1Samuɛl 18
18
1Wàlɛbɛ kè David pò nupo ku Saolò vɔ̀a, David be ènu jɔ̀jì na Yonatàn, Saolò be ŋusùvi, ekèa na be Yonatàn lɔ̃ David sìgbè ye ŋutɔ ye ɖokoe nène. 2Gbè ŋua gbèa, Saolò zĩ David ji be ne ci yè gbɔ, eye mu lɔ̃ na ɛ̀ be ne trɔ jo yì ètɔa gbɔ ò. 3Lekè Yonatàn lɔ̃ David ɖoa na be Yonatàn ɖù èxlɔ̃ be èzò ku David. 4Yonatàn ɖè àwù gã kè be do a, eye be sɔ ɛ̀ na David. E sɔ yebe àhùawɔ̀nuwo cã na David. E sɔ yebe èwui, yebe àŋùdàti ku ègojiblanu kpe wo na David.
5David yìnà àfi sia àfi ku àhùagbe sia àhùagbe kè ji Saolò dɔ̃na ɛ̀ ɖoɖaa, eye be ɖùnà ji. Ekèa ŋutia, Saolò va sɔ David ɖo yebe àhùakɔ̃ tɔ̀xɛa nu. Ènu kèa jɔ̀jì na gbãdãgbãwo ku àhùaŋùkɔ̀nɔ̀tɔwo.
Saolò hùãŋu David
6Ekè Izràɛlviwo be àhùakɔ̃a trɔ gbɔ̀, wàlɛbɛ kè David wù Filistì ŋusùa vɔ̀a, nyɔ̃nùwo to so Izràɛl be èdùwo keŋu mè, va dogò èfìɔ Saolò. Wo le pòhũ, lè jìhà eye wo le ɖuwè, le do àpa ku jìjɔɛ. 7Nyɔnuàwo le ɖuwè, eye wo le to èhà ɖoɖa be: “Saolò wù àmè èkàwìvɔ-àtɔ̃, vɔ̀a, David ya wù àmè hotu ku hotu ji vɔwo!”
8Saolò bijì ŋutɔ, ɖoa, èhàa do àdɔ̀mèze na ɛ̀, eye be gblɔ̃ be: “Ãhã! Wo le yɔ hotu ku hotuwo ɖo David ŋuti, eye wo le yɔ èkàwìvɔ-àtɔ̃ ɖo ènyè ya, ŋuti nyè. E kpɔ̀tɔ̀ kpò woa sɔ ɛ̀ ɖofìɔ!” 9So gbè ŋua gbèa, Saolò mu gbà kpɔna David nyuɛ̃ ɖe ò.
Saolò glì David do
10Ekè èŋù kèa, Mawu ɖo gbɔ̃gbɔ̃ vuɛ̃ ɖe na Saolò, eye be gli lè yebe àxomè. David le pò èkà sãŋùgu na ɛ̀, sìgbè lekè be wɔ̀nà na Saolò kòkòkò, ne e glia nène. Saolò le èhuã ɖo àsi, gà ŋua mè. 11Zè ɖèkaa, Saolò dà èhuãa David, eye be gblɔ̃ be: “Mù la sɔ èhuã kèa trɔ̃ David ɖo èglì ŋuti!” Vɔ̀a, zè èvè sɔ̃ŋua, David zɛ̃ na èhuãa. 12Saolò le vɔ̃ na David, ɖoa, e sè be Tɔhonɔ̀ jo lè yè ji, va lè David ji. 13Ekèa ŋutia, Saolò ɖè David jo lè ye ɖokoe ŋuti, sɔ ɖo ŋùkɔ̀ na gbãdãgbã èkàwìvɔ-àtɔ̃ be àhùakɔ̃. So gà ŋua mèa, David yìnà àhùagbewo ji 14David ɖùnà ji lè àhùagbe ŋuawo keŋu ji, ɖoa, Tɔhonɔ̀ lè ku ì. 15Ekè Saolò kpɔ àlekè David le ɖùji ɖoa, Saolò gbà le vɔ̃ ɛ̀ kpe è. 16Vɔ̀a, Izràɛl dùkɔ̃a ku Yudà dùkɔ̃awo keŋu lɔ̃nà David be ènyà gbɔ, ɖoa, David ye nɔ̀nà ŋùkɔ̀ na woabe àhùakɔ̃a, yìnà, gbà gbɔ̀nà.
David ɖè Mikàl, Saolò be nyɔ̃nùvi
17Saolò gblɔ̃ na David be: “Kpɔɖa! Èvi nyè, nyɔ̃nùvi àmègãxoa, Mèrab ye nyi ekèa. Ne wò lɔ̃ be yèa wɔ̀dɔ ku ànùkua, lè àhùakɔ̃ nyè mè, eye wò la nɔ wɔ̀ Tɔhonɔ̀ be àhùawo kãlìwɔ̀tɔ̀a, mù la sɔ ɛ̀ na wò, wò la ɖè.” Saolò ɖè susu lè ye ɖokoe mè be: “Nyè mu jro be David ne crɔ̃ ci àsi nyè ò. Filistìtɔwo si bòhũ, mù jro be ne ci.” 18David ɖo e ŋuti na Saolò be: “Èfìɔ bùbùtɔ, àmè kɛ ye mù nyi ò? Xòmè nyè ku ètɔ nyè be hɛ̃nuwo mu nyi ènu ɖekpe lè Izràɛl-nyigbã ji ò. Àlekè èfìɔ bùbùtɔ la teŋu nyi èto nyè ɖo ò?” 19Vɔ̀a, wàlɛbɛ kè èfìɔ Saolò ɖo la sɔ èvia Mèrab na David be la ɖèa, Saolò sɔ Mèrab na Adriɛl kè nyi Abɛ̀l-Mèholà dùmè-ŋusùa.
20Gãkea, David be ènu jɔ̀jì na Mikàl, Saolò be nyɔ̃nùvi èvègɔ̃a cã. Kè ènyà kèa ɖo èfìɔ Saolò be èto mèa, e jè ŋùmè na ɛ̀. 21Saolò gblɔ̃ lè ye ɖokoe mè be: “Mù la sɔ Mikàl na David be la ɖè, eye Mikàl la nyi ègàmɔ kè mè Filistìtɔwo la ɖo àsi David ji lèa.” Nène a ye, zè èvègɔ̃a, Saolò gbà gblɔ̃ na David be: “Egbèa, mù la trɔ zũ èto wò.” 22Saolò ɖè ègbè na yebe àgbònùglawo be: “Mì yɔ David lè bèbe mè, ne mìa gblɔ̃ na ɛ̀ be: 'Ènu wò jènà ŋùmè na èfìɔa ŋutɔ. E jro la wɔ̀ ènyuɛ̃ na wò, eye yebe àgbònùglawo cã lɔ̃nà wò. Fifìa, lɔ̃ ne wòa nyi èfìɔa be ètoyɔvi.” 23Èfìɔa be ŋutimewo gblɔ̃ ènyà kèawo na David. David ɖo e ŋuti na wo be: “Mì xɔ̀sè be ènu vi ɖe be nyi be woa ɖè èfìɔ be èvia? Ènyè ya, wɔ̀amènɔ̀ mà ɖì ènu ɖekpe ye mù nyi.”
24Saolò be ŋutimeawo yì gblɔ̃ na èfìɔa be: “Ènyà kè David gblɔ̃a ye nyi ekèa:” Eye wo ɖè ènyà kè David gblɔ̃a na Saolò. 25Ekèa yomè a, èfìɔa gblɔ̃ be: “Mì yì to na David be, èfìɔa mu le ji àgbã ɖe na èsrɔ̃ɖèɖea, tovò na Filistìtɔwo be gbãdãgbãwo be àtɔ̀tɔ̀ àlɔ̀ ɖèka ò. Wo la wù wo, sɔ biɔ èhlɔ̃ so èfìɔ be kɛ̃tɔwo si.” Lekea, Saolò susu be yè la na David la ci Filistìtɔwo si. 26Saolò be àmèdɔ̃dɔ̃awo va do àŋɛ̀a na David. Ɖoɖo kèa nyɔ ŋùmè na David, ne bèa sɔ trɔ zũ èfìɔa be ètoyɔvi. Gà kè mè wo ɖo na Davida mu kpɔ sù ò, 27Vɔ̀a David kplɔ̀ yebe gbãdãgbãwo, eye wo jè èmɔ. E wù àmè àlɔ̀ èvè (200) lè Filistìtɔwo be gbãdãgbãwo dòmè. David hɛ̃ Filistìtɔ àlɔ̀ èvèawo be àtɔ̀tɔ̀wo gbɔ̀, eye wo hlɛ̃ wo lè èfìɔ Saolò be ŋùkɔ̀, ne David bèa trɔ zũ èfìɔa be ètoyɔvi. Ekèa yomè a, Saolò sɔ èvia Mikàl na David be ɖè.
28Ekè Saolò kpɔ, eye be sè e mè be Tɔhonɔ̀ lè ku David, eye ye ŋutɔ èvia Mikàl cã lɔ̃ Davida, 29Saolò gbà vɔ̃ David kpe è, eye be gbà crì ì kpe è.
30Wàlɛbɛ ŋua, Filistìtɔwo be àhùakɔ̃a gbà kpe àhùa ku Izràɛlviwo ke. Vɔ̀a, wè sia wè kè wo kpena àhùa ku Izràɛlviwoa, David be àhùakɔ̃a gbà ɖùnà Filistìtɔwo ji wu Saolò be àhùaŋùkɔ̀nɔ̀tɔ ɖekpe. Ekèa na be David be nyikɔ gbà le ɖì kpe è.
Currently Selected:
1Samuɛl 18: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
