2 Corinthiens 5

1Ti nyí yii tiwun tin poon ti kóò duulinya nee poonee yaa kpíìyaaa, Unimbɔti kpáafì-ti tiwumpɔn tiba yilpu. Tiwun gbanti tíǹ sá kii kudii kun úǹ u-ba máńee ní tí nīn kóò poon jaanjaan. 2Ama kɔŋkɔnnee ti bí ki yáliŋkí#5.2 Dūú ŋmàntī nì Room 8.23. ki bàà nyàab̀ kí fōō yilpu wunti tin sá kii kudii kun Unimbɔti u-ba máńee. 3Kun puee taa làá tin nín̄ bí yilpu kaa cáá tiwun. 4Tiŋman timbi bin dáá kóò tiwun nee poonee, ti bí digìńdi nì falaabi poon ní. Ama taa là kí nyā tiwun tin sá taapu doo yatee poon. Ti là kí dū yilpu wunti ní kí dūú bìin̄ tin béeyee pu, án nín làá ŋá pu ní tiwun tin kúùyee ń nīn fúuń tin kaa kúùyee poon kí ká dimaŋfalee. 5Unimbɔti u-ba di bí yii ti-wunti ń dāá kpántí míǹ. U-Fam min u tīī-tee di dàkà yii u kpáafì tiwammɔntiil ki yóoǹ-ti ti làá dāá fōō.

6An puee ní ti cáá kunyannyaau baabadal. Ti nyí yii ti nín dáá kóò tiwun tin poonee, ti kóò ki dátiǹ ti-Dindaan. 7Ti fōō Unimbɔti nín lī puee ní ki kíí, taa láá ká nì ti-nimbiliŋ. 8Ti cáá kunyannyaau an júkufí-ti ti bàà là kí yīkì ti-wunti tin bí nee poon kí cù kí nīn bí ti-Dindaan cee. 9Ama tin ti nyàab̀ee di sá báà ti yaa bí tiwun nee poonaaa, ti yaa nyáń ti-naaa, tí fáatí-u. 10Kun puee an sá yii ti-kɔkɔ ń dāá kpāfì Kriisitoo nimbiin ní ú sòoǹ ti-bɔti ti nín kāl̀ duulinya poon ki dū ti-yuntiŋu ki ŋá diŋyee. An yaa sá ikpitaaa, an yaa tí sá tiŋanaaa, ní ú dāá pà báà ŋma u nín máaǹ tipaal tiŋyee#5.10 Dūú ŋmàntī nì Room 14.10..

Kriisitoo puee ti nì Unimbɔti kansikin mɔ́ɔkì

11Ti nín fàŋkí Unimbɔti puee ní ti bí ki nyàab̀ binib ń fōō-u kí kíí. Unimbɔti wāĺ-ti míǹ pílpil, m nyí yii ni mun nyí ti-pu míǹ ni-pɔbiliŋ poon. 12Kaa sá ti là kí fàtīí tí pàkà ti-ba ni-cee, ti là kí pɔ̄-ni nsan ní nīn mɔ̀ɔǹ ti-pu ní. Míǹ ní ni ŋūǹ kí ká tiba kí kíí bin di bí ki sòoǹ bi-nyɔmmu poon tibɔti fám ki kāntí tinyool, ama ní bi-pɔbiliŋ poon kūńee. 13Bi yaa yíì-ti biwaatiibaaa, an sá Unimbɔti pu ní bi yíì-ti míǹ. Bi yaa tí yíì-ti binimɔntiibaaa, an sá nimbi paatii ní. 14Kriisitoo neendi di jíń mpaan timbi pu, timbi bin nyí yii unibaanti di kpíì ti-kɔkɔ puee, mimmee ti-kɔkɔ mun kpíì deeyee. 15Úǹ di kpíì ti-kɔkɔ pu, án nín làá ŋá pu bin bí dimaŋfalinee ń taa nín̄ bí ki tīī bi-ba, ama bí nīn bí ki tīī un kpíì ki fīkitì bi-puee.

16An puee taa ti kpèé ubɔ nniyaamin. Ki kpáaǹ dooooyee ti yaa nìn kpèé Kriisitoo nniyaaminaaa, kɔŋkɔnnee taa ti kpèé-u míǹ. 17Un nì Kriisitoo ŋá ubaantee kpántì unipɔɔn dee, tin sá tikpikilee jítì, tipɔn di kíǹ ki bí. 18Unimbɔti di ŋá míǹ kɔkɔ. U dī Kriisitoo pu ki yāntì ti nì u mɔ́ɔkì ní ki dū ditundi nee ki ŋá ti-ŋaan yii tí cáań binib u nì bi ń mɔ̄ɔkì. 19Di sá yii Kriisitoo pu ní Unimbɔti dī ki cáań binib ní u nì bi mɔ́ɔkì, kaa fātìi tɔ́ bi-kpitii in bi ŋée pu. U dū dimɔɔkil gbanti tundi ki ŋúbiǹ-ti tí sòoǹ nì binib.

20An puee Kriisitoo nyɔkɔpu ní ti làá sòoǹee, a lì kii Unimbɔti u-ba di dī timbi pu ki yíì-nee. Ti dū Kriisitoo ki gbāam̀-ni, ní kíí kí yàntī ni nì Unimbɔti ń mɔ̄ɔkì. 21Timbi kɔkɔ puee, Unimbɔti yāntì Kriisitoo un kaa ŋá ikpiti ki kée fōō timbi kpitii, án nín làá ŋá pu u-puee, tí kpántí deedeedambi Unimbɔti nimbiinee.

Currently Selected:

2 Corinthiens 5: BASSARDC

Highlight

Copy

Compare