Màteo 17
17
Yesù be kpɔkpɔmè trɔ
(Mrk 9.2-13; Luk 9.28-36)
1Lè ŋùkèkè àdɛ̃ yomèa, Yesù kplɔ̀ Petrò, Yakobò ku Yakobò be nɔ̀vi Yòhanɛ̀s bɔ̀ ɖo ye ɖokoe ŋuti, eye wo yì èto gã ɖe ji, lè àsà mè. 2Yesù be kpɔkpɔmè ɖɔ̀lì lè woabe ŋùmè, eye yebe ŋùkumè le klɛ̃ sìgbè èwè nène. Yebe àwùwo cã ɣe peŋu-peŋu, le dàzò. 3Mosè ku Èli ze ɖo woa ji, le pò nupo ku Yesù. 4Eye Petrò gblɔ̃ na Yesù be: “Àpetɔ, e nyɔ be mia nɔ̀ fikèa. Ne wò jro a, mù la tù gòxɔ ètɔ̃ ɖo fikèa, ɖèka la nyi tɔ̀ wò, ɖèka la nyi Mosè tɔ̀, eye ɖèka la nyi Èli tɔ̀.” 5Wàlɛbɛ kè be kpɔ̀tɔ̀ le pò nupoa, kpɔɖa, lili ŋàŋlà ɖe va cɔ̃ woa ji, eye ègbè ɖe ɖì so lilia mè le gblɔ̃ be: “Àmè kèa ye nyi èvi nyè ɖève a, ekè e jro mù be ma cã a; mì ɖo èto è.” 6Kè nukplaviawo sè ègbèa, vɔ̃vɔ̃ gã ɖe jè woa ji, eye wo cɔ̃ ŋùkumè ànyi. 7Yesù gogo wo, sɔ àlɔ̀ ɖo woa ji, gblɔ̃ na wo be: “Mì sitè, mì mu gbà vɔ̃ ò.” 8Eye ekè wo kɔ ŋùkumè yì jia, wo mu gbà kpɔ àmè bu sɔ wu Yesù ò. 9Wàlɛbɛ kè wo le ɖì so ètoa ji gbãnà a, Yesù do *èse kèa na wo be: “Mì mu gbà to ènu kè mì kpɔa na àmè ɖe, kaka va na gà kè mè *Àgbètɔ be Èvia la fɔ̃ so èku ò.”
10E yomèa, yebe nukplaviwo biɔ ɛ̀ be: “Nukɛ ŋuti ye èsefiɔtɔwo gblɔ̃nà be, Èli ye la va gbɔ̀xue ò?” 11Yesù ɖoeŋuti na wo be: “Nyàwo, Èli ye la va, eye e la gbìgbɔ̀ sɔ ènuwo keŋu ɖo woa tèpe. 12Vɔ̀a, nyè yaa, mù le to na mì be, Èli va, vɔ̀a, wo kpɔ ɛ̀, gãke wo mu kpɔ ɛ̀ jèsi ò. Eye, wo wɔ̀ ènu kè wo jro a ku ì, nènea ke ye *Àgbètɔ be Èvia cã la kpe èfũ lè woa si mèa yeŋu.” 13Wàlɛbɛ ŋua ye nukplaviawo ŋɔjè e mè be, Yòhanɛ̀s Mawusilènamètɔa be ènyà ye be le gblɔ̃ na yèwo.
Yesù dà èdɔ̀ na àdigbò-kutɔ ɖe
(Mrk 9.14-29; Luk 9.37-43)
14Kè wo va àfi kè àmèhaa lèa, ŋusù ɖe va Yesù gbɔ, jè èklò lè yebe ŋùkɔ̀, gblɔ̃ na ɛ̀ be: 15“Àpetɔ, ku ŋuzĩzĩ na èvi nyè ŋusùa, ɖo àdigbò-kutɔ ye be nyi, e le sè lãmève sùgbɔ, ɖo eji-ejia, e jènà èzò mè, jènà ètɔ̀ mè cã. 16Mù kplɔ̀ ɛ̀ va àpo nukplaviwo gbɔ, vɔ̀a wo mu teŋu dà èdɔ̀a na ɛ̀ ò.” 17Eye Yesù ɖoeŋuti be: “Jìjimè màɖo xɔ̀sè gbegble, kaka va na gà kɛ mè ye mù la nɔ̀ ku mì ò? Kaka va na gà kɛ mè ye mù la gbà dojì la nɔ hɛ̃ mì ò? Mì kplɔ̀ ɖèvia va na mù lè fikèa.” 18Wo kplɔ̀ dɔ̀nɔ̀a va Yesù gbɔ, eye e ɖè ègbè ɖo gbɔ̃gbɔ̃ vuɛ̃ a ji, eye gbɔ̃gbɔ̃ vuɛ̃ a to lè ɖèvia mè, eye e gã so gà ŋua mè ke. 19Eŋuã yomèa, nukplaviawo va yì Yesù gbɔ lè àsà mè, biɔ ɛ̀ be: “Nukɛ ŋuti, miawo yaa, mi mu teŋu nyà ɛ̀ to ò?” 20Eye Yesù ɖoeŋuti na wo be: “Xɔ̀sè vi tukui kè mì ɖoa ŋuti ye; ɖo nyàwo mù le to na mì be: ne mì ɖo xɔ̀sè kè gbà hùe sìgbè lokòku nène cã a, mì teŋu to na èto kèa be: 'Jo lè fikèa, yì nɔ̀ funu', eye e la jo, eye ènu ɖekpekpe mu la glo mì ò. [21Vɔ̀a, gbɔ̃gbɔ̃ vuɛ̃ kèawo hatia, kuefã ku ènubabla ye wo sɔ ɖùnà woa ji.]”
Yesù gbà pò nupo so àyàɖùɖu ku fɔ̃fɔ̃ so èku ŋuti
(Mrk 9.30-32; Luk 9.43b-45)
22Yesù ku yebe nukplaviwo bɔ̀ lè Galilea. E gblɔ̃ na wo be: “Wo la va sɔ Àgbètɔ be Èvia do àsi na àmèwo, 23eye, wo la wù ì. Vɔ̀a, lè ŋùkèkè ètɔ̃gɔ̃a gbèa, Mawu la fɔ̃ ɛ̀ so èku.” Eye àkpɔ̃ ɖɔ wo ŋutɔ.
Yesù ku Petrò na ètaci
24Kè Yesù ku yebe nukplaviwo va Kapɛrnaum-a, àmè kèwo jɔ̀nà mawuxɔa be ètaciawo va Petrò gbɔ, biɔ ɛ̀ be: “Mìabe ènufiɔtɔ ya mu tuna mawuxɔa be ètaci òa?” 25E gblɔ̃ be: “Ɛ̃ɛ.” Eye ekè e ɖo àxomèa, Yesù jè ŋùkɔ̀ gblɔ̃ be: “Àleke wò le susu ɖo ò, Simɔ̀n? Àmè kɛwo si ye ànyigbã be èfìɔwo jɔ̀nà ètaci àlo èdɛ̃ lè ò? Woa ŋutɔwo be èviwo si ye à, àlo àmèjrowo si ye?” 26Petrò ɖoeŋuti na ɛ̀ be: “Àmèjrowo si ye.” Eye Yesù gblɔ̃ na ɛ̀ be: “Eŋuã èdùamèviwo ya vò e? 27Gãkea, ne mi mu gbà nyi àfɔ̀klɛ̃ na wo òa, yì ètɔ̀ to, ne wòa dà àkpoŋù. Ne wò tĩ èlã cucugbãa, kè yebe ènu mè; wò la kpɔ ègà kè sù la tu ènyè ku èwò be ètacia. Sɔ ɛ̀ tu ètaci na wo.”
Mina Bible © Bible Society of Togo, 2014.