ROMA 6

Patay sa Sala

1Niyan ano bala ang aton isiling? Magapadayon bala kita sa sala agud nga ang bugay magbugana? 2Malayo ina! Kita nga napatay sa sala paano bala ang pagkabuhi pa naton sa sini? 3Wala bala kamo makahibalo nga tanan kita nga ginbautisohan kay Cristo Jesus ginbautisohan sa iya kamatayon? 4Busa paagi sa bautismo ginlubung kita kaupud niya sa kamatayon, agud nga subong nga si Cristo ginbanhaw paagi sa himaya sang Amay, amo man kita magginawi sa bag-ong pagkabuhi.#Col. 2:12.

5Kay kon nahiusa kita sa iya sa kaanggid sang iya kamatayon, kita gid mahiusa sa iya sa kaanggid sang iya pagkabanhaw. 6Nakahibalo kita nga ang aton daan nga tawo ginlansang sa cruz kaupud niya agud nga ang lawas nga makasasala mawala, kag indi na kita magpaulipon sa sala. 7Kay ang napatay nahilway sa sala. 8Apang kon napatay kita kaupud ni Cristo, nagatoo kita nga magakabuhi man kita kaupud niya. 9Kay nakahibalo kita nga si Cristo nga nabanhaw indi na gid mapatay liwat; ang kamatayon wala na sing kagamhanan sa iya. 10Ang kamatayon nga ginkamatay niya ginkamatay niya sa sala, sing makaisa, apang ang kabuhi nga iya ginakabuhi ginakabuhi niya sa Dios. 11Gani man kabiga ninyo ang inyo kaugalingon nga patay sa sala apang buhi sa Dios sa kay Cristo Jesus.

12Busa dili ninyo pagpahari-a ang sala sa inyo mga lawas nga mamalatyon, sa pagtuman sang mga kailigbon. 13Dili ninyo itugyan ang inyo mga bahin sa sala subong nga galamiton sang pagkadimatarung, kondi itugyan ang inyo kaugalingon sa Dios subong nga buhi gikan sa mga patay, kag ang inyo mga bahin subong nga mga galamiton sang katarungan sa Dios. 14Kay ang sala manginwalay kagamhanan sa inyo, sanglit indi kamo sa idalum sang kasogoan kondi sa idalum sang bugay.

Mga Ulipon sang Pagkamatarung

15Ano niyan? Magapakasala bala kita bangud nga indi kita sa idalum sang kasogoan kondi sa idalum sang bugay? Malayo ina! 16Wala bala kamo makahibalo nga kon nagatugyan kamo sang inyo kaugalingon sa bisan kay sin-o subong nga mga ulipon nga matinumanon, mga ulipon kamo sang inyo ginatuman, ukon sang sala, nga nagadala sa kamatayon, ukon sang pagkamatinumanon, nga nagadala sa pagkamatarung? 17Apang salamat sa Dios, nga bisan kamo mga ulipon anay sang sala nanginmatinumanon kamo gikan sa tagiposoon sa sadtong huwaran sang pagtolon-an nga gintugyanan sa inyo, 18kag, sang nahilway kamo sa sala, nangin-ulipon kamo sang pagkamatarung. 19Nagahambal ako subong nga tawo, bangud sang kinaugali ninyo nga mga kaluyahon. Kay subong nga gintugyan ninyo anay ang inyo mga bahin sa kahigkoan kag sa daku kag daku pa nga kalautan, gani karon itugyan ninyo ang inyo mga bahin sa pagkamatarung nga sa pagkabalaan.

20Sang mga ulipon kamo sang sala, hilway kamo nahanungud sa pagkamatarung. 21Apang niyan ano bala nga bunga ang inyo naagum sadtong mga butang nga inyo karon ginakahuya? Ang katapusan sadtong mga butang amo ang kamatayon. 22Apang karon nga nahilway kamo sa sala kag nangin-ulipon sang Dios, may bunga kamo nga sa pagkabalaan kag ang katapusan sini, kabuhi nga walay katapusan. 23Kay ang bayad sang sala kamatayon, apang ang bunayag nga dolot sang Dios kabuhi nga walay katapusan kay Cristo Jesus nga aton Ginoo.

Currently Selected:

ROMA 6: ABHIL82

Highlight

Copy