Galates 6
6
Tí tūtuǹ tɔb
1Nnabiyaamu, ni yaa cúú ubɔ bíi ŋáań ikpitee, nimbi bin Unimbɔti Fam kpòotēe ń ŋá soooo kí gíiǹ-u nsammɔnti poon, ní kí nīn kpèé ni-ba tiŋan ki mun ń taa lítí ni-ba. 2Ní nīn tútúǹ tɔb ni-gìŋ́ŋi poon, mimmee, ni bíi ŋáań min Kriisitoo marau lēe dee. 3Ubɔ yaa dākafì yii u bí tiban ní kaa bée, udaan kíiĺ u-ba ní. 4Báà ŋma ń cɔ̄ŋkì u-ba kí kpèè u-tuuŋŋi, ní u yaa làá nín gāā u-bindaaa, ú gāā an nīn sá úǹ u-ba ŋmaniŋma tuuŋŋi pu. Ú taa dū kí ŋmàntīǹ u-jutiibi yaŋ pu. 5Di sá yii báà ŋma máaǹ kí kpèè u-ba bɔti ní.
6Un bi yaa dàkà Unimbɔti bɔtee, udaan máaǹ kí lēē u-gaajawanti tin kɔkɔ u cááyee poon kí tīī un dàkà-uee.
7Taa nín̄ kíiĺmaan ni-ba: baa gbíilíǹ Unimbɔti. Di sá yii kun unil yaa búĺee, kúǹ ní u dāa cēē#6.7 Dūú ŋmàntī nì Yoob 4.8, Alaŋ 22.8, Oosee 8.7.. 8Un ŋáań min u-bimbikpitim lèe búĺ u-bimbikpitim dee, ní kí dāá cā ŋkúm. Ama un ŋáań min Circir Fam lèe búĺ Circir Fam dee, ní kí dāá cā dimaŋfal din kaa kúntée. 9Tí taa gīī kí gbèen̄ tiŋan diŋál. Ti-wunti yaa kaa yɔ̄tì, ŋyunti yaa láa bāań, ti làá dāá fōō tipaal. 10Míǹ puee, ŋyunti ŋun poon ti cáá mpaan nee, tí nīn ŋáań báà ŋma tiŋan, ama cilinjee tí nīn ŋáaḿmaan timbi nì bin pēē nnimbɔtisanee tiŋan.
Isaŋkijoolkaa nì ŋwimmeem
11Kpèèmaan, m nín dū m-ŋal ki ŋmàn̄ tiŋmaŋmabiti an gbìfì puee! 12Bin téekí-ni ní gíí dikpancandee là binib ń nīn nyí bi-pu dee. Kun pu bi ŋáań mimmee di sá baa là kí ká digìńdi Kriisitoo dɔpuntikaaŋu pu. 13Di sá yii bin gífì dikpancandee bi-ba kaa ŋúb̀ Mooyiisi marab. Kun pu bi là ní gííyee di sá bi là kí gāā bi-biŋŋi yii, ni-wunti daaŋku nee, bíǹ di páb́-ni ní ni ŋá. 14Maa là kí gāā m-bindi tiba pu kpataaa an yaa kaa sá ti-Dindaan Yeesu Kriisitoo dɔpuntikaaŋu baba pu. Man ceeyee duulinya kpíì ndɔpuntikaa pu, ní duulinya ceeyee ma mun kpíì ndɔpuntikaa pu. 15A yaa gíí dikpancandaaa, a yaa kaa gííyaaa, an kaa páb́, tin páb́ee di sá á kpántí unipɔɔn. 16Bin kɔkɔ làá nóó min m lī nee, Unimbɔti ń tīī-bi ŋgbansɔŋfi kí sɔ̄ bi-saai, ki kpáaǹ bin sá Isirayeel yab kiŋkiŋ Unimbɔti nibulee.
17Kí pée yòon̄ díǹ kí nīn cá, ubɔ ń taa ti ŋá-mi digìńdi, kun puee m-wunti buŋwati di sá Yeesu daanti.
18Nnabiyaamu, ti-Dindaan Yeesu Kriisitoo ŋanti ń nīn bí ni-pu! Ameeni.
Currently Selected:
Galates 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
