ROMA 7

Paanggid gikan sa Kasal

1Wala bala kamo makahibalo, mga kauturan—kay nagahambal ako sa mga nakahibalo sang kasogoan—nga ang kasogoan may kagamhanan sa tawo sa nagakabuhi lamang sia? 2Sa amo ang babayi nga nakasal nahigot sang kasogoan sa iya bana samtang nga buhi sia; apang kon mapatay ang bana mahilway sia sa kasogoan nahanungud sa bana. 3Gani, kon sia nagapangabuhi upud sa iban nga lalaki samtang buhi ang iya bana, tawgon sia nga makihilahion. Apang kon mapatay ang bana mahilway sia sa sinang kasogoan, kag indi sia makihilahion kon pangasaw-on sia sang iban nga lalaki.

4Subong man, mga kauturan ko, kamo napatay sa kasogoan paagi sa lawas ni Cristo, agud nga mangin-iya kamo, sia nga nabanhaw agud nga makapamunga kita nga sa Dios. 5Sang nagakabuhi kita sa unud, ang makasasala nga mga balatyagon, nga ginpainit sang kasogoan, nagpanghikot sa aton nga mga bahin sa pagpamunga nga sa kamatayon. 6Apang karon nahilway kita sa kasogoan, nga patay sa sadtong naghigot sa aton, agud nga nagaalagad kita sa bag-ong kabuhi sang Espiritu kag indi sa daan nga nasulat nga kasogoan.

Sala nga Nagapuyo sa Sulud

7Niyan ano bala ang aton isiling? Sala bala ang kasogoan? Malayo ina! Apang, wala ako kuntani makakilala sing sala, kon indi tungud sa kasogoan. Wala ako kuntani makakilala sang paghamkon kon ang kasogoan wala magsiling, “Dili ka maghamkon.”#Ex. 20:17; Deut. 5:21. 8Apang ang sala, sang nakakita sing kahigayonan sa sogo, nagpanghikot sa akon sang tanan nga bagay sang paghamkon. Sa walay kasogoan ang sala patay. 9Nagkabuhi ako sang una nga walay kasogoan, apang sang pag-abut sang sogo, nabuhi ang sala kag ako napatay; 10ang amo nga sogo nga nagsaad sing kabuhi nanginkamatayon sa akon. 11Kay ang sala, sang nakakita sing kahigayonan sa sogo, naglimbong sa akon kag paagi sini ginpatay ako. 12Gani ang kasogoan balaan, kag ang sogo balaan kag matarung kag maayo.

13Niyan nanginkamatayon bala sa akon ang maayo? Malayo ina! Amo yadto ang sala, nga nagapanghikot sing kamatayon sa akon paagi sinang maayo, agud nga ang sala mapakita nga sala, kag paagi sa sogo manginlakas nga sala. 14Aton nahibaloan nga ang kasogoan espirituhanon; apang ako lawasnon, nga ginbaligya sa idalum sang sala. 15Ang akon ginabuhat wala ko mahangpi. Kay wala ko ginahimo ang luyag ko, apang ginahimo ko ang butang gid nga ginadumtan ko.#Gal. 5:17. 16Karon kon ginahimo ko ang indi ko luyag, nagasugut ako nga ang kasogoan maayo. 17Gani niyan indi na ako ang nagahimo sini, kondi ang sala nga nagapuyo sa akon. 18Kay nakahibalo ako nga sa akon, kon sayoron, sa akon unud, walay nagapuyo nga maayo. Ang pagbuut sing maayo yari sa akon, apang indi ako makahimo sini. 19Kay ang maayo nga luyag ko wala ko ginahimo, apang ang malaut nga indi ko luyag amo ang ginahimo ko. 20Karon kon ang indi ko luyag ginahimo ko, indi na ako ang nagahimo sini, kondi ang sala nga nagapuyo sa akon.

21Gani nasapwan ko nga ini kasogoan nga kon luyag ko maghimo sing maayo, ang malaut malapit gid. 22Kay nagakalipay ako sa kasogoan sang Dios, sa akon nasulud gid nga kaugalingon, 23apang nakita ko ang tuhay nga kasogoan sa akon mga bahin nga nagapakig-away batok sa kasogoan sang akon hunahuna kag nagadala sa akon sa kabihagan sa kasogoan sang sala nga yari sa akon mga bahin. 24Kailo ako nga tawo! Sin-o bala ang magaluwas sa akon sa sining lawas sang kamatayon? 25Nagapasalamat ako sa Dios paagi kay Jesu-Cristo nga aton Ginoo! Gani niyan, ako gid sa hunahuna nagaalagad sa kasogoan sang Dios, apang sa unud nagaalagad ako sa kasogoan sang sala.

Currently Selected:

ROMA 7: ABHIL82

Highlight

Copy