2 Corinthiens 4

Tigaajawan tin kā aboonnee

1An sá tiŋan ní Unimbɔti ŋá-ti ní ki dū ditundi nee ki ŋúbiǹ-ti. An pu ní ti-wunti kaa yɔ̀tī di-pu. 2Ti fá dibɔmbɔndi nì icoo tuuŋŋi. Taa ŋmàtíǹ binib, kaa kpántí Unimbɔti bɔti, ama Unimbɔti nimbiin ní ti sòoǹ ibaamɔn ki cántí ki tùkù binib ki nyàab̀ báà ŋma ń béé yii tin ti sòoǹee sá ibaamɔn. 3An puee bin wáŋkèe ceeyee, Unimbɔti bɔti tin ti sòoǹ nee sá dibɔmbɔndi ní ki tīī-bi. 4Kun pu baa fōō-tì ki kííyee di sá Sitaan un sá duulinya nee bɔtiuee#4.4 Dūú ŋmàntī nì Yoow 12.31. jɔ̀b̄-bi ki yāntì baa wāĺ Tibɔmɔntiilee nín ŋmíntí ki dàkà-bi Kriisitoo un sá Unimbɔti naŋkuee nyooti. 5Di sá yii taa bíi sòoǹ nì ni timbi ti-ba bɔti, Yeesu Kriisitoo bɔti ní ti sòoǹ nì ni yii úǹ di sá ti-Dindaan. Úǹ pu ní timbi sá ni-tɔntɔnliibi. 6Di sá Unimbɔti un bí yii: «Ŋwalifi ń ŋmíntí dibɔmbɔndinee#4.6 Kpèè Diny 1.3.,» úǹ u-ba di ŋmíntì ti-pɔbiliŋ poon ki yāntì ti ká Kriisitoo nimbiin Unimbɔti nyooti nín jìl̀ miŋyee.

7Ama timbi bin u dū Tibɔmɔntiil tin sá tigaajawanee ki ŋúbiǹee, ti sá kii aboonee ní. Taa pɔ̄ɔ̄, ní tigaajawan kā ti-ni, án nín làá ŋá pu binib ń béé yii mpɔŋkpaan ŋun bí ti-ni ki tūǹ ditundee nyánní Unimbɔti ceeyee, an kaa nyánní timbi cee. 8Falaabi kɔkɔ nì bi-nyɔkɔm nyìitī-ti, ama ti mun kaa wìil̄. Tiwan tikpil bàkantí-ti, ama ti mun kaa páatí ti-mákal Unimbɔti pu. 9Bi jì-ti, ama Unimbɔti kaa yàntī bí cúú-ti. Bi líikí-ti kitiŋ, ama ti mun kaa kúù. 10Baabadalee bi dī-ti kí kpɔ̀-ti kii bi nín nìn dī Yeesu puee, án nín làá ŋá pu bí ká dimaŋfal din Yeesu cááyee ti mun nee. 11Yeesu puee, ŋyunti kamaayee ŋkúm pée kpàkaǹ-ti ní. Báà ti yaa jíń falaa ní ki dāa kpíì, binib làá béé yii Yeesu bí ti-ni. 12Timbi bí ŋkúmin, ama ní ki cāabìń nimbi dimaŋfal.

13A lì kii Unimbɔti gbɔŋku poon nín lī puee yii: «M fōō ki kíí, an pu ní m sòon̄#4.13 Kpèè Ilan 116.10..» Nlandɔkɔ gbanti mbaanti ní ti mun cáá, ti mun fōō Unimbɔti ki kíí, an pu ní ti sòoǹ. 14Ti nyí un fīkitì ti-Dindaan Yeesu ditaŋkpiilinee làá dāá fìkitī ti mun kii u nín fīkitì Yeesu puee, ní kí dāá cáá ti nì ni-kɔkɔ kí kàan̄ u-cee. 15Nimbi pu ní ti jīǹ falaa gbanti, án nín làá ŋá pu Unimbɔti nín tīī diyimɔɔl diŋyee ń bà báà ŋma, bí kpāfì kunipaau kí jāam̀ Unimbɔti tinyooldaan u-ŋanti puee.

Fookii ń nīn kpòotī-ti

16An pu ní ti-wunti kaa yɔ̀tī. Báà an yaa sá yii ti-wunti tin poon ti bí nee yaa bíi nàantí ki sìntāaa, dimaŋfapɔndi din bí ti-nee làá nīn pée pɔ̀ntī ní ki cá. 17Kɔŋkɔnnee ti nín bíi jīǹ falaa un fiii nee di bíi bɔ́ntí tinyookpaandi tin kaa cáá dikúntil taa ŋūǹ kí dūú ŋmàntīǹ tibee ki yōontí-ti. 18An puee timbi nimbikpeeŋu bá tin baa wāĺee pu ní, kaa sá tin bi wāĺ nee pu. Di sá tin bi wāĺee kaa yúntí, ama tin baa wāĺee, tíǹ làá nīn pée bí ní kí nīn cá jaanjaan.

Currently Selected:

2 Corinthiens 4: BASSARDC

Highlight

Copy

Compare