Yɔb 2

Gbledo yeyewo gbà jè Yɔb ji

1Ŋùkèkè bu jia, jiŋùkusi be dùkɔ̃a gbà bɔ̀ lè Tɔhonɔ̀ gbɔ. Èhùɛdotɔa cã gbà va woa dòmè. 2Tɔhonɔ̀ biɔ ɛ̀ sè be: “Fikɛ ye wò so ò?” Èhùɛdotɔa ɖo e ŋuti be: “Mù le ɖìsà lè ànyigbã keŋu ji.” 3Tɔhonɔ̀ gblɔ̃ na ɛ̀ be: “Eŋuã wò kè ɖo sumɔ̃vi nyè Yɔb ŋuti! Àmè ɖe mu lè sɔ̀ kudo è lè ànyigbã ji ò. Àmè jɔ̀jɔɛ be nyi, ŋùmèkãnu ɖekpe mu lè e ŋuti ò. E dona bùbu ŋuti nyè eye e nanasà èvuɛ̃. E kpɔ̀tɔ̀ le nɔ̀ àgbè ɖo ɖoɖonu eye kunù ji, wò le biɔ so àsi nyè be ma crɔ̃ ɛ̀.” 4Vɔ̀a, èhùɛdotɔa ɖo e ŋuti na Tɔhonɔ̀ be: “E sɔ̀gbè! Ne wò na a, wò la xɔ̀. Àmè kè sɔna ènu kèwo lè e siawo nana sɔ hlùɛ̃nà yebe àgbèa ye. 5Vɔ̀, tɔ àsi yebe àgbèa kpɔ be mu la sɛ̃kpɛ̃ na wò àgbãŋùgbà ò mà a!” 6Tɔhonɔ̀ gblɔ̃ na èhùɛdotɔa be: “E nyɔ, mù le ɖè è do àsi na wò, vɔ̀ mù gbà xɔ̀ àgbèa lè e si ò.”

7Nène a, èhùɛdotɔa jo lè Tɔhonɔ̀ gbɔ. E yì pò Yɔb kudo àgbàzemè be èdɔ̀ jiŋɔ ɖe, so èta kaka va kɔ̀ ɖo àfɔ̀gɔ̃mè. 8Yɔb yì sò nɔ̀pe ɖo kɔkɔliwo dòmè. E klùnà ŋuti kudo èze gbãgbã.

9Èsrɔ̃a gblɔ̃ na ɛ̀ be: “Wò kpɔ̀tɔ̀ le nɔ̀ àgbèa ɖo ɖoɖo a nua? E la nyɔ na wò be wòa sɛ̃kpɛ̃ na Mawu ne wòa ku zè ɖèka!” 10Vɔ̀, Yɔb ɖo e ŋuti na ɛ̀ be: “Wò le pò nupo sìgbè àmè kè le jènua nène. Ne mi ɖo àlɔ̀ xɔ̀ nyɔnaa sìgbè Tɔhonɔ̀ be ènunana nènea; eŋuã nukɛ ŋuti ye mi la gbe gbledoa ya ɖo ò?” Lè gbledo kèawo cã mèa, Yɔb mu gblɔ̃ ŋùmèkãkã-nya ɖekpe sɔ sitè ɖo Mawu ŋuti ò.

Yɔb be èxlɔ̃ ètɔ̃wo va kpɔ ɛ̀

11Yɔb be èxlɔ̃ ètɔ̃wo sè gbledo kèwo keŋu va jɔ̀ ɖo e jia. Woawo ye nyi Elifaz so Temàn, Bildàd so Cuhà kudo Sofàr so Naamà. Wo so woabe èdù vòvòvòwo mè va. Wo ɖo ègbè èdu be yèwoa va do bàbà na Yɔb gbà sè veve kudo è. 12Wo kpɔ ɛ̀ lè àzɔ̀ge co, wo mu do è jèsi ò. Eye wo tɔ àvi fãfã kudo àpa lelele. Wo zɛ̃ woabe àwùwo eye wo lè hũhũ sɔ ɖè woabe kɔ̀bɛawo fiɔ. 13E yomè a, wo nɔ̀ ànyi ɖo e gbɔ lè funu xɔ̀ ŋùkèkè adrɛ̃ èzã adrɛ̃. Àmè ɖekpe mu lè woa dòmè pò nupo na ɛ̀ ò, ɖo wo kpɔ be yebe èfũa trì àkɔ.

Currently Selected:

Yɔb 2: GEN

Highlight

Copy

Compare