2 Corinthiens 6
6
1Di sá yii timbi nì Unimbɔti di bí ki tūǹ ditundi, an pu ní ti mèé-ni yii ní taa yàntī diyimɔɔl din ni fōō u-ceeyee ń ŋá fám. 2Unimbɔti lī u-gbɔŋku poon yii:
«M-niti yuntiŋuee, m nìn pílifiǹ-si,
m nìn tútúǹ-si difiil wiiŋŋu a ká difiil#6.2 Kpèè Yees 49.8..»
An puee Unimbɔti niti yuntiŋu sèé, difiil wiiŋŋu sèé.
3Taa là kí bàkan̄-ni báà tiba nì tiba poon, án nín làá ŋá pu ubɔ ń taa ká ibɔkpiti iba ti-tundi nee pu kí lèe. 4Ama ti pée dàkà ti-bimbim kɔkɔ poon yii ti sá Unimbɔti tɔntɔnliibi ní, ní ki jīǹ kimɔtii tikpil, falaabi nì kunimbaau nì dinimbinaamandi poon. 5Bi gbáà-ti ki cáǹ-ti ki pìintí kudii#6.5 Kpèè Atuun 16.23., ki mèé tijáti ki tòó ti-pu, ki yàntī ti tūǹ atuun ŋin pɔ̄ɔ̄yee, kaa kāntí ŋgeem, kaa jīǹ tijin. 6Ti-nyaŋkanti nì ti-nyil nì kimɔtii nì ti-niti nì Circir Fam pɔŋŋu nì dineembaamɔndi ní ti cáa dàkà yii ti sá Unimbɔti tɔntɔnliibi. 7Ti sòoǹ Unimbɔti bɔti tin sá ibaamɔnee nì u-pɔŋŋu ní ki dàkà yii ti sá Unimbɔti tɔntɔnliibi. Ti nín yú deedee nì Unimbɔtee di sá tijanjawan tin ti cáa jáàyee, nì tin ti cáa cí ti-bee. 8Ŋyunti ŋubɔee, bi tìì-ti tinyool, ní ŋyunti ŋubɔee, bi kɔ̄ntí-ti icoo. Ŋyunti ŋubɔee, bi sòoǹ ti-pu tin ŋān̄ee, ní ŋyunti ŋubɔee, bi sòoǹ ti-pu tikpitil mun. Bi kpèé-ti kii binyimɔndambee, ama ní ti mun sòoǹ ibaamɔn. 9Bi kpèé-ti kii báà ubɔ kaa nyí-tee, ama ní báà ŋma nyí-ti. Bi kpèé-ti kii bin làá kpúee, ama ní ti mun kaa kúù. Bi dátí ti-tafal, ama ní kaa kù-ti. 10Bi kɔ̄ntí-ti kunimbaau, ní timbi bí dipɔɔpindin. Bi kpèé-ti yii ti sá bisoodambi, ama timbi di tìì binib tikpil Unimbɔti gaajati. Bi kpèé-ti yii taa pée cáá tiba nì tiba, ama ní ti mun di cáá tikɔkɔ nì tikɔkɔ.
11Nimbi Kɔranti yab, ti sòon̄ nì ni ti-poon bɔti kɔkɔ ki pīitì ti-pɔbiliŋ ki tīī-ni. 12Timbi pīitì ti-pɔbiliŋ ki tīī-ni, nimbi di kaa pīitì ni-yaŋ. 13M bíi sòoǹ nì ni kii ubaati nín sòoǹ nì u-biyaamu puee ní: kii ti nín néeń-ni miŋyee puee, pìitīmaan ni-pɔbiliŋ kí tīī-ti.
Taa fōōmaan bin kaa nyí Unimbɔtee bimbim
14Ni nì binib bin kaa nyí Unimbɔtee ń taa kpāfì kí ŋá ubaanti. Nnyɔɔpee ŋulɔŋu di bí tin bí deedeeyee nì tin kaa bí deedeeyee kansikin? Mana ní dibɔmbɔndi nì ŋwalifi ŋūǹ kí kpāfì? 15Mana ní Kriisitoo nì Sitaan ŋūǹ kí pèen̄ kinyɔkɔ? Àá ba nyɔɔpeeŋu di bí unimbɔtinool nì un kaa nyí Unimbɔtee kansikin ní? 16Mana ní Unimbɔti nì awaa ŋun kí pèen̄ kudii? Timbi sá Unimbɔti un bí dimaŋfalinee diiku ní#6.16 Dūú ŋmàntī nì 1 Kɔra 3.16., a lì kii Unimbɔti u-ba nín lī puee, yii:
«M làá nīn kóò m-nibul cee,
ní kí nīn còom̄ bi-kansikin.
Man di làá nīn sá bi-Nimbɔtiu,
ní bíǹ ń nīn sá man nibul.»
17An pu ní Unimbɔti lī u-nibul yii:
«Ní nyā binib nee kansikin kí gàntīmaan ni-ba,
kí taa gbēē tin sá tijɔkɔndee,
ní man ń nín fōō-ni,
18kí nīn kíǹ ki sá ni-Baa,
ní ni mun ń nīn kíǹ ki sá man jipɔmbi nì m-bisalib.
Ti-Dindaan Mpɔŋkɔdaan di lī míǹ#6.18 B. 16: Akoo 26.12, Eesee 37.27. - B. 17: kpèè Yees 52.11, Eesee 20.34. - B. 18: kpèè 2 Sami 7.14, Yees 43.6..»
Currently Selected:
2 Corinthiens 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
