Yɔb 1
1
Yɔb be ŋutinya
1Ŋusù ɖe nɔ̀ Us be èdùa mè kpɔ. Wo yɔna ŋusùa be Yɔb. E nyi àmè jɔ̀jɔɛ, eye ŋùmèkãkã ɖekpe mu lè e ŋuti ò. E dona bùbu Mawu ŋuti eye e nanasà èvuɛ̃. 2E jì èvi ŋusù adrɛ̃ kudo èvi nyɔ̃nù ètɔ̃. 3E ɖo ègbɔ hotu ètɔ̃ èkà èwì vɔ àtɔ̃, èsɔ hotu ɖèka èkà èwì vɔ àtɔ̃, ènyì èkà èwì vɔ àtɔ̃ kèwo dànà àgblè na ɛ̀a, èsɔ àkɛtɛnɔ èkà woèvè takpo, kudo sumɔ̃vi ŋusù ku sumɔ̃vi nyɔ̃nù sùgbɔ. E nyi ŋusù ɖìnyi ɖe lè èwèɖoxɔ̀pe be àmèwo kpata dòmè.
4Eji-eji, Yɔb be èvi ŋusùwo ɖùnà àzã lè woa nɔ̀nɔwo dòmè eye wo kpena woa nɔ̀vi nyɔ̃nùawo cã va ɖùnànu kudo wo. 5Ne wo ɖù àzãa vɔ̀a, Yɔb bɔ̀nà wo ne bèa kɔ̀ woa ŋuti. Ne èŋù kèa, e fɔ̃na xoxo sɔ wɔ̀nà lèlèɖì be vɔsa na wo ɖèka-ɖèka. Ɖo e gblɔ̃nà be: “Èvi nyèwo teŋu jè àgɔ̀ ɖe kòkòkò. Èta mu nyɔ òa, wo zũ Mawu lè èjì mè”. Ènu kèa ŋuti ye be wɔ̀nà vɔsa na wo ɖo.
6Gbè ɖèka, jiŋùkusi be dùkɔ̃a bɔ̀ lè Tɔhonɔ̀ gbɔ. Satana, èhùɛdotɔa cã va. 7Tɔhonɔ̀ biɔ ɛ̀ sè be: “Fikɛ ye wò so ò?” Èhùɛdotɔ a ɖo e ŋuti be: “Mù le ɖìsà to ànyigbã a keŋu ji.” 8Tɔhonɔ̀ gblɔ̃ na ɛ̀ be: “Eŋuã wò le ŋuku ɖo sumɔ̃vi nyè Yɔb ŋuti à! Àmè ɖe mu lè, sɔ̀ kudo è lè ànyigbã a ji ò. Àmè jɔ̀jɔɛ be nyi, ŋùmèkãnu ɖekpe mu lè e ŋuti ò. E dona bùbu ŋuti nyè, eye e nana àsà èvuɛ̃.” 9Èhùɛdotɔ a ɖo e ŋuti be: “Ne Yɔb dona bùbu ŋuti wò a, e la kù ɖo ènu ɖe ŋuti kòkòkò! 10Wò nyi àkpoxɔ̀nu na ɛ̀ sìgbè èglìkpa ye wo tɔ̃, trɔ do ye ŋutɔ, yebe xòmè kudo ènu kè lè e si a kpata nène. Wò tusì na yebe àlɔ̀nudɔ, eye yebe èlãhawo lè èdù a keŋu mè. 11Vɔ̀, tɔ àsi ènu kè lè e sia kpɔ be mu la sɛ̃kpɛ̃ na wò àgbãŋùgbà ò mà a, mù kãɖoji!” 12Tɔhonɔ̀ gblɔ̃ na èhùɛdotɔa be: “E nyɔ, kpɔ ŋusɛ̃ ɖo ènu kè lè e sia ji, vɔ̀ mù gbà tɔ àsi yebe àgbè ò.”
Nène a ye èhùɛdotɔa jo lè Tɔhonɔ̀ gbɔ.
Yɔb be gbledo cucugbãtɔ̀wo
13Gbè ɖèkaa, Yɔb be èvi ŋusù kudo nyɔ̃nùawo le ɖù gbà le nù lè woa fòfo gãa gbɔ. 14Àŋɛ̀dotɔ ɖe va Yɔb gbɔ eye e gblɔ̃ na ɛ̀ be: “Àpo ènyìwo le wɔ̀dɔ lè àgblè, èsɔ àkɛtɛnɔawo cã lè àgblè bu mè lè àzɔ̀ge. 15Àrabìa be èmɔ̃zɔ̃tɔ kèwo mu nɔ̀nà tèpe ɖèka òa, va xa wo eye wo fĩ wo jo. Eye wo wù àpo sumɔ̃viawo. Nyè ɖèka pɛ ye kpɔ̀tɔ̀ ɖo mù si ne ma teŋu va to è na wò.”
16Àmèa mu kpɔ bɔ̀nu gbɔ̀xue àmè bu va ɖo ò. E gblɔ̃ be: “Èsò dàtu so èji eye be wù ègbɔ kudo sumɔ̃vi wòawo. E fiɔ̃ wo kpata. Nyè ɖèka kpò ye teŋu si ne ma va gblɔ̃ ɛ̀ na wò.”
17Àmè ŋua cã mu kpɔ bɔ̀nu gbɔ̀xue, àmè bu va ɖo ò. E gblɔ̃ be: “Kaldea be èmɔ̃zɔ̃tɔ kèwo mu nɔ̀nà tèpe ɖèka òa, va xa èsɔ èkpotɔnɔ̀awo, eye wo fĩ wo jo. Eye wo wù sumɔ̃vi wòawo. Nyè ɖèka kpò ye teŋu si ne ma va gblɔ̃ ɛ̀ na wò.”
18Àmè ŋua cã kpɔ̀tɔ̀ le pò nupo, eye àmè bu va kɔ̀ ɖɛ. E gblɔ̃ be: “Èvi wò ŋusù kudo nyɔ̃nùawo le ɖù gbà le nù lè woa fòfo gãa gbɔ. 19Àya sɛ̃sɛ̃ɖe pò so zògbè ji va kãkã àxue kè mè wo lèa. Èglìkpowo mù jè woa kpata ji eye wo ku. Nyè ɖèka kpò ye teŋu si ne ma va gblɔ̃ ɛ̀ na wò.”
20Nène a, Yɔb sitè. E zɛ̃ yebe àwùwo lè èkɔ̀, eye e plɔ èta na èfũlòlo be jèsì. E yomè a, e jèklò, sɔ ŋùkumè cɔ̃ ànyi. 21E gblɔ̃ be:
“Mù to lè ènɔ̀ nyè be àdɔ̀ mè àma-àma.
Mù trɔ le yì ànyigbã be ètù mè àma-àma.
Tɔhonɔ̀ ye na,
Tɔhonɔ̀ ye gbà trɔ xɔ̀ ɛ̀.
Àkpe na Tɔhonɔ̀!”
22Lè gbledo kèawo kpata mèa, Yɔb mu wɔ̀ àgɔ̀jènu ɖekpe ò. Mu kã ŋùmè na Mawu cã ò.
Currently Selected:
Yɔb 1: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
