Ephésiens 1

Ijaam

1Man Pɔɔl un Unimbɔti lēē ḿ nīn sá Yeesu Kriisitoo kpambalee di ŋmàn̄ kugbɔŋu nee.

M ŋmàn̄-ku kí tīī nimbi Unimbɔti yab bin kóò Eefeesi tiŋkin#1.1 Pɔɔl nín kāl̀ Eefeesi tiŋkin puee, kpèè Atuun 18.19-21, 19.1-40. ki yú deedee, ni nì Yeesu Kriisitoo ŋá ubaantee ní. 2Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

Unimbɔti ŋá-ti tiŋan Kriisitoo pu

3Ti jáaḿ Unimbɔti un sá ti-Dindaan Yeesu Kriisitoo Baayee u nín ŋá-ti tiŋan tin, ki dī u-Fam pu ki tīī-ti yilpu wammɔntiiti kɔkɔ ti nì Yeesu Kriisitoo nín ŋá ubaantee puee. 4Di sá yii, kí wàatī Unimbɔti ń náań duulinyee, u pée lútì-ti ki yóoǹ tí nīn sá u-yab, ti nì Kriisitoo ń ŋá ubaanti, tí nīn bí circir, ú taa ká ti-pu ikpiti iba. Unimbɔti neendi puee, 5ní u nìn pée lēē ki yóoǹ dooooyee yii, Yeesu Kriisitoo puee, u làá dāá dū-ti kí kpántí u-biyaamu. Di sá yii an nìn ŋān̄ u-cee ú ŋá míǹ, 6án nīn sá-u tinyool, tiŋaŋkpaandi tin u dī u-Jipɔnneeŋkaau pu ki ŋá ki tīī-tee pu.

7Kun puee, Kriisitoo kúm pu ní u fīī-ti ki nyántì tikpitilin, ní ki dū ti-kpitii ki pú-ti#1.7 Dūú ŋmàntī nì Kool 1.14.. U ŋá míǹ kí dàkà-ti u-neendi nín wīikí min bulifee ní. 8U-neendi gbanti nín wīikí tikpil puee, ní u tīī-ti iciin nì dinyil. 9Di sá yii u yāntì ti béè u nín là kí dī Kriisitoo pu kí ŋá tin nìn bí dibalin dooooyee. 10Tin u lēē kí ŋée di sá, ŋyunti yaa láa sāāyee, ú dāá kóoǹ tin bí yilpuee nì tin bí taapuee kɔkɔ kí kpāfì, Kriisitoo baba ń nīn sá ubɔti.

11Unimbɔti ŋáań tikɔkɔ kii u nín lēē ki là kí ŋá miŋyee ní, di sá yii u lútì-ti ki yóoǹ dooooyee tí nīn sá u-yab, ti nì Kriisitoo nín ŋá ubaantee pu. 12Mimmee, timbi bin sá bipeepeekaabi ki máká Kriisitoo puee, tí nīn pàkà-u u-nyooti pu.

13Nimbee, ni gbìl̄ ibaamɔn bɔti tin sá Kriisitoo Bɔmɔntiiti ki cáań-ni difiilee. Ni nín fōō ki kííyee pu, ní Unimbɔti dū u-daaŋku ki dáań-ni. Kudaaŋŋuee di sá Circir Fam min u nìn pōoǹee. 14U-Fam min u tīī-tee di dàkà yii difakal#1.14 difakal : An di sá unil baa nín dù u-gaajawanti kí tīī-u puee, àá ubɔ yaa kpíì u-nabiyaamu nín yòontí u-gaajawanti puee ní. din u pōoǹ kí tīī-tee dáá bíń boon ki dòoń ti làá fōō-dì. Mì tīī-ti dimákal yii ti làá dāá fōō difakalee ŋyunti ŋun Unimbɔti yaa láa nyántì u-yab kɔkɔ doo ki cáa cūnnì u-ceeyee. U ŋá míǹ tí nīn pàkà-u u-nyooti pu ní.

Pɔɔl wimmeem

15An puee, m nín gbìl̄ bi sòoǹ ni-fookiiu un ni cáá ti-Dindaan Yeesu puee, nì dineendi din ni cáá Unimbɔti yab kɔkɔ puee, 16m yaa bíi mèéyee m jáaḿ Unimbɔti ni-pu múlmul. 17M mèé ti-Baa tinyooldaan un sá ti-Dindaan Yeesu Kriisitoo Nimbɔtiuee ú tīī-ni iciin ní ŋmā kí béé-u, kí nīn nyí un Unimbɔti sée. 18M gíti mèé-u yii ú ŋmíntí-ni ní wāl̀ tiwammɔntiil tin pu u yíiń-nee, ní béé tigaajati tin u kpáafì ki yóoǹ nimbi bin sá u-yabee nín wīikí ki cáá tinyool puee, 19ní béé u-pɔŋkpaaŋŋu ŋun jítiǹ tikɔkɔ u cáa tūǹ timbi bin fōō-u ki kííyee pu atuunee. U-pɔŋkpaaŋŋu gbanti mbaantee ní u dàkā, 20ŋyunti ŋun u nìn fīkitì Kriisitoo ditaŋkpiilin ki yāntì u cūtìi kāl̀ u-ŋaŋgiil pú yilpuee#1.20 Kpèè Ilan 110.1.. 21Niin ní Kriisitoo tɔ́kɔ́ tikɔkɔ pu ki jīǹ dibeel biyidambi nì bibɔtiibi nì bipɔndambi kɔkɔ pu#1.21 Kpèè Kool 1.16.. Báà an yaa yāntì ki sá uŋyee, úǹ di jítiǹ báà ŋma duulinya un poon ti bí nee, nì un dáá bíń ki dòońee mun poon. 22Unimbɔti dū tikɔkɔ ní ki ŋá Kriisitoo taapu#1.22 Kpèè Ilan 8.7.. U dū-u tɔ́kɔǹ tikɔkɔ pu ní ki dū-u ki ŋá Kriisitoo Nikitil yil. 23Kriisitoo Nikitil di sá Kriisitoo wunti. Dinikitilee ni ní Kriisitoo bí gbīŋgbim ní Unimbɔti bí Kriisitoo ni mmɔm#1.23 Dūú ŋmàntī nì Kool 1.19..

Currently Selected:

Ephésiens 1: BASSARDC

Highlight

Copy

Compare