1Samuɛl 17

David ku Gòliat

1Filistìtɔwo bɔ̀ woabe àhùakɔ̃wo, ne woa wɔ̀ àhùa. Wo va bɔ̀ ɖo Sokò be èdùa mè, lè Yudà-nyigbã ji, eye wo do àsàɖa ɖo Sokò ku Àzekà dòmè, lè Efɛs-Damìm. 2Saolò ku Izràɛlviwo be gbãdãgbãwo bɔ̀ eye wo do àsàɖa ɖo Banìti be Bàlìa mè. Wo ɖo, kpã ŋùkɔ̀ Filistìtɔwo, na àhùawɔ̀wɔ. 3Filistìtɔwo lè èto ɖèka ji, Izràɛlviwo cã lè èto èvègɔ̃a ji kpã ŋùkɔ̀ wo, eye bàlìa sò woa dòmè.

4Kãlìsuka ɖe to so Filistìtɔwo dòmè. Yebe nyikɔ ye nyi Gòliat, eye be nyi Gat be èdùmètɔ. E jɔ̀ àsu, eye be kɔ yì èji sìgbè metà ètɔ̃ nène. 5E cɔ̃ gàjɛ̃ be ègà-kuku, eye be do àkɔta-kpoxɔ̀nu kè lè sìgbè èlã-cro nènea. Ègà-wu kè be do a be kpɛ̃kpɛ̃ sù kìlo èkà-takpo. 6E do gàjɛ̃ be àtawui, eye gàjɛ̃ be èhuã lè àbɔ na ɛ̀. 7Yebe èhuã be àtia lè sìgbè àvɔlɔ̃tɔ be èhũvi nène. Èhuã be ènugbɔ be kpɛ̃kpɛ̃ mè nyi kìlo adrɛ̃. Àmè kè sɔ yebe àkpoxɔ̀nua, le zɔ̃ lè ŋùkɔ̀ na ɛ̀. 8E va tɔtè, do àpa yɔ Izràɛlviwo be àhùakɔ̃awo be: “Nukɛ ŋuti mì va, be yèwoa wɔ̀ àhùa ɖo ò? Àlo, mu nyi Filistìtɔwo mù nyi, eye mìawo ya mì nyi Saolò be kluviwo òa? Mì cã àmè ɖèka, ne bèa va kpã ŋùkɔ̀ mù! 9Ne àmèa teŋu wɔ̀ àvũ ku mù, eye be ɖù ji nyèa, eŋuã, mi la trɔ zũ mìabe kluviwo. Vɔ̀, ne ènyè ye ɖù nènemea ji, eye mù wù ìa, mìawo, mì la trɔ zũ miabe kluviwo.” 10Filistìtɔa gbà gblɔ̃ be: “Ènyè, mù le tɔ ègbè Izràɛl be àhùakɔ̃awo egbè be: Mì cã ŋusù ɖèka, ne mia wɔ̀ àvũ!” 11Saolò ku Izràɛlviwo keŋu sè ŋusùa be ènyà kèawo, eye wo ci kpɔ̃ ku vɔ̃vɔ̃.

12David nyi Efratàtɔ ɖe kè so Bɛtlɛhɛ̀m be èdù mè, lè Yudà-nyigbã jia be èvi. Wo yɔna ŋusùa be Jesè. Jesè ɖo èvi àmè ènyi. Lè Saolò be hùenua, Jesè sĩ, eye be nyi àmègã ɖe kè ŋuti bùbu lèa. Èviawo lè Izràɛlviwo be àhùakɔ̃awo dòmè. 13Jesè be ŋusùvi àmègãxo ètɔ̃awo cã kplɔ̀ Saolò do, yì àhùa gbea ji. Wo àmè ètɔ̃awo be nyikɔ ye nyi: Eliab àmègãxoa, Abinadab, yebe yomètɔ̀a ku Samà, èvi ètɔ̃gɔ̃a. 14David ya nyi vifɛ̃tɔa. Àmègãxo ètɔ̃awo ye kplɔ̀ Saolò do, 15vɔ̀a, David yìnà Saolò gbɔ, eye be gbà gbɔ̀nà va Bɛtlɛhɛ̀m, kplɔ̀nà ètɔa be èlãhaa yì ɖùnànu.

16Gòliat, Filistì ŋusùa tona va, gbè sia gbè, ŋùdekɛ̃nyɛ ku wètrɔ, va jènà ŋùkɔ̀ Izràɛlviwo be àhùakɔ̃a, ŋùkèkè èkà sɔ̃ŋu. 17Ŋùkèkè ŋuawo dòmètɔ ɖèka jia, Jesè gblɔ̃ na èvia David be: “Sɔ èlù tɔ̀tɔ kè lè kòtòku kèa mèa ku kpɔ̃nɔ èwo kèawo, ne wòa ɖèbla sɔ wo yì na fòfo wòwo lè àhùa gbea ji. 18Sɔ nyìnɔsi babla èwo kèawo cã yì na àmè èkà èwì vɔ àtɔ̃ (1000) be àhùakɔ̃a kplɔ̀tɔa, eye, wòa kpɔ be fòfo wòwo fɔ̃ nyuɛ̃ ɖe màa. Ne wo fɔ̃ nyuɛ̃ ɖe a, wòa hɛ̃ jèsìdo ɖe, so woa gbɔ va fiɔ mù. 19Woa ku Izràɛlviwo be àhùakɔ̃a keŋu lè Saolò ŋuti le wɔ̀ àhùa ku Filistìtɔwo lè Elà be bàlìa mè.”

20David fɔ̃zã, sɔ èlãhaa do àsi na èlãjikpɔtɔ ɖe, sɔ ènu kèwo be ɖo la sɔawo, eye be jè èmɔ, sɔ zɔ̃ ɖo ètɔa Jesè be èdɔ kè be dɔ̃ ɛ̀a ji. David yì ɖo àhùa gbea ji, wàlɛbɛ kè àhùakɔ̃a le jɔ̀, ne woa wɔ̀ àhùaa, wàlɛbɛ kè wo tɔ àhùa be àbòbo kpàkpaa. 21Izràɛlviwo be gbãdãgbãwo ku Filistìtɔwo be gbãdãgbãwo va kpã ŋùkɔ̀ woa nɔ̀nɔwo. 22David gble àgbã kèwo be sɔawo ɖo sumɔ̃vi kè dro woa si, eye be ɖèbla yì àfi kè àhùakɔ̃a lèa, yì dogbè na fòfoawo. 23Wàlɛbɛ kè David le pò nupo ku fòfoawoa, Filistìtɔwo be kãlìwɔ̀tɔ kè wo yɔna be Gòliat gbà to so Filistìtɔwo be àhùakɔ̃a dòmè, va le kã àdã be, ne kãlìwɔ̀tɔ ɖe lè Izràɛlviwo be àhùakɔ̃a dòmèa, ne to va kpe àkɔ ku yè, eye David sè è. 24Ekè Izràɛlviwo kpɔ ŋusù kèa, Izràɛl be ŋusùwo keŋu vɔ̃, eye wo si lè e nu. 25Izràɛl be ŋusùwo gblɔ̃ be: “Mì kpɔ ŋusù ŋuaa? E to va le pò àdègbè ɖoɖa Izràɛlviwo. Àmè kè la ɖù e ji, eye be la wù ìa, èfìɔa la na àmèa la kpɔ èci. E la sɔ èvia na àmèa be la ɖè. Nènemea be xòmè la vò, eye xòmèa le trɔ zũ hùɛ̃yi lè Izràɛl-nyigbã ji.”

26David biɔ gbãdãgbã kèwo ye lè yebe àxàda mèawo be: “Nukɛ wo la wɔ̀ na àmè kè la wù Filistì ŋusù kèa, la sɔ ɖè ŋùkpɛ̃ na Izràɛlviwo be dùkɔ̃a ò? Eye, àmè kɛ ŋutɔ ye nyi Filistì ŋusù àtɔ̀tɔ̀nɔ̀ ŋua kè le dà Mawu àgbèagbèa be àhùakɔ̃ ɖo ànyi ò? 27Gbãdãgbãawo gbìgbɔ̀ gblɔ̃ àjɔ̀gbè kè wo fìã na àmè kè la wù Filistìtɔwo be kãlì kèa na David. 28Ekè Eliab, David be fòfoa kpɔ David le pò nupo ku gbãdãgbãwoa, e bijì do è, eye Eliab gblɔ̃ be: “Nukɛ ye wò va le ji lè fikèa ò? Àmè kɛ ye wò sɔ èlãha vi wòa do àsi na, lè gbegbàa ji, gbɔ̀xue wò va fikèa ò? Mù nya lekè wò wɔ̀nà tùkaɖa ɖoa. Mu nyi ne wòa teŋu kpɔ lekè wo le wɔ̀ àhùaa ɖoa ŋuti ye wò va àfi kèa ɖo òa?” 29David ɖo e ŋuti be: “Ènu bàɖà kɛ ye mù wɔ̀ ò? Ènyà gɔ̃mè kpò mù biɔ sè.” 30David jo lè fòfoa gbɔ, eye be yì biɔ ènyà ŋua ke. Vɔ̀a, ɖoŋuti ɖèka kpò àmè sia àmè na David.

31Ènyà kèwo àmèwo sè, David le gblɔ̃a va ɖo èto mè na Saolò, eye Saolò na wo yɔ David va. 32David gblɔ̃ na Saolò be: “Èfìɔ bùbùtɔ, àmè ɖekpe mu gbà sò àdìka ɖo Filistì ŋusù kèa ŋuti ò. Ènyè sumɔ̃vi wòa, mù la yì kpe àkɔ ku ì.” 33Saolò ɖo e ŋuti na David be: “Gbèɖe! Wò mu la teŋu kpã ŋùkɔ̀ Filistì ŋusù ŋua ò. Èwò yaa, ɖèvi kpò wò gbà nyi, vɔ̀a, e yaa, gbãdãgbã be nyi, so kaka yebe ɖèkajɛ mè ke.” 34David ɖo e ŋuti na Saolò be: “Èfìɔ bùbùtɔ, ènyè sumɔ̃vi wòa, àlɛ̃ ye mù kplɔ̀nà na ètɔ nyè. Ne mù le kplɔ̀ èlãhaa, eye jãŋùta, àlo gbète ɖe va le èlã ɖe a, 35Mù punadù kplɔ̀ ɛ̀ do, mù wùnà ɛ̀, eye, mù ɖènà èlãa lè ènu mè na ɛ̀. Ne e trɔ ɖo ŋuti nyèa, mù lena èhlò na ɛ̀, eye mù pònà ɛ̀ wù. 36Èfìɔ bùbùtɔ, sumɔ̃vi wòa wù jãŋùta ku gbètewo. Nène a ke ye be la nyi na Filistì ŋusù àtɔ̀tɔ̀nɔ̀ ŋua, ɖoa, e le ɖìgbɔ Mawu àgbèagbèa be àhùakɔ̃a!” 37David gbà gblɔ̃ be: “Tɔhonɔ̀ kè ɖè mù to lè jãŋùta ku gbète be fèsuwo mèa kè ye la gbà hlùɛ̃ mù gã so Filistì ŋusù kèa cã si.” Saolò ɖo e ŋuti na David be: “Eŋuã yì. Tɔhonɔ̀ ne nɔ̀ ku wò.”

38Saolò sɔ ye ŋutɔ be àhùawu do na David, sɔ gàjɛ̃ be ègà kuku cɔ̃ èta na ɛ̀, eye be do àkɔta-kpoxɔ̀nu na ɛ̀. 39David sɔ Saolò be èwui kè lè àku mèa cã bla ègo ji, eye be jè àgbàgba be yèa zɔ̃, vɔ̀a, mu teŋu ì ò, ɖoa, mu do è kpɔ ò. Ekèa ŋutia, David gblɔ̃ na Saolò be: “Nyè mu teŋu zɔ̃ ku ènu gbogbo kèa ò, ɖoa, nyè mu do è kpɔ ò. Ekèa yomè a, David ɖè ègà-wua keŋu ɖɛ. 40David sɔ yebe èkpòa, cã èkpe kèwo ŋuti zɔ̃ nyuɛ̃ ɖe a lè ètɔ̀ sàsra mè. E sɔ wo do yebe àlɛ̃kplɔ̀tɔ be àkpòa mè. David sɔ yebe rɔba-tu ɖo àsi, eye be zɔ̃, kpã ŋùkɔ̀ Filistì ŋusùa. 41Filistì nusùa be àkpoxɔ̀nu letɔa le zɔ̃ lè ŋùkɔ̀ na Gòliat, eye Gòliat le zɔ̃ gogo David. 42Ekè Filistì ŋusùa kpɔ David kpòa, e dovlo è, ɖoa, ɖèvi kpò be gbà nyi, àgbàze mè klɛ̃ na ɛ̀, eye be jè ɖèkajɛ. 43Filistì ŋusùa biɔ David be: “Àvũ mù nyi, ye wò sɔ èkpò gbãnà gbɔ nyèa?” Eye Filistì ŋusùa sɛ̃kpɛ̃ na David lè yebe vòduwo be nyikɔ mè. 44Filistì ŋusùa yì e ji, gblɔ̃ na David be: “Va fikèa, ne wòa kpɔ be nyè mu la sɔ àpo ŋutilã na àyamè-xèviwo ku ègbemè-lãwo, ne woa ɖù ò màa?” 45David ɖo e ŋuti na Filistì ŋusùa be: “Èwò ya, wò sɔ èwui, èhuã ku àkplɔ̀ gbãnà gbɔ nyè, vɔ̀a, ènyè ya, Tɔhonɔ̀ Ŋusɛ̃kpatatɔ kè be àhùakɔ̃ wò le dovloa ye nyi àhùawɔ̀nu kè nyè ya, mù sɔ la kpã ŋùkɔ̀ wò. 46Egbèa kea, Tɔhonɔ̀ la sɔ wò do àsi na mù. Mù la ɖù ji wò, eye mù la ɖè èta lè èkɔ̀ na wò. Egbèa kea, mù la sɔ Filistìtɔwo be àhùakɔ̃wo mètɔwo be ŋutilãwo na àyamè-xèviwo ku ànyigbã ji-lãwo la ɖù. Eye dùkɔ̃wo la nya be Mawu lè Izràɛlviwo si nyàwo. 47Eye Izràɛl be dùkɔ̃a keŋu la nya be mu nyi èwui, àlo èhuã ye Tɔhonɔ̀ hiã, la sɔ na jiɖùɖu àmè ò. Ɖoa, àhùa kèa, Tɔhonɔ̀ tɔ̀ ye be nyi, eye, Tɔhonɔ̀ ŋutɔ ye la sɔ mì do àsi na mi.” 48Wàlɛbɛ kè Filistì ŋusùa le kã àzɔ̃lìa, la yì dogò David ɖèvia, David pu dù, yì kpã ŋùkɔ̀ ɛ̀. 49David ɖèbla do àlɔ̀ yebe àkpɛtɛa mè, ɖè èkpe ɖèka to, sɔ rɔbà-tua, dà èkpea, eye èkpea yì jè Filistì ŋusùa be ŋùgonu. Èkpea ŋɔ ŋùgoa, ɖo e mè. Filistì ŋusùa jè ànyi, cɔ̃ ŋùmè ànyi.

50Nène a ye David sɔ rɔbà-tu ku èkpe ɖù Filistì ŋusùa ji. David wù ì, ekè mu zã èwui òa. 51David pu dù yì nɔ̀tè ɖo Filistì ŋusùa gbɔ. E ɖè ŋusùa be èwui to lè àku mè, eye be sò èta na Filistì ŋusùa. Kè Filistìtɔwo kpɔ be wo wù yèwo be kãlìwɔ̀tɔa, wo si. 52Izràɛlviwo ku Yudàtɔwo be gbãdãgbãwo kpà àhùa-bòbo, eye wo pu dù kplɔ̀ Filistìtɔwo do, kaka va ɖo Gat be bàlìa mɔnu, lè Ekrɔ̀n be àgbowo nu. Filistìtɔwo be àmèkukuwo ɖɔ ànyigbã, so Saharaim be èmɔa ji, kaka va ɖo Gat ku Ekrɔ̀n.

53Kè Izràɛlviwo trɔ lè Filistìtɔwo yomè a, wo va hlà Filistìtɔwo be àsàɖaa. 54David sò Filistì ŋusùa be èta, eye be sɔ yì Yèruzàlɛm. E sɔ ŋusùa be àhùawɔ̀nuwo ɖo ye ŋutɔ be gòxɔ mè.

Wo ɖè David fiɔ Saolò

55Wàlɛbɛ kè David le yì, la kpe àkɔ ku Filistì ŋusùa, Saolò biɔ Abnɛ̀r, Izràɛlviwo be àhùaŋùkɔ̀nɔ̀tɔa be: “Àmè kɛ be èvi ye nyi ɖèkajɛ kèa ò, Abnɛ̀r?” Abnɛ̀r ɖo e ŋuti be: “Èfìɔ bùbùtɔ, mù tà àpo àgbè be nyè mu nya ò.” 56Èfìɔa ɖè ègbè na àhùaŋùkɔ̀nɔ̀tɔ Abnɛ̀r be: “Jè àgbàgba, wòa nya àmè kè be èvi ɖèkajɛ ŋua nyia.” 57Ekè David wù Filistì ŋusùa vɔ̀, eye be trɔ va àsàɖaa mèa, Abnɛ̀r, àhùaŋùkɔ̀nɔ̀tɔa kplɔ̀ David va èfìɔ Saolò be ŋùkɔ̀. 58Saolò biɔ David be: “Èvi nyè, àmè kɛ be èvi ye wò nyi ò?” David ɖo e ŋuti be: “Sumɔvi wò Jesè, so Bɛtlɛhɛ̀m be èvi ye mù nyi.”

Currently Selected:

1Samuɛl 17: GEN

Highlight

Copy

Compare