1Samuɛl 16

Tɔhonɔ̀ do àmì èta na David

1Tɔhonɔ̀ gblɔ̃ na Samuɛl be: “Ŋùkèkè nenè ye wò la sɔ fã Saolò, àmè kè nyè ya mù gbe be mu la gbà nyi èfìɔ ɖo Izràɛlviwo nu ke ò. Kù àmì ɖɔ àpo èlã-zoa, ne wòa jè èmɔ. Mù le dɔ̃ wò ɖoɖa Jesè, Bɛtlɛhɛ̀m ŋusùa gbɔ, ɖo mù kpɔ èfìɔ kè jè na mù a lè èviawo dòmè.” 2Samuɛl gblɔ̃ be: “Leke mù la wɔ̀, la yì ò? Ne Saolò sè èa, e la wù mù.” Tɔhonɔ̀ gblɔ̃ be: “Wò la kplɔ̀ ènyì nɔvi ɖèka ɖo àsi, eye wò la gblɔ̃ be: 'Mù va la savɔ na Tɔhonɔ̀.' 3Wò la yɔ Jesè va èkɔ̀nua tèpe. Eye nyè ŋutɔ mù la fiɔ wò ènu kè wò la wɔ̀a. Wò la do àmì èta na àmè kè mù la ɖèfiɔ wòa, eye be la nyi èfìɔ kè la wɔ̀ èdɔ na mù a.”

4Samuɛl zɔ̃ ɖo Tɔhonɔ̀ be ègbèa ji, eye be yì Bɛtlɛhɛ̀m. Èdùa be àmè sĩsĩwo va dogò è ku vɔ̃vɔ̃. Wo biɔ ɛ̀ be: “Ɖàgbè lè àpo vavaa mèa?” 5Samuɛl ɖo e ŋuti be: “Ɛ̃ɛ, ɖàgbè lè e mè. Mù va, la savɔ na Tɔhonɔ̀. Mì lè mìa ɖokoewo ɖì, ne mìa kplɔ̀ mù do, mia yì savɔ na Tɔhonɔ̀.” Samuɛl na Jesè ku èviawo lè woa ɖokoewo ɖì, eye be kpe wo be woa kpɔ gomè lè èkɔ̀nua mè. 6Ekè wo ɖo tèpea, Samuɛl kpɔ Eliab, eye Samuɛl gblɔ̃ be: “E wɔ̀ na mù be àmè kè Tɔhonɔ̀ cã a ye nyi ekèa.” 7Vɔ̀a, Tɔhonɔ̀ gblɔ̃ na Samuɛl be: “Àmè kèa be nɔ̀nɔmè ku yebe àgbà mu gbà wɔ̀ èdɔ ɖo ji wò ò. Ɖoa, mu nyi e ye mù cã ò. Àpe ènu kpɔkpɔ mu nyi àgbètɔ be ènu kpɔkpɔ ò. Àgbètɔwo kpɔna ènu kè ze ɖo ŋùkuvi ji na woa, vɔ̀a, Tɔhonɔ̀ yaa, kaka èjì mè ye be kpɔna.”

8Jesè na Abinadab va Samuɛl be ŋùkɔ̀, vɔ̀a, gblɔ̃ be: “Tɔhonɔ̀ mu cã àmè kèa cã ò.” 9Jesè na Samà cã va, vɔ̀a Samuɛl gbà gblɔ̃ be: “Tɔhonɔ̀ mu cã àmè kèa cã ò.” 10Jesè na èvia àmè adrɛ̃ va Samuɛl be ŋùkɔ̀ nènea. Vɔ̀a, Samuɛl gblɔ̃ na Jesè be: “Tɔhonɔ̀ mu cã àmè kèawo dòmètɔ ɖekpe ò.” 11Samuɛl biɔ Jesè be: “Ŋusùvi wòawo keŋu vɔ̀a?” Jesè ɖo e ŋuti be: “E kpɔ̀tɔ̀ vifɛ̃ tɔa. Kpɔɖa, e kplɔ̀ àlɛ̃wo yì ènu ɖùgbe.” Samuɛl gblɔ̃ na Jesè be: “Dɔ̃ àmè ne woa yì kplɔ̀ ɛ̀ va. Ne mu va òa, mi mu la tɔ vɔsaa ji ò.”

12Jesè na wo yɔ ɛ̀ va. Ɖèkajɛ a be àgbàze mè bìa; yebe ŋùmè nya kpɔkpɔ, eye be jè ɖèkajɛ. Tɔhonɔ̀ gblɔ̃ be: “Sitè, do àmì èta na ɛ̀, ɖoa, àmè kèa ye.” 13Samuɛl sɔ àmì be àzò a, eye be do àmì èta na David lè fòfoawo dòmè. Tɔhonɔ̀ be Gbɔ̃gbɔ̃ ɖì ɖo David ji, so gbè ŋua gbè. Samuɛl jè èmɔ, eye be trɔ yì Ramà.

David wɔ̀ èdɔ na Saolò

14Tɔhonɔ̀ be Gbɔ̃gbɔ̃ jo lè Saolò ji, eye Tɔhonɔ̀ sɔ gbɔ̃gbɔ̃ vuɛ̃ ɖo Saolò ji. Gbɔ̃gbɔ̃ kèa le ɖè èfũ na Saolò. 15Saolò be sumɔ̃viwo gblɔ̃ na Saolò be: “Kpɔɖa, Tɔhonɔ̀ dɔ̃ gbɔ̃gbɔ̃ vuɛ̃ ɖe, kè le ɖè èfũ na wòa. 16Miabe àpetɔ ne gbe ɖè ègbè kpò. Sumɔvi wòwo lè èto ji. Wo la ji àmè ɖe kè pònà èkà-sãŋùgua. Eye, ne Mawu dɔ̃ gbɔ̃gbɔ̃ vuɛ̃ ɖe, le ɖè èfũ na wòa, àmèa la pò èkà-sãŋùgua, eye wò la xaya.” 17Saolò ɖo e ŋuti na yebe sumɔ̃viwo be: “Mì ji èkà-sãŋùgu pò tɔ nyuɛ̃ ɖe, ne mìa kplɔ̀ ɛ̀ va na mù.” 18Sumɔviawo dòmètɔ ɖèka ɖo e ŋuti be: “Mù jèsi Jesè kè nɔ̀nà Bɛtlɛhɛ̀m a be ŋusùvi ɖèka ŋutɔ cã. E pònà èkà-sãŋùgu nyuɛ̃ ɖe. Àmè nyuɛ̃ ɖe be nyi, eye e nyi kãlìwɔ̀tɔ. Ènunya zena lè yebe nupo pòpo mè. E jè ɖèkajɛ, eye Tɔhonɔ̀ lè ku ì.”

19Saolò dɔ̃ àmè ɖoɖa Jesè be: “Ɖo èvi wò David, àmè kè kpɔna èlãha jia ɖoɖa mù.” 20Jesè sɔ èsɔ-àkɛtɛ ɖèka, sɔ kpɔ̃nɔ, vɛ̃ ègò ɖèka, ku ègbɔvi ɖèka do àgbã na David, eye be dɔ̃ ɛ̀ be ne sɔ wo yì na Saolò. 21Ekè David ɖo Saolò gbɔa, e ɖo Saolò be èdɔ mè zè ɖèka. David be ènu jɔ̀jì na Saolò, àleke be Saolò sɔ David ɖo yebe àdèkplɔ̀vi trolo. 22E yomè a, Saolò dɔ̃ àmè ɖoɖa Jesè be wo ne to na ɛ̀ be: “Mù jro be David ne ci gbɔ nyè, ne bèa wɔ̀ èdɔ na mù, ɖoa, e jè ŋùmè na mù.” 23Nène a ye, ne Tɔhonɔ̀ be gbɔ̃gbɔ̃a le ɖè èfũ na Saolòa, David sɔna yebe èkà-sãŋùgua, eye be pònà ɛ̀ na Saolò. Ekèa nana be Saolò kpɔna gbɔ̃jɛ̃, e xayana, eye gbɔ̃gbɔ̃a jona lè Saolò ji.

Currently Selected:

1Samuɛl 16: GEN

Highlight

Copy

Compare