Galates 5

Ní taa fá ni-batɔl

1 Kriisitoo nyántì-ti kuyuŋun tí nīn tɔ́ ti-ba ní. Míǹ puee, ní nīn bímaan dibatɔlee ni, kí taa gíti kɔ́ kuyuŋun.

2Ní pīlifìmaan-mi! Man Pɔɔl bíi tùkù-ni yii, ni yaa yāntì bi gíí-ni dikpancandee, naa ti bíi páatí tiba Kriisitoo pu. 3M làá gíti bùsì kí tùkù uninja sá kamaa yii, un yaa yāntì bi gíí-u dikpancandee, an bàlifī ú nīn ŋúb́ Mooyiisi marab kɔkɔ ní. 4Nimbi bin kɔkɔ nyàab̀ kí nīn bí deedee Unimbɔti nimbiin nì marab ŋúbitam puee, ni nì Kriisitoo yākatì tɔbin, ni nyáń Unimbɔti bìintamin. 5An yaa sá timbee, ti máká ní ki kā ki cí kí kpántí deedeedambi Unimbɔti nimbiin, kun puee ti fōō Kriisitoo ki kíí ní Unimbɔti Fam bí ti-ni. 6A yaa kpántì Yeesu Kriisitoo yɔuee, a yaa gíí dikpancandaaa, a yaa kaa gííyaaa, an kaa páb́, kun di páb́ee di sá a-fookiiu ń nīn tūǹ ditundi nì dineendi.

7Ni nìn còom̄ tiŋan. Ŋma di pīiǹ-ni nsan ní gbèen̄ kí taa ti gbìl̄ kí tīiǹ ibaamɔn ní? 8An kaa sá un di yíì-ni ní nīn nóó-uee cee ní tíǹ nyánní. 9Ŋkpɔnɔnyɔkɔ fiii di yàntī kpɔnɔ saabu kɔkɔ jɔ́ḿ#5.9 Dūú ŋmàntī nì 1 Kɔra 5.6.. 10Ama man máká ni-pu yii ti-Dindaan puee, naa làá kpántí ni-landɔkɔi. Un di yaa cáań fìkil fikil ni-kansikinee, báà udaan yaa yāntì ki sá un, ditafadaaldi dɔ̄ ki cí-u.

11Nnabiyaamu, m yaan bíi tùkù binib yii an máaǹ bí gíí dikpancandee, ba pu ní bi bàà gíti páb̀-mi? M yaan lī míǹ, Kriisitoo dɔpuntikaaŋu bɔti kaa bàà sá tibɔti tin páb̀ binibee. 12M bàà là bin páb́-ni ní gííyee ń cù bí fàatī-bi.

13Míǹ puee, nnabiyaamu, ni ká yii Unimbɔti yíiń nimbi ní nīn bí dibatɔlin. Ní taa lákatí dibatɔlee pu kí nīn ŋáań min ni-bimbikpitim lèe, ama ní nīn néeń tɔb kí nīn tútúǹ tɔb. 14Di sá yii marab kɔkɔ taapu di sá unee, yii: «Á nīn néeń a-juti kii sii a-bee#5.14 Akoo 19.18..» 15Ama ní kpèè tiŋan: ni yaa bí ki júntí tɔb ki cátikí tɔbee, ni làá kúntí tɔb dee.

Tí yàntī Unimbɔti Fam ń kpòotī-ti

16Tin m tùkù-nee di sá yii ní yàntī Unimbɔti Fam ń kpòotī-ni, kí taa nín̄ nóó min ni-bimbikpitim bàlifēe. 17Di sá yii, ti-bimbikpitim nín là min miŋyee, Unimbɔti Fam kaa là míǹ, ní min min Unimbɔti Fam lèe, ti-bimbikpitim mun kaa là míǹ. Tiwan tilee jáaǹ tɔb ní. An di yì-tì ní taa ŋūǹ kí ŋá min ti bàà là kí ŋée#5.17 Dūú ŋmàntī nì Room 7.14-23.. 18Ama Unimbɔti Fam yaa kpòotī-nee, naa ti bí Mooyiisi marab taapu.

19An kaa pɔ̄ɔ̄ tí béé mbimbikpitim nín tūǹ atuun ŋin ti-wuntinee: an di sá tilaakpaal, tijɔkɔndi, bimaramɔntiibi fátam, 20diwaatootil, dinyɔɔjil, kináŋ, kujaau, kudɔ̀ŋu, diŋuul, ikummunti, diyakatil, digàntil, 21nnimbidiki, ndanyoon, mpoo, nì tin kɔkɔ náań nì tibɔti neeyee. Kii m nín nìn tùkū-ni puee, m tí bíi kpáafí-ni yii bin ŋáań an bɔti gbantee kaa dāa kóò Unimbɔti Beelin.

22Ama, dibil din Circir Fam yàntī unil ń lòoǹee di sá dineendi, dipɔɔpindi, ŋgbansɔŋfi, kimɔtii, á nīn sūǹ binib saai, kí nīn ŋáań tiŋan, kí nīn bí deedee, 23kí nīn mɔ̄, kí ŋúb́ a-ba. Mara ubɔ kaa bí ki jáà nì an bɔti gbanti. 24Di sá yii Yeesu Kriisitoo yab dū bi-bimbikpitim nì tin mì néeń ki lèe ki kpáá ndɔpuntikaa pu. 25Ŋfam nín tīī-ti dimaŋfalee, tí yàntī Ŋfamee ń nīn kpòotī ti-bimbim mun. 26Tí taa nín̄ yòontí ti-ba yilpu, kí taa nín̄ tákà tɔb tibɔti, kí taa nín̄ cáá ipoompoon tɔb pu.

Currently Selected:

Galates 5: BASSARDC

Highlight

Copy

Compare