Arumi 13

Atʼu naaogophe vilongozi

1Enehu a chijeso, atʼu osi naaogophe vilongozi, mana, vilongozi, o ulongozi wao áhewa ni Mulungu, na vivyo ni kwamba, hata o ario analongoza vivi, bee ni áikwa ni yiye Mulungu. 2Ndo apingaye ulongozi, bee unapinga utʼu oikwa ni Mulungu, na yeyosi ahendaye vivyo, bee unadzihenda mwenye alamulwe. 3Maana, vilongozi kʼaaogofya atʼu ahendao madzo, ela aogofya atʼu ahendao mai. Ndo uchikala unahenza utsʼikale moga na vilongozi, henda madzo, na yiye chilongozi undakulika. 4Maana, chilongozi ni muhendikazi wa Mulungu, na unahenda kazi kwa uwe ukale phadzo. Ela uchihenda mai, hʼaya kala moga naye, mana, widimi wa kukutiya akili unao jeri. Na chisha, alamulapho na kwatiya akili atʼu ahendao mai, ukala unahenda kazi ya Mulungu vivyo. 5Ndo atʼu anahenzwa aaogophe vilongozi, na naatsʼiaogophe kwa kogopha kutiywa akili tu. Ela naaogophe kwakukala, anamanya yiyo ndiyo haki. 6#Mat 22:21; Mar 12:17; Luk 20:25Mwimwi chisha muna haki ya kuripha kodi, kwakukala, munamanya vilongozi achihenda kazi yao, anahenda kazi ya Mulungu. 7Ndo achikala mutʼu una deni ra munziwe, naaririphe. Na kodi naririphwe, na awiryao kwishimiwa na kogophewa, naahenderwe gago.

Kuhenzana ni kuchimiza Shariya

8Ajeso asena, mwimwi riphani madeni genu gosi mwiswago, hata musale na mwenga tu ra kuhenzana. Mutʼu ahenzaye munziwe, bee unachimiza malagizo gosi ga Shariya. 9#Kul 20:14; Kʼumb 5:18; Kul 20:13; Kʼumb 5:17; Kul 20:15; Kʼumb 5:19; Kul 20:17; Kʼumb 5:21; Alaw 19:18Malagizo gaambago, “Utsʼizinge, utsʼiulage, utsʼiiye, utsʼitamani cha munzio,” gago gosi ganagwa tsʼini ya lagizo mwenga tu rambaro, “Muhenze jiranio dza vivyo udzihenzavyo uwe mwenye.” 10Amuhenzaye munziwe, kʼaidima kumuhendera mai. Ndo ahenzaye munziwe, ukala unachimiza malagizo gosi ga Shariya.

11Ndo enehu a chijeso, manyani mugahende gaga, kwakukala, mwimwi munamanya ufika o ukati. Mwimwi vivi laiwani ni usingizi, kwakukala, yo tsʼiku yiriyo siswi hundativywa ni Mulungu, yifika muno hata tsʼi dza hiphara huriphoanza kumukuluphira Jeso Kʼirisito. 12Vivi usiku wenda uchisira, na ku phephi na kucha. Ndo nahutsʼihendeni maneno mai gahendwago ni atʼu ario dzizani, hata nahuhendeni maneno madzo gahendwago ni atʼu ario mwangani. 13Menenzi gehu ganahenzwa gakale madzo konyesa kukala, hu atʼu husagalao mwangani. Siswi hunahenzwa hutsʼikaleni atʼu a kuhenda maneno gosi garehewago ni unwadzi, maneno gosi ga chidiya, na hunahenzwa hutsʼilumbaneni, hebu konerana chidzitso. 14Ela hunahenzwa hukale dza Bwana wehu Jeso Kʼirisito, na hutsʼililikane kamare dzulu ya tʼamaa mbii za chimwiri.

Currently Selected:

Arumi 13: CHIDUR

Highlight

Copy

Compare