Yosùa 11

Àvũ wɔ̀wɔ lè Merɔ̀m be èsìawo to

1Wàlɛbɛ kè ye Hasɔ̀r be èfìɔ Yabìn sè ènyà kèa, e ɖo àmèdɔ̃dɔ̃wo ɖoɖa Yobab kè nyi Madɔ̀n be èfìɔa, ku Simrɔ̀n be èfìɔa kudo Aksàf be èfìɔ wo gbɔ, 2e gbà dɔ̃ àmèwo ɖoɖa èfìɔ kèwo lè èvègo be ètoawo jia, kèwo lè Àrabà lè Kìnarɔ̀t be àpùgo, kèwo lè bàlì mè be èdùa ku Dɔr be ànyigbã gbàjàa ji lè èwèɖoxɔ̀pe. 3Kanàntɔwo lè èwèzɛ̃pe ku èwèɖoxɔ̀pe; Àmorìtɔwo, Hitìtɔwo, Perizìtɔwo ku Yebusìtɔwo lè ètoa ji, Hivìtɔwo lè Hɛrmɔ̀n be gɔ̃mè lè Mispà be ànyigbã ji. 4Eye woa kpata wo to ku woabe àhùakɔ̃awo keŋu. Dùkɔ̃ kèawo sùgbɔ sìgbè àpùta be kɔkuiwo nène eye wo ɖo èsɔwo kudo àhùa-kèke sùgbɔ fuu. 5Èfìɔ kèawo kpata ɖo ègbè èdu va sò àsàɖa ɖo Merɔ̀m be ètɔ̀a to ne woa sɔ wɔ̀ àhùa ku Izràɛl. 6Tɔhonɔ̀ gblɔ̃ na Yosùa be: “Mù gbà vɔ̃ wo ò, ɖo èsɔ̀, lè gàpòpo kèa mèa, mù la ɖè woa kpata do àsi na Izràɛl ne bèa wù wo; wò la sò woabe èsɔwo be sobo mè eye wò la tɔzò woabe àhùa-kèkeawo.” 7Eye Yosùa ku yebe àhùakɔ̃ kè bla àhùakpàa wo yì kɔ̀ ɖo woa ji lè àvò mè, lè Merɔ̀m be ètɔ̀a to eye wo jè woa ji. 8Tɔhonɔ̀ ɖè wo do àsi na Izràɛlvi kèwo pò wo wù gbà nyà wo kaka yì kɔ̀ ɖo Sidɔ̀n be èdù gã ku Mìsrefɔ̀t-Màin gbàkudo Mispɛ̀ kè lè èwèzɛ̃pea mè. Wo pò wo wù kaka ye àmè ɖekpe mu ci àgbè ò. 9Yosùa wɔ̀ ènu kè ye Tɔhonɔ̀ gblɔ̃a: e sò woabe èsɔawo be sobo mè eye e tɔzò woabe àhùa-kèkeawo.

Hasɔ̀r be ànyigbã be xɔ̀xɔ

10Gà ŋua mèa, Yosùa trɔ va eye be xɔ̀ Hasɔ̀r be èdù kè nyi èdùgã na dùkɔ̃ kèwo lè èvègoa kpata. E pò èfìɔa wù lè èwui nu. 11Wo wù àmè kèwo keŋu lè funua lè èwui nu eye ɖekpe mu kpɔ̀tɔ̀ kè wo mu wù ò, eye wo gbà tɔzò Hasɔ̀r be èdùa. 12Yosùa wù èfìɔ ŋuawo kpata gbà xɔ̀ woabe èdùawo. E crɔ̃ wo gbidigbidi sìgbè àlekè Tɔhonɔ̀ be sumɔ̃vi Mosè ɖo e ɖɛa nène. 13Vɔ̀ lè èdù kèwo keŋu sitè ɖo Izràɛl ŋuti lè ètoa jia, Izràɛlviwo mu tɔzò ɖekpe ò, tovò lè Hasɔ̀r bè èdùa ɖèka kè ye Yosùa tɔzòa ŋuti ò. 14Èdù kèawo be ènunɔ̀amèsiwo ku èlãhawo trɔ Izràɛlviwo tɔ̀, vɔ̀ wo wù èdùamètɔwo lè èwui nu, crɔ̃ wo keŋu-keŋu eye àmè ɖekpe mu kpɔ̀tɔ̀ ò. 15Sìgbè àlekè Tɔhonɔ̀ do è àsi na yebe sumɔ̃vi Mosè eye Mosè cã do è àsi na Yosùa, eye Yosùa wɔ̀ ɖo ji tututu: mu ɖè ɖekpe lè ègbè kè Tɔhonɔ̀ do àsi na Mosè a ŋuti ò.

Ànyigbã xɔ̀xɔ be mè vava

16Nène a ye Yosùa xɔ̀ ànyigbã ŋua kpata; èto-nyigbã, Nègev ku Gosɛ̀n kpata, bàlì mè-nyigbã, Àrabà, Izràɛl be ètoa kudo bàlìa mè. 17So kaka Halàk be èto kè lè Sèir gbɔa yì Baal-Gad kè lè Libàn be bàlì mè lè Hɛrmɔ̀n be ètoa gɔ̃mè, e le woabe èfìɔawo kpata eye be pò wo wù. 18Ŋùkèkè sùgbɔ ye Yosùa sɔ wɔ̀ àhùa ku èfìɔ kèawo. 19Tovò lè Hivìtɔ kèwo lè Gabaɔ̀n ŋutia, èdù ɖekpe mu lè kè wɔ̀ ŋuti fàfa kudo Izràɛlviwo ò; ɖo wo xɔ̀ èdù kèawo ku èwui. 20Nyàwo ye Tɔhonɔ̀ ɖo è be yèa trì woabe èjì ne woa wɔ̀ àhùa ku Izràɛl ne sɔsɔkè kudo màje mu gbà sù woa si ò, àleke be woa teŋu crɔ̃ wo sìgbè àlekè Tɔhonɔ̀ do è àsi na Mosè a nène.

Wo wɔ̀ àhùa ku Anàkìtɔwo

21Wàlɛbɛ ŋua kea, Yosùa va wù Anàkìtɔwo lè ètoa ji, lè Devìr, lè Anàv, lè Yudà be èto ku Izràɛl be ètoa kpata ji. Yosùa crɔ̃ wo ku woabe èdùawo. 22Anàkìtɔ ɖekpe mu kpɔ̀tɔ̀ lè Izràɛlviwo be ànyigbã ji ò. Gãkea; èɖewo kpɔ̀tɔ̀ lè Gazà, Gat ku Asdɔ̀d be ànyigbã wo ji. 23Yosùa xɔ̀ ànyigbã kpata sɔ zɔ̃ ɖo ènyà kè Tɔhonɔ̀ gblɔ̃ na Mosè a ji eye e sɔ wɔ̀ crɔ̃nu na Izràɛl, be mã ɛ̀ ɖo kɔ̀tawo kpata nu. Eye ànyigbã kpɔ ŋuti fàfa, ɖo àhùa wɔ̀wɔ tɔtè.

Currently Selected:

Yosùa 11: GEN

Highlight

Copy

Compare