Màteo 19
19
Yesù fiɔ ènu so èsrɔ̃ gbegbe ŋuti
(Mrk 10.1-12)
1Kè Yesù gblɔ̃ ènyà kèawo vɔ̀a, e jo lè Galilea, va yì Yudeà be àgowo ji, lè Yɔrdàn godo. 2Àmèha gã ɖe kpàsà ɛ̀ do, eye be dà èdɔ̀ na wo. 3Farizìwo cã va e gbɔ. Ne woa sɔ tè è kpɔa, wo gblɔ̃ na ɛ̀ be: “E sɔ̀gbè be ŋusù bèa gbe èsrɔ̃a ɖo ènyà ɖekpekpe ŋuti kpòa?” 4Yesù ɖoeŋuti be: “Mì mu hlɛ̃ ènu kè wo ŋlɔ̀ ɖo mawunya xoma a mè òa? 'So gɔ̃mèjèjea, Mawu kè ɖo àgbètɔa, wɔ̀ wo àsu ku àsì.' 5Eye Mawu gblɔ̃ be: ekèa ŋuti ye, ŋusù la jo lè ètɔa ku ènɔa gbɔ, la tɛ ɖo èsrɔ̃a ŋuti, eye wo àmè èvèawo la nyi ŋutilã ɖèka. 6Eŋuãa, wo mu gbà nyi èvè ò, vɔ̀a ŋutilã ɖèka. Ye ŋutia, àgbètɔ mu gbà klã ènu kè Mawu caa ò.” 7Farizìwo biɔ Yesù be: “Nukɛ ŋuti ye Mosè na ègbè be woa na gbegbe be xoma nyɔ̃nù, sɔ ɖè àsi lè e ŋuti ò?” 8Yesù gblɔ̃ na wo be: “Mìabe èjì tìtri ŋuti ye Mosè na mì ègbè be mìa ɖè àsi lè mìa srɔ̃wo ŋuti. Vɔ̀a, mu nyi nène so gà kè mè Mawu ɖo xixea ò. 9Mù le to na mì be, ne ŋusù ɖe gbe èsrɔ̃aa — ne mu nyi be nyɔ̃nùa do àfɔ̀ ègbe òa — ye be ɖè nyɔ̃nù bua, e wɔ̀ *àhasì.”
10Yesù be nukplaviwo gblɔ̃ na ɛ̀ be: “Ne ŋusù be ènyà la nyi nène ku èsrɔ̃aa, ne wo dokpò èsrɔ̃ ɖèɖea, e nyɔ wu.” 11Yesù ɖoeŋuti na wo be: “Mu nyi àmè sia àmè ye xɔ̀nà ènyà kèa ò, vɔ̀ bòhũa, àmè kèwo Mawu na yebe àcɛ̀a kpò wo ye xɔ̀nà ɛ̀. 12Đo *kobonɔ̀ ɖewo lè, ekèwo wo jì nènea, so woa nɔ̀wo be àdɔ̀mè. Kobonɔ̀#19.12 Kobonɔ̀: àmè kè wo taa àlo wo ɖè nɛkuwo na a. ɖewo lè, ekèwo àgbètɔwo ɖoa, eye àmè ɖewo le wɔ̀ woa ɖokoewo *kobonɔ̀, ɖo Mawu be èfìɔɖùɖua ŋuti. Àmè kè teŋu ŋɔjè e mèa, ne ŋɔjè e mè.”
Yesù tusì na ɖèviwo
(Mrk 10.13-16; Luk 18.15-17)
13E yomèa, wo kplɔ̀ ɖèviwo va Yesù gbɔ, be, bèa ɖo àsi woa ji, ne bèa fãkue ɖo woa ta. Vɔ̀a yebe nukplaviwo wɔ̀ àdã do wo. 14Yesù gblɔ̃ be: “Mì na èmɔ ɖèviwo ne woa va gbɔ nyè, mì mu gbà xe èmɔ na wo ò, ɖo àmè kèwo lè sìgbè woawo nèneawo tɔ̀ ye nyi Mawu be fìɔdua.” 15Kè Yesù sɔ yebe àlɔ̀ ɖo ɖèviawo ji vɔ̀a, e jo lè funua.
Đèkajɛ àdɔ̀kùnɔ̀ a
(Mrk 10.17-31; Luk 18.18-30)
16Eye kpɔɖa, ŋusù ɖe va Yesù gbɔ, biɔ ɛ̀ be: “Ènufiɔtɔ, ènu nyuɛ̃ kɛ ye mù la wɔ̀ ne ma ɖo àgbè màvɔa ò?” 17Yesù ɖoeŋuti na ɛ̀ be: “Nukɛ ŋuti ye wò le biɔ mù ènyà so ènu kè nyɔa ŋuti ò? Àmè ɖèka kpò ye nyi àmè nyuɛ̃, vɔ̀ ne wò jro la ɖo àgbè màvɔa mèa, wɔ̀ ɖo èseawo ji.” 18E gblɔ̃ na Yesù be: “Ekɛwo ò?” Yesù ɖoeŋuti be: “Mù gbà wù àmè ò. Mù gbà wɔ̀ *àhasì ò. Mù gbà fìfĩ ò. Mù gbà ɖù àjè ɖase ò. 19Bù ètɔ wò ku ènɔ̀ wò. Mɛmlɛ̃a, lɔ̃ èha wòvi sìgbè wò ŋutɔ ke nène.” 20Đèkajɛ a gblɔ̃ na ɛ̀ be: “Mù wɔ̀nà ɖo *èse kèawo keŋu ji, nukɛ ye gbà kpɔ̀tɔ̀ na mù ne ma wɔ̀ ò?” 21Yesù gblɔ̃ na ɛ̀ be: “Ne wò jro la ɖù bliboa, yì ne wòa sà ènu kèwo lè àsi wòa kpata, ne wòa ma ègàa na wɔ̀amènɔ̀wo, eye, wò la ɖo àdɔ̀kùnu lè jiŋùkusi; e yomèa, va ne wòa jè yo nyè mè.” 22Vɔ̀a, ekè ɖèkajɛ a sè ènyà kèa, e trɔjo ku àkpɔ̃ ɖèɖe, ɖo àdɔ̀kùnu sùgbɔ lè e si.
23Eye Yesù gblɔ̃ na yebe nukplaviwo be: “Nyàwo ye mù le to na mì be, e la sɛ̃ŋu na àdɔ̀kùnɔ̀ ŋutɔ, ne bèa ɖo Mawu be fìɔdua mè. 24Eye mù gbà le to na mì be, e la nɔ̀ bɔ̀bɔɛ ɖe na èsɔ-kponɔ̀ ne bèa to àbùi be dòmè, wu be àdɔ̀kùnɔ̀ bèa ɖo Mawu be fìɔdua mè.” 25Kè Yesù be nukplaviawo sè ènyà kèawoa, e kpaca wo ŋutɔ, eye wo gblɔ̃ be: “Ne e nyi nènea, àmè kɛ ŋutɔ koŋu ye la teŋu gã ò?” 26Yesù kpɔ wo dũu, eye be gblɔ̃ be: “Àgbètɔwo ye ènu kèa glo, vɔ̀a, Mawu ya teŋu wɔ̀ ènuwo kpata.” 27Wàlɛbɛ ŋua Petrò gblɔ̃ na Yesù be: “Miawo yaa, mi tàsi ènuwo keŋu ɖɛ, eye mi kpàsà wò do. Àleke ye be la va nyi na mi ɖo ò?” 28Yesù ɖoeŋuti na ɛ̀ be: “Nyàwo mù le to na mì be, wàlɛbɛ kè *Àgbètɔ be Èvia la va nɔ̀ ànyi lè yebe gogo be èfìɔzìkpea ji, lè xixe yeyea mèa, mì àmè kèwo kpàsà mù doawo, cã, mì la nɔ̀ ànyi lè èfìɔzìkpe woèvè ji, eye mì la ɖo kòjo na Izràɛl be kɔ̀ta woèvèawo. 29Eye àmè sia àmè kè tàsi àxuewo, àlo nɔ̀vi ŋusùwo, àlo nɔ̀vi nyɔ̃nùwo, àlo ètɔ, àlo ènɔ̀, àlo èviwo, àlo àgblèwo ɖɛ, ɖo nyikɔ nyè ŋutia, la xɔ̀ ɖo e tèpe fuu, eye be la ɖù àgbè màvɔ be ècrɔ̃. 30Eye àmè fuu kèwo nyi ŋùkɔ̀gbetɔawo la nyi ŋùgbesiwo, eye ŋùgbesiawo la nyi ŋùkɔ̀gbetɔwo.”
Mina Bible © Bible Society of Togo, 2014.