Yosùa 10
10
Wo blase ɖo Gabaɔ̀n ku Izràɛl ŋuti
1Vɔ̀, Yèruzàlɛm be èfìɔ Adonì-Sèdɛk, sè be Yosùa xɔ̀ Ayì be ànyigbã eye be crɔ̃ èdùa keŋu eye be wɔ̀ ku Ayì kudo yebe èfìɔa sìgbè àlekè be wɔ̀ kudo Yerikò ku yebe èfìɔa nènea, eye be gbà nya be Gabaɔ̀ntɔwo wɔ̀ ŋuti fàfa ku Izràɛl eye wo lè èdùa mè lè woa dòmè. 2Vɔ̃vɔ̃ gã ɖe jè woa ji ɖo Gabaɔ̀n nyi èdù gãaɖe, sìgbè èfìɔ-dùwo nène gbà lòlò wu Ayì be èdùa, eye yebe ŋusùtiwo nyi àhùawɔ̀tɔ àdodoewo. 3Yèruzàlɛm bè èfìɔ, Adonì-Sèdɛk dɔ̃ àmè ɖoɖa Hebrɔ̀n be èfìɔ Hohàm, ku Yàrmut be èfìɔ Pireàm, kudo Làkis be èfìɔ Yafìa gbàkudo Eglɔ̀n be èfìɔ Devìr gblɔ̃ be: 4“Mì va kpe ɖo ŋuti nyè ne mia wɔ̀ àhùa ku Gabaɔ̀n be èdùa, ɖo e yì wɔ̀ ŋuti fàfa ku Yosùa kudo Izràɛlviwo.” 5Kè wo bɔ̀ ɖodua, Àmorì be èfìɔ àtɔ̃awo, Yèruzàlɛm be èfìɔ, Hebrɔ̀n be èfìɔ, Yàrmut be èfìɔ, Làkis be èfìɔ ku Eglɔ̀n be èfìɔ, woawo kudo woabe àhùakɔ̃awo yì xa Gabaɔ̀n be èdùa ne woa wɔ̀ àhùa kudo è. 6Gabaɔ̀ntɔwo dɔ̃ àmè ɖoɖa Yosùa lè Gilgàl be àsàɖa mè gblɔ̃ be: “Mù gbà gbe àpo àlɔ̀do na na àpo sumɔ̃viawo ò; va kaba ne wò ku àhùakɔ̃ wòa, mìa hlùɛ̃ mi gã, ɖo Àmorì be èfìɔwo kpata kèwo lè ètoa jia, wo wɔ̀ ɖèka, sitè ɖo mia ŋuti.” 7Yosùa sitè kplà so kaka Gilgàl ye ku yebe ŋusùti wɔ̀ àhùa ku dùkɔ̃a. 8Tɔhonɔ̀ gblɔ̃ na Yosùa be: “Mu gbà vɔ̃ ò, ɖo mù ɖè wo do àsi na wò; eye ɖekpe mu lè woa dòmè kè la nɔ̀tè lè ŋùkɔ̀ na wò ò.” 9Yosùa yì kɔ̀ ɖo woa ji lè àvò mè: ɖo e jè èmɔ̃ so Gilgàl èzã-èzã. 10Tɔhonɔ̀ ɖè Àmorìtɔwo ɖo nu lè Izràɛlviwo be ŋùkɔ̀ eye be na ànyi jèje gãaɖe lè Gabaɔ̀n nyigbã ji; eye wo nyà wo ɖo nu kaka lia Bɛt-horɔ̀n eye wo pò wo wù kaka yì Àzekà ku Màdekà be kɔpeawo mè. 11Ekè wo le si lè Izràɛlviwo be ŋùkɔ̀a eye wo yì ɖo Bɛt-horɔ̀n be bàlìa mèa, Tɔhonɔ̀ na èsìkpe jà so jiŋùkusi pò wo kaka yì kɔ̀ ɖo Àzekà eye wo ku. Àmè kèwo ye èsìkpea wùa sùgbɔ wu àmè kèwo ye Izràɛlviwo wù ku èwuia. 12Nène a ye Yosùa pò nupo na Tɔhonɔ̀ gbè ŋua gbè kè Tɔhonɔ̀ ɖè Àmorìtɔwo do àsi na Izràɛlviwo eye e gblɔ̃ lè Izràɛlviwo kpata be ŋùkɔ̀ be: “Dɔ̃ŋùkusu ne tɔtè ɖo Gabaɔ̀n ji tututu, wètri ne tɔtè ɖo Ayalɔ̀n be bàlìa be tamè!” 13Eye dɔ̃ŋùkusu ku wètriawo tɔtè woabe àzɔ̃lìa kaka va na wàlɛbɛ kè ye wo biɔ Gabaɔ̀n bè èdùa bè èhlɔ̃ yebe kɛ̃tɔwo vɔ̀a. Sìgbè àlekè wo ŋlɔ̀ ɛ̀ ɖo àmè jɔ̀jɔɛa be xoma mè nène be: Dɔ̃ŋùkusua tɔtè ɖo jiŋùkusi be dòdò mè eye mu pu dù yì ɖo èxɔ̀ kaka xɔ̀ ŋùkèkè ɖèka. 14So kaka gà ŋua mèa, ŋùkèkè bu mu lè kè sɔ̀ ku ŋùkèkè kè ye Tɔhonɔ̀ sè ègbè na àgbètɔ ò (wɔ̀ ɖo àmè be jro ji), ɖo Tɔhonɔ̀ le wɔ̀ àhùa na Izràɛl. 15E yomè a Yosùa ku Izràɛlviwo kpata trɔ gbɔ̀ va woabe àsàɖa mè lè Gilgàl.
Èfìɔ àtɔ̃wo lè Màkedà be àkpãdo mè
16Nène a èfìɔ àtɔ̃awo si yì wla ɖo àkpãdo mè lè Màkedà. 17Wo va gblɔ̃ na Yosùa be: “Wo yì kè ɖo èfìɔ àtɔ̃awo ŋuti lè Màkedà be àkpãdoa mè.” 18Yosùa gblɔ̃ be: “Mì yì mlì èkpe gãgãwo tu àkpãdoa nu ne mìa sɔ àmèwo ɖo funu ne woa ɖia wo be wo mu gbà to ò. 19Ne mìa wo ya, mì mu gbà tɔtè klua ò, mì nyà mìabe kɛ̃tɔwo ɖo nu ne mìa sò èkà lè gɔ̃mè na wo, eye mì mu gbà na wo èmɔ̃ ne woa trɔ gbɔ̀ va woabe èdù mè ò; ɖo Tɔhonɔ̀ mìabe Mawu a ɖè wo do àsi na mì.” 20Vɔ̀ kè Yosùa ku Izràɛlviwo ɖù àmèawo ji kaka crɔ̃ wo keŋu-keŋu vɔ̀a, àmè ɖewo kpɔ èmɔ̃ teŋu si eye wo yì wla ɖo èdù kè wo tɔ̃ èkpa sɛ̃sɛ̃ trɔdoawo mè. 21Eye Izràɛlviwo kpata trɔ gbɔ̀ bɔ̀bɔɛɖe, va Yosùa gbɔ lè àsàɖa mè lè Màkedà; eye àmè ɖekpe mu lì lihũi ɖo Izràɛlviwo ŋuti ò. 22E yomè a Yosùa gblɔ̃ be: “Mì hũ àkpãdoa ne mìa ɖè èfìɔ àtɔ̃awo to va na mù.” 23Wo wɔ̀ ɖo ji eye lè àkpãdoa mèa wo ɖè èfìɔ àtɔ̃ kèwo nyi: Yèruzàlɛm be èfìɔ Hebrɔ̀n be èfìɔ, Yàrmut be èfìɔ, Làkis be èfìɔ ku Eglɔ̀n be èfìɔ, wo va na Yosùa. 24E kè ye wo kplɔ̀ èfìɔ àtɔ̃ kèawo va Yosùa gbɔa, e yɔ Izràɛl be ŋusùwo kpata bɔ̀ eye e gblɔ̃ na àhùa-ŋùkɔ̀nɔ̀tɔ kèwo kplɔ̀ ɛ̀ doawo be: “Mì dɔ̃ va ne mìa sɔ àfɔ̀ ɖo èhlò ji na èfìɔ kèawo.” Wo zɔ̃ va eye wo sɔ àfɔ̀ ɖo èhlò ji na èfìɔawo. 25Yosùa gblɔ̃ na wo be: “Mì mu gbà vɔ̃ ò eye mì mu gbà tàsi mìa ɖokoewo na kɛ̃tɔawo ò. Mì wɔ̀ kãlì ne mìa sɛ̃ŋu, ɖo nènea ye Tɔhonɔ̀ la wɔ̀ ku mìabe kɛ̃tɔ kèwo mì la kpe àhùa kudoa yeŋu.” 26Lè e yomè a, Yosùa pò èfìɔawo wù eye e na wo do èkà ève na wo sɔ̀ kù ɖo àti àtɔ̃ ŋuti, wo nɔ̀ àtiawo ŋuti kaka na wètrɔ mè. 27Kè èzã le do a, Yosùa na be woa ɖè wo lè àtiawo ŋuti ne woa fɔ̀ wo kɔ̀ ɖo àkpãdo kè mè wo wla ɖo sã mè. Eye wo gbà mlì èkpe gãgãwo ɖo àkpãdoa nu eye èkpe kèawo kpɔ̀tɔ̀ lè kaka na egbè.
Èdù kèwo lè àpùgoa be xɔ̀xɔ
28Gbè ŋua gbè kea, Yosùa xɔ̀ Màkedà be èdùa, e wù èfìɔa ku dùkɔ̃a keŋu eye àmè ɖekpe mu ci àgbè ò. E wɔ̀ ku Màkedà be èfìɔa sìgbè àlekè be wɔ̀ kudo Yerikò be èfìɔa nène, 29so Màkedà Yosùa ku Izràɛlviwo yì Libnà eye wo wɔ̀ àhùa kudo Libnàtɔwo. 30Tɔhonɔ̀ ɖè Libnà cã ku yebe èfìɔa do àsi na Izràɛlviwo eye wo wù wo kudo àmè kèwo lè funua lè èwui nu; àmè ɖekpe mu ci àgbè ò eye wo wɔ̀ kudo èfìɔa cã sìgbè àlekè wo wɔ̀ kudo Yerikò be èfìɔa nène. 31Yosùa ku Izràɛlviwo kpata to Libnà yì Làkis; wo xa èdùa, wɔ̀ àhùa kudo wo. 32Tɔhonɔ̀ ɖè Làkis be èdùa do àsi na Izràɛlvi kèwo xɔ̀ èdùa lè ŋùkèkè èvègɔ̃a gbè eye wo mu gble àmè ɖe ɖo àgbè ò, wo wù àmè kèwo keŋu lè funua sìgbè àlekè wo wɔ̀ ku Libnàtɔwoa nène. 33E ye na be Gezɛ̀r be èfìɔ Horàm va la kpe ɖo Làkistɔwo ŋuti, vɔ̀a Yosùa pò è ku yebe dùkɔ̃a wù kaka àmè ɖekpe mu ci àgbè ò. 34So Làkis be èdùa mè, Yosùa ku Izràɛlviwo yì Eglɔ̀n be ànyigbã ji; wo yì xa ɛ̀, wɔ̀ àhùa kudo wo. 35Wo xɔ̀ èdùa gbè ŋua gbè ke, wù wo lè èwui nu. Wo wɔ̀ ku àmè kèwo kpata lè funua sìgbè àlekè wo wɔ̀ kudo Làkistɔwoa nène. 36Yosùa ku Izràɛlviwo so Eglɔ̀n yì Hebrɔ̀n nyigbã ji eye wo yì wɔ̀ àhùa lè funu. 37Wo xɔ̀ èdùa eye wo wù wo ku woabe èfìɔa lè èwui nu, wo xɔ̀ èdù kèwo bɔ̀ ɖo Hebrɔ̀n ŋutiawo eye wo wù woa mènɔ̀tɔwo kpata sìgbè àlekè wo wɔ̀ kudo Eglɔ̀ntɔwo nènea, wo mu gble àmè ɖekpe ɖo àgbè ò. 38E yomè a, Yosùa ku Izràɛlviwo trɔ kpãŋùkɔ̀ Dèbir be èdùa eye wo wɔ̀ àhùa kudo è. 39Wo xa èfìɔa ku yebe èdùawo kpata. Wo wù wo gbà crɔ̃ àmè kèwo kpata lè èdùawo mèa. Yosùa mu tàsi àmè ɖekpe ɖo àgbè ò. E wɔ̀ ku Dèbir be èdùa kudo yebe èfìɔa sìgbè àlekè be wɔ̀ kudo Hebrɔ̀n, gbà wɔ̀ ku Libnà ku yebe èfìɔa nène. 40Yosùa xɔ̀ ànyigbã kpata: Èto-nyigbã, Nègev-nyigbã; èto gɔ̃mè nyigbã ku bàlìawo mè eye e pò woabe èfìɔwo wù. Mu tàsi àmè ɖekpe ɖo àgbè ò eye e crɔ̃ ènu àgbèagbè ɖekpekpe sìgbè àlekè Tɔhonɔ̀, Izràɛl be Mawu a ɖo è ɖɛa nène. 41Yosùa crɔ̃ wo so Kadɛ̀s-Bàrneà kaka va ɖo Gazà, jè Gosɛ̀n be anyigbã kpata ji va ɖo Gabaɔ̀n. 42Yosùa xɔ̀ ànyigbã ŋuawo keŋu, crɔ̃ woabe èfìɔawo kpata zè ɖèka tutu, ɖo Tɔhonɔ̀ Izràɛl be Mawu a wɔ̀ àhùa na Izràɛl. 43E yomè a Yosùa ku Izràɛlviwo kpata trɔ gbɔ̀ va àsàɖa mè lè Gilgàl.
Currently Selected:
Yosùa 10: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
