Arumi 15

1Ndo siswi hurio hudzikomala chiroho, hunahenzwa huuvumirireni o unyonge wa ajeso ario ni atsanga, na hunahenzwa hutsʼituweni wa kuhenda gago gahuhamirago siswi enye tu. 2Itsʼiphokala, chila mumwenga wehu unahenzwa amuhamye munziwe, kwa kumuhendera madzo kwa hata ajengeke chiroho. 3#Zab 69:9Siswi hunahenzwa huhende vivyo, kwakukala, hata yiye Jeso Kʼirisito, chisha kʼahendere maneno gokala gamuhamira yiye mwenye bahi. Gakwe gohenda ganagwa sawa na Maandiko ga Mulungu gaambago, “Gosi gogombwa ni atʼu phokala anakwifya, bee vivi gadziniuyira mimi.” 4Na gosi garigo mumo Maandikoni ga Mulungu gáandikwa kwa gahufunze siswi. Gago ganahutiya moyo, na ganahuhenda hukale na kuluphiro vivi hutarizavyo na kuvumirira golagwa ni Mulungu. 5Mimi ninamuvoya Mulungu ariye ndiye ahutiyaye moyo, na ndiye ahuhendaye hukale avumiriri kukala, amuhende mosi mwerekezane, vivyo mutuwavyo mufano wa Jeso Kʼirisito, 6kwa hata mwimwi mosi mugwirane chivimwenga mumulike Mulungu, Abaye Bwana wehu Jeso Kʼirisito.

Nguma Mbidzo yinaafikira atʼu a makabila manjine

7Kwa vivyo enehu a chijeso, mwimwi kubaliyanani dza Jeso Kʼirisito arivyomukubali, na vivyo vinamuhenda Mulungu alikwe. 8Maana, ninamwambira mino kukala, Jeso Kʼirisito wakudzaahikirahikira Ayahudi konyesa kukala, Mulungu unagachimiza jeri goalaga akare a Ayahudi. 9#2 Sam 22:50; Zab 18:49Na chisha, aahende atʼu a makabila manjine amulike Mulungu, kwakukala, una mbazi nao. Maneno gago ganagwa sawa na Maandiko ga Mulungu gaambago,

“Kwa vivyo, mimi nindakulavira mumvera uwe kati ya atʼu a makabila manjine,

na phapho, nikwimbire mira ya kukulika uwe.”

10 # Kʼumb 32:43 Fungu rinjine ra Maandiko ga Mulungu rinaamba,

“Hamirwani chivimwenga na atʼue

mwimwi atʼu a makabila manjine!”

11 # Zab 117:1 Pʼande yinjine vivyo ya Maandiko ga Mulungu yinaamba,

“Mulikeni Bwana Mulungu mwimwi atʼu a mataifa gosi,

na atʼu a viryomo vyosi, naamulike.”

12 # Isa 11:10 Na mugomvi wa Mulungu Isaya naye waandika vivi,

“Kundakudza mutʼu wa mudzungu wa Jese,

na yiye undakala mutawali,

aatawale atʼu a makabila manjine,

na ao andamukuluphira.”

13Ndo ninamuvoya Mulungu yiye amuhendaye mukuluphire kukala, amuhende muhamirwe muno, na mukale na reri kwa munamukuluphira Jeso, na phapho Roho wa Mulungu amuhende mukaze kukuluphira muno kuchirira widimiwe.

Pʼaulo arivyoahikirahikira atʼu a makabila manjine

14Enehu a chijeso, mimi mwenye mwiri nina kanuni mwimwi namwi mu atʼu adzo muno, munagamanya chividzo gago muhenzwago muhende, na kwa vivyo, munaidima kukanyana. 15Elako, maneno manjine mumu baruwani nidzimwandikira lwazu-lwazu kwa nimukumbikize. Mimi nidzihenda vivyo, kwakukala, Mulungu wanipʼa chipaji 16cha kukala kuhani wa Jeso Kʼirisito niahikirehikire atʼu a makabila manjine. Mimi vivi ninahenda kazi ya chikuhani kwa kwasumurira Nguma Mbidzo ya Mulungu, kwa hata ao atʼu a makabila manjine, akale dza sadaka yimuhamirayo Mulungu, kwakukala, Roho wa Mulungu waatakasa. 17Ndo mimi nina ngulu kwa gohendwa ni Jeso Kʼirisito kuchirira mimi kwenye yo kazi yangu ya kumuhikirahikira Mulungu dza kuhani. 18Na mimi tsʼindagomba manjine kamare hata nigomba dzulu ya gohendwa ni yiye Jeso Kʼirisito, gago ga kunihenda niahende atʼu a makabila manjine amogophe Mulungu. Mino ao náahenda amogophe Mulungu kwa goambira, gogahenda, na 19kwa widimi wa vilinge na mautʼu-mautʼu ga kwangalaza, garigo gáhendwa kuchirira widimi wa Roho wa Mulungu. Ndo mimi nidzizunguluka chila phatʼu kusumurira Nguma Mbidzo dzulu ya Jeso Kʼirisito, kwanzira Jerusalemu hata jimbo ra Iliriko. 20Na chisha, rangu nirazaro kwenda mimi Pʼaulo, bee ni kusumurira Nguma Mbidzo kutʼu kuriko atʼu kʼaadzangwe kuyisumurirwa yo Nguma Mbidzo dzulu ya Jeso Kʼirisito, kwa hata nitsʼidze nikakala dza kwamba ninajenga nyumba yoanzwa ni mutʼu munjine. 21#Isa 52:15Gago ganagwa sawa na Maandiko ga Mulungu gaambago,

“Atʼu ario kʼaasumuririrwe ngumaze, andaona,

na o atʼu ario kʼaadzangwe kusikira ngumaze, ndio ondamanya.”

Mipango ya Pʼaulo ya kwatsemberera ajeso a Rumi

22 # Arum 1:13 Mimi nina kʼano nyinji zodzaza kudza kwenu, ela gago ga kuzunguluka ndigo godzinigwira. 23-24Ela mimi vivi nina mipango ya kudza kwenu, mana, yo kazi yokala ninahenzwa niyihende kuku niriko, vivi náyimala, na kamare hata náanza pʼindi ko kuhenza kudza ko kwenu. Mimi nindakala na charo cha kwenda itsʼi ya Sipania. Na mupango wangu ni kwamba, nichikala ninenda kuko, nindachira na ko kwenu huhamirweni phamwenga kwa chiwango, na chidzako muniavize na charo changu cha kwenda ko Sipania. 25#1 Akor 16:1-4Ela vivi mimi ni charoni nenda Jerusalemu, kwendaaphirikira wavizi atʼu a Mulungu. 26Wavizi uu ulaa kwa ajeso a majimbo ga Makedonia na Akaya, ario áamula kulavya enye na raha, kwa aavize ajeso ario Jerusalemu. 27#1 Akor 9:11Ao áhenda vivyo na raha, na ni haki ao kwaaviza ao. Maana, kwahivira atʼu a makabila manjine áphokera manoso ga chiroho kuchirira Ayahudi, ao nao anahenzwa aavize Ayahudi kwapʼa gao arigo ana haja nago vivyo. 28Ndo mimi nichimala yiyi kazi ya kuhakikisha nidziapʼa Ayahudi pʼesa zao zosi zotsangirwa, nindaanza charo changu cha kwenda Sipania, ela nindachira na ko kwenu. 29Mimi ninamanya kukala, nichidza kuko kwenu, nindamuhenda munoswe muno ni Jeso Kʼirisito.

30Ela ninamuvoya vivyo enehu a chijeso kwa dzina ra Bwana wehu Jeso Kʼirisito kukala, mudine kunivoyera Mulungu, na mimi mwenye nami nidzidina kuvoya. Gago gahendeni kwa vivyo hwidimiswavyo kuhenzana ni Roho wa Mulungu. 31Mwimwi nivoyerani kukala, nitsʼihenderwe ui wowosi ni o atʼu otsʼikuluphira Jeso Kʼirisito kuko itsʼi ya Judea, na kukala, ajeso a Jerusalemu nao, akaukubali uu wavizi wangu oahendera. 32Gago gachihendeka na Mulungu achihenza, mimi nindakudzakala na ukati udzo na mwimwi, na noye. 33Mulungu ariye ndiye ahuhendaye hukale na reri, naakale namwi mosi! Amina.

Currently Selected:

Arumi 15: CHIDUR

Highlight

Copy

Compare