Arumi 14

Utsʼimulamule mujeso munzio ni mulongo

1 # Akol 2:16 Enehu a chijeso, mwimwi akubalini ajeso ario ni atsanga. Na tsʼikaleni atʼu a zhogoro nao kwenda dzulu ya gago agaonago ni madzo, na gago agaonago ni mai. 2Mufano udzo ni uu: mujeso yedzikomala chiroho, unaidima kukala na kuluphiro ra kurya leu rorosi. Ela mutsanga yiye, akakala na kuluphiro ra kurya mutsunga tu bahi. 3Ndo yendakala unarya leu rorosi, naatsʼimuphurye yetsʼirya vyosi. Na yiye aryaye mutsunga tu bahi, naatsʼimone una dambi yiye aryaye vyosi, kwakukala, yiye wakubaliwa ni Mulungu. 4Mutʼu kʼana haki kamare ya kumulamula muhendikazi wa mutʼu munjine, una makosa. Ga kulamula muhendikazi unahenda kaziye chividzo hebu tsʼivyo, yiyo ni kazi ya yiye mwandiki mwenye tu. Chitʼu ni kwamba, muhendikazi undahenda kaziye chividzo, kwakukala, Bwana undamwidimisa.

5Atʼu anjine anaona kukala, tsʼiku fulani ndiyo takatifu. Ela anjine o, anaona tsʼiku zosi zi sawa. Ndo chila mumwenga naatuwe gago agaonago ni ga haki. 6Aonaye kukala, tsʼiku fulani ndiyo takatifu ya kumwabudu Bwana, unaaza vivyo kwa amuhamye. Aryaye leu rorosi, unahenda vivyo kumwishima Bwana, mana, kʼarya photsʼimulavira mumvera. Na aremao kurya vitʼu fulani nao, anahenza kumuhamya Bwana, na kumulavira mumvera. 7Maana, siswi ajeso kʼakuna hata mumwenga asagalaye kwa dzuluye mwenye, na afaye kwa dzuluye mwenye. 8Siswi huchikala hu moyo, hu moyo kwa dzulu ya Bwana, na huchifa, hunafa kwa dzulu ya Bwana. Ndo siswi vivi hurivyo hu moyo, hwa Bwana, na hata huchifa, chisha hwa Bwana vivyo. 9Na gago ndigo gatumago hata Kʼirisito wafa na achifufuka, kwa hata akale Bwana wa atʼu ario moyo, na afadzi. 10#2 Akor 5:10Ndo kwadze sambi anjine anaalamula ndugu zao a chijeso kukala ni adambi? Na kwadze sambi anjine anaaphurya ndugu zao a chijeso? Bee, tsʼigahendeni gago, kwakukala, siswi hosi hundaima mbere za Mulungu, ahulamule. 11#Isa 45:23Vivyo vinagwa sawa na gogombwa ni Bwana Mulungu mwakwe Maandikoni kukala,

“Dza vivyo nirivyo moyo,

chila mutʼu undamitʼa mavindi mbere zangu,

na chila mumwenga undakubali kukala,

mimi ndimi Mulungu wa jeri.”

12Ndo chila mumwenga wehu undaudzidza mwenye Mulungu, dzulu ya gakwe gosi gogahenda.

13Ndo siswi ajeso nahutsʼilamulaneni kahiri, itsʼiphokala, nahwamuleni kutsʼahenda maneno ga kwakwaza ndugu zehu a chijeso, hebu ga kwabitʼa. 14Kwa widimi wa Bwana Jeso, ninamanya, na nina kanuni kamare kukala, kʼakuna leu ririro ni haramu kurya. Ela mutʼu achikala unakuluphira kukala, chitʼu fulani ni haramu, bee chitʼu chicho chinakala haramu jeri kwakwe. 15Mutʼu achimushononesa nduguye wa chijeso kwa kurya vyakurya fulani arivyo yiye unavyona ni haramu, bee undakala kʼamwenzi kahiri. Ndo nahutsʼibanangeni anziehu ario Jeso Kʼirisito wafa kwa dzulu yao, kwa kurya vyakurya virivyo kwao anavyona ni haramu. 16Tsʼiahendeni atʼu anjine amulamule munahenda mai, kwa kurya vivyo vyakurya vyenu murivyo munavimanya tsʼi haramu. 17Maana, ga halahala mazagazini mwa mutʼu atawalwaye ni Mulungu, ni kuhenda ga haki, kusagala na reri, na kuhamirwa, garigo gosi garehewa ni Roho wa Mulungu. Ela tsʼi ga kurya na kunwa tu! 18Kwa vivyo, amuhikirayehikiraye Jeso Kʼirisito na njira yiyo, unamuhamya Mulungu, na unahenzwa ni atʼu. 19Ndo enehu a chijeso, siswi ukati wosi hunahenzwa huhende maneno gaahendago atʼu asagale phamwenga na reri, na ga kujengana chiroho.

20Mutʼu naatsʼibanange kazi ya Mulungu kwa leu tu! Maleu gosi ni madzo ga kurya. Ela ni vii mutʼu kurya utʼu urio undamukwaza nduguye wa chijeso. 21Neno idzo ra kuhenda siswi, ni kutsʼarya nyama, kunwa divai, hebu kuhenda chochosi chiricho uchichihenda, chinaidima kumukwaza nduguyo wa chijeso. 22Mutʼu vyakwe akuluphiravyo dzulu ya maneno gago, bee gago nagakale gakwe na Mulunguwe tu. Mwimwi nimumanye kukala, ni baha yuyatʼu ariye kʼadzisikira una makosa ahendapho nenore aronaro ni ra haki. 23Ela mutʼu achirya utʼu na chilili, Mulungu unamulamula una makosa. Maana, undakala uhenda utʼu urio unakuluphira ni ui, na yeyosi ahendaye utʼu wowosi urio unaukuluphira ni ui, unahenda dambi.

Currently Selected:

Arumi 14: CHIDUR

Highlight

Copy

Compare