Yosùa 9

Izràɛlviwo ɖùzò ku Gabaɔ̀ntɔwo

1Vɔ̀ kè wo sè ènyà kèa, èfìɔ kèwo lè Yɔrdàn be ètɔ̀a godo lè ètoawo mèa, lè èdùa be bàlì mèa, ku Àpù gã to, gogo Libàn, Hitìtɔwo, Àmorìtɔwo, Kanàntɔwo, Perizìtɔwo, Hivitètɔwo, Yebusìtɔwo, 2wo ɖo ègbè èdu, wɔ̀ ɖèka sɔ wɔ̀ àhùa kudo Yosùa ku Izràɛl be dùkɔ̃a 3Gabaɔ̀ntɔwo sè ènu kè Yosùa wɔ̀ lè Yerikò ku Ayì be èdùawo mè, 4eye woawo cã ɖè woabe àyè gɛdɛa fiɔ to nɔ̀nɔmè tɔtrɔ mè. Wo do àgbã ɖo àkpɛtɛ do xoxo mè ku vɛ̃ be lãgbàzegò xoxo kè wo trɔ jràɖo a, ɖo woabe èsɔ-àkɛtɛawo ji; 5Wo do àfɔ̀kpa do xoxo eye wo do àwù zɛ̃zɛ̃wo; kpɔ̃nɔ kèwo lè àgbã mè na woawo pu eye wo flì keŋu-keŋu. 6Wo jè èmɔ̃ yì Yosùa gbɔ lè Gilgàl be àsàɖa mè eye wo gblɔ̃ na ye ku Izràɛlviwo kpata be: “Mi so èdù mà-sɔɛ ɖe mè. Fifìa e la nyɔ be mìa wɔ̀ zòɖùɖu ɖe ku mi.” 7Izràɛlviwo gblɔ̃ na Hivitètɔwo be: “Èta mu nyɔ òa, mì mu dìdì lè mia gbɔ ò, nukɛ ŋuti ye mi la va ɖùzò ku mì ɖo ò?” 8Vɔ̀a wo gblɔ̃ na Yosùa be: “Mi nyi àpo sumɔ̃viwo.” Eye Yosùa gblɔ̃ na wo be: “Àmè kɛ ye mì nyi ò, eye fikɛ mì so ò?” 9Wo ɖo e ŋuti na ɛ̀ be: “Àpo sumɔ̃viawo so èdù mà-sɔɛ dìdì ɖe mè, hà ɖo Tɔhonɔ̀ àpo Mawu a ŋuti, ɖo mi sè yebe zĩzĩ ku ènu kè be wɔ̀ lè Ejiptè a 10ku ènu kè be wɔ̀ ku Àmorìtɔwo be èfìɔ èvèawo lè Yɔrdàn be ètɔ̀a godo: Sihɔ̀n kè nyi Hɛsbɔ̀n be èfìɔa ku Ɔg kè nyi Basàn be èfìɔ, vɔ̀ yì sò àxue ɖo Astàrɔt. 11Miabe àmèsĩsĩwo ku mia tɔ̀wo kpata gblɔ̃ na mi be: “Mì sɔ ènuɖùɖu ɖo àsi; mì va yì dogò wo eye mìa gblɔ̃ na wo be: mi nyi mìabe sumɔ̃viwo.” Eŋuã, mì wɔ̀ zòɖùɖu ku mi. 12Kpɔ miabe kpɔ̃nɔwo ɖa: wo lè zòzo wàlɛbɛ kè mi le do àgbã lè mia dea eye mi jè èmɔ̃ va mìa gbɔa; vɔ̀ fifìa kpɔ àlekè wo pu gbà flì ɖoa ɖa! 13Vɛ̃-lãgbàzegòawo lè yeye wàlɛbɛ kè mi kɔ̀ vɛ̃ ɖo woa mèa, kpɔ àlekè wo zɛ̃ ɖoa ɖa; miabe àwù ku àfɔ̀kpawo doxo ɖo àzɔ̃lì gbogbo kè mi zɔ̃a ŋuti.” 14Izràɛlviwo lɔ̃ xɔ̀ woabe àgbãmè-kãnuwo vɔ̀ wo mu yì ji e mè kpɔ lè Tɔhonɔ̀ gbɔ ò. 15Yosùa wɔ̀ ɖèka ku Gabaɔ̀ntɔwo eye be ɖo èkpe zòɖùɖu kè lè na wo àgbèa ji. Dùkɔ̃a be àgbònùglawo gbà tɛ ègbè ɖo àtãŋukãkã ji na wo. 16Vɔ̀ kè wo ɖùzò kèa lè ŋùkèkè ètɔ̃ yomè a, Izràɛlviwo va nya be Gabaɔ̀ntɔwo nyi dùkɔ̃ kè mu dìdì lè yèwo gbɔ òa, eye wo lè yèwo dòmè. 17Izràɛlviwo so jè èmɔ̃ eye ŋùkèkè ètɔ̃ gbèa, wo gɛ̃ ɖo woabe èdù kèwo nyi Gabaɔ̀n, Kèfirà, Berotè ku Kìriat-yearìm mè. 18Izràɛlviwo mu wù wo, ɖo Tɔhonɔ̀, Izràɛl be Mawu a be nyikɔ ji àgbònùglawo kã àtãŋua ɖo, vɔ̀ Izràɛlviwo lì lihũi ɖo àgbònùglawo ŋuti. 19Eye àgbònùgla kèawo gblɔ̃ na àmèha kpata be: “Mi kã àtãŋu na wo lè Tɔhonɔ̀, Izràɛl be Mawu a be nyikɔ mè; nyàwo ye mi mu gbà la teŋu wɔ̀ ènuvuɛ̃ ɖekpe ku wo ò. 20Mì kpɔ ènu kè mi la wɔ̀a ye kè: mi la tàsi àgbèa na wo ne Mawu be àdɔ̀mèze mu gbà va jè mia ji ò. 21Kè e tɔ̀ be miabe àgbònùglawo gblɔ̃ so woawo ŋuti be: Wo ne nɔ̀ àgbèa!”, Fifìa mi sɔ wo lè wɔ̀ ànakè jitɔwo ku èsì kùtɔwo na dùkɔ̃a kpata. 22Yosùa yɔ wo va biɔ wo sè be: “Nukɛ ŋuti mì blè mi gblɔ̃ be: “Mi so èdù mà-sɔɛ mè” vɔ̀, mì lè mia dòmè ɖo ò? 23So egbèa, kpɛ̃sɛ̃ va mìa ji eye àmè ɖekpe mu la nɔ̀ mìa dòmè kè mu la nyi sumɔ̃vi ò, ànakèjitɔ ku èsìkùtɔ, na Mawu be àxuedo a.” 24Wo ɖo e ŋuti na Yosùa be: “Eji-ejia, wo gblɔ̃nà ènu kè Tɔhonɔ̀ àpo Mawu gblɔ̃ na yebe sumɔ̃vi Mosè be: “mù la sɔ ànyigbã kèa kpata do àsi na wò eye mù la wù yebe dùkɔ̃wo kpata lè ŋùkɔ̀ na wòa, na mi, àpo sumɔ̃viwo. Eye wɔ̀ be mi vɔ̃ mì ŋutɔ, ènu kè ŋuti ye mi wɔ̀ nène ɖoa yeŋu. 25Fifìa, kpɔɖa, mi lè àpo ŋusɛ̃ gɔ̃mè; wɔ̀ ku mi sìgbè àlekè e jè gbà sɔ̀gbè na wòa nène.” 26Yosùa wɔ̀ ku wo nènea eye e xɔ̀ wo lè Izràɛlviwo si ne wo mu gbà wù wo ò. 27Àzã ŋua gbè ke Yosùa do èdɔ àsi na wo sìgbè ànakè jitɔwo ku èsì kùtɔwo nène na àmèha bliboa kudo àfi kè Mawu la cã na Tɔhonɔ̀ be vɔsakpea kaka va na egbè.

Currently Selected:

Yosùa 9: GEN

Highlight

Copy

Compare