ɖekpekpe kè mì la bla lè ànyigbã jia, wo la bla ɛ̀ lè Mawu be fìɔdua mè, eye ènu ɖekpekpe kè mì la tu lè ànyigbã jia, wo la tu ì lè Mawu be fìɔdua mè.”
19“Mù gbà le to na mì be, ne àmè èvè lè mìa dòmè, bɔ̀ ɖo du lè ànyigbã ji, biɔ ènu ɖekpekpea, Ètɔ nyè kè lè jiŋùkusia, la wɔ̀ ɛ̀ na mì. 20Đo àfi kè àmè èvè àlo àmè ètɔ̃ bɔ̀ ɖo du lè nyikɔ nyè mèa, mù lè woa dòmè.”
Sɔsɔkè lè nɔ̀viwo dòmè
21Wàlɛbɛ ŋua, Petrò va Yesù gbɔ, biɔ ɛ̀ be: “Àpetɔ, ne nɔ̀vi nyè jè àgɔ̀ do mùa, zè nenè mù la sɔ kè ò? Zè adrɛ̃ a?” 22Yesù ɖoeŋuti na ɛ̀ be: “Nyè mu le to na wò be zè adrɛ̃ kpò ò, vɔ̀a, èkà takpo ci èwo tèpe adrɛ̃. 23Ye ŋutia, wo teŋu sɔ Mawu be èfìɔɖùɖua sɔ̀ ku èfìɔ ɖe kè le ji la hlɛ̃ ènu kèwo be sɔ do àsi na yebe èdɔwɔ̀tɔwoa. 24Kè be tɔ ènuawo hɛ̃hlɛ̃a, wo kplɔ̀ àmè ɖe kè ɖù èfɛ̃ sùgbɔ do èa, va e gbɔ. 25Vɔ̀a, ekè ènu ɖekpe mu lè e si ne bèa sɔ tu èfɛ̃a na ɛ̀ òa, àpetɔa ɖè ègbè be, wo ne sà ye ku èsrɔ̃a, kudo èviawo, gbàkudo ènu kèwo keŋu lè e siawo, sɔ tu èfɛ̃a. 26Vɔ̀a, sumɔ̃vi kèa jè èklò lè àpetɔa be ŋùkɔ̀, blìbɔ̀ na ɛ̀, gblɔ̃ be: 'Àpetɔ, gbɔ̃ èji ɖɛ na mù blɛ̀wù, mù la tu èfɛ̃a keŋu na wò.' 27Dèvi kèa be àpetɔ ku ŋuzĩzĩ na ɛ̀. E tàsi ì, eye be sɔ èfɛ̃ kè be ɖùa kpata kè è. 28Ekè sumɔ̃vi kèa to lè èfìɔa be àxomè va le yìa, e dogò yebe èhavi ɖèka ekè ɖù èfɛ̃ vi ɖe kpò do èa, lè èmɔ ji. E jè e ji, le ève na ɛ̀ be: 'Tu èfɛ̃ kè wò ɖù do mùa na mù.' 29Yebe èhavia jè èklò lè ŋùkɔ̀ na ɛ̀, ɖè kuku na ɛ̀ be: 'Gbɔ̃ èji ɖɛ na mù blɛ̀wù, mù la tu èfɛ̃a na wò.' 30Vɔ̀a, e gbe, sɔ èhavia yì do-gà ne bèa nɔ̀ funu kaka sɔ na gà kè mè e la tu èfɛ̃ kè be ɖùa. 31Ŋusùa be èhavi ɖewo kpɔ ènu kè jɔ̀ a kpata eye e nyrã ŋùmè na wo ŋutɔ, eye wo yì gblɔ̃ ènu kè jɔ̀ a kpata na woabe àpetɔa. 32Kè èfìɔa sè a, e dɔ̃ àmè ɖoɖa be woa yì yɔ ɛ̀ va na yè. Kè wo yɔ ɛ̀ vaa, e gblɔ̃ na ɛ̀ be: 'Èwò sumɔ̃vi vuɛ̃ kèa, mù sɔ èfɛ̃ kè wò ɖù do mùa kè wò, ɖo wò fãkue na mù. 33Mu jè be, wò cã wòa ku ŋuzĩzĩ na èhavi wò, sìgbè àlekè mù ku ŋuzĩzĩ na wòa nène òa?' 34Eye àpetɔa bijì, yì sɔ ɛ̀ do ègàkpa mè, ne woa do àyà na ɛ̀, kaka na gà kè mè be la tu èfɛ̃ kè be ɖùa kpata.”
35“Nènea ke ye Ètɔ nyè kè lè jiŋùkusia la wɔ̀ ku mìa cã, ne mìa dòmètɔ ɖe mu sɔ kè nɔ̀via so kaka èjìmè òa.”
Mina Bible © Bible Society of Togo, 2014.