ROMA 8

Kabuhi sa Espiritu

1Busa wala na karon sing katagudilian sa mga yara kay Cristo Jesus. 2Kay ang kasogoan sang Espiritu sang kabuhi kay Cristo Jesus naghilway sa akon sa kasogoan sang sala kag kamatayon. 3Kay ang indi mahimo sang kasogoan, nga maluya bangud sa unud, nahimo sang Dios: sa pagpadala sang iya kaugalingon nga Anak sa kaanggid sang unud nga makasasala kag tungud sa sala,#8:3 Ukon kag subong nga halad-tungud-sa-sala. nagtagudili sia sang sala sa unud, 4agud nga ang ginakinahanglan sang kasogoan matuman sa aton, nga nagaginawi indi sono sa unud kondi sono sa Espiritu. 5Kay ang mga nagakabuhi sono sa unud nagahimulat sang mga butang sang unud, apang ang mga nagakabuhi sono sa Espiritu nagahimulat sang mga butang sang Espiritu. 6Kay ang paghunahuna sono sa unud kamatayon, apang ang paghunahuna sono sa Espiritu kabuhi kag paghidait. 7Kay ang panghunahuna sono sa unud batok sa Dios; wala ini sia nagapasakup sa kasogoan sang Dios, indi gid sarang makapasakup; 8kag ang mga sa unud indi makapahamuut sa Dios.

9Apang kamo wala sa unud, kondi sa Espiritu, kon matuud nga ang Espiritu sang Dios nagapuyo sa inyo. Ang bisan sin-o nga walay Espiritu ni Cristo indi iya sia. 10Apang kon si Cristo yara sa inyo, bisan ang inyo mga lawas patay bangud sang sala, ang inyo mga espiritu buhi bangud sang pagkamatarung. 11Kon ang Espiritu sang nagbanhaw kay Jesus nagapuyo sa inyo, ang nagbanhaw kay Cristo Jesus magahatag sing kabuhi man sa inyo mga lawas nga mamalatyon paagi sa iya Espiritu nga nagapuyo sa inyo.

Mga Masigkamanunubli kay Cristo

12Gani niyan, mga kauturan, mga mangungutang kita, indi sa unud, sa pagkabuhi sono sa unud— 13kay kon nagakabuhi kamo sono sa unud kamo mapatay, apang kon paagi sa Espiritu ginapakamatay ninyo ang mga buhat sang lawas magakabuhi kamo. 14Kay ang tanan nga ginatuytuyan sang Espiritu sang Dios mga anak sang Dios. 15Kay wala kamo makabaton sang espiritu sang kahiolipnan nga sa kahadluk liwat, kondi nakabaton kamo sang espiritu sang pagkaanak. Kon nagatuaw kita, “Abba! Amay!” 16ang Espiritu gid nagasaksi upud sa aton espiritu nga mga anak kita sang Dios, 17kag kon mga anak, niyan mga manunubli,#Gal. 4:5-7. mga manunubli sang Dios kag mga masigkamanunubli ni Cristo, kon matuud nga nagaantus kita kaupud niya agud nga paghimayaon man kita kaupud niya.

Ang Paghandum sa Himaya nga Palaabuton

18Ginakabig ko nga ang mga pag-antus sa karon nga tion indi takus nga ikapaanggid sa himaya nga ipahayag sa aton. 19Kay ang hanoot nga pagpaabut sang tinuga nagahulat sang pagpahayag sang mga anak sang Dios; 20kay ang tinuga nasakup sa kaluyahon, indi sa iya kaugalingon nga kabubut-on kondi sa kabubut-on sadtong nagsakup sa iya sa paglaum; 21bangud nga ang tinuga gid hilwayon sa kahiolipnan sang pagkamadinulunton kag makaagum sang mahimayaon nga kahilwayan sang mga anak sang Dios. 22Aton nahibaloan nga ang bug-os nga tinuga nagaugayong sa kasakit sing tingub tubtub karon; 23kag indi lamang ang tinuga, kondi kita man, nga may nahaunang mga bunga sang Espiritu, nagaugayong sa sulud naton nga nagahulat sang pagkainanak, nga amo ang pagtubus sang aton mga lawas. 24Kay sa sining paglaum naluwas kita. Karon ang paglaum nga makita indi paglaum. Kay sin-o bala ang nagalaum sang iya makita? 25Apang kon nagalaum kita sa wala naton makita, ginahulat ta ini nga may pagpailub.

Labi pa sa mga Mandadaug

26Sa amo nga bagay ang Espiritu nagabulig sa aton kaluyahon; kay indi kita makahibalo magpangamuyo sing nagakaigo, apang ang Espiritu gid nagapatunga tungud sa aton nga nagapakilooy nga may mga pag-ugayong nga dimamitlang. 27Kag ang nagausisa sang mga tagiposoon nakahibalo kon ano ang hunahuna sang Espiritu, bangud nga nagapatunga nga nagapakilooy sia tungud sa mga balaan sono sa kabubut-on sang Dios.

28Nahibaloan naton nga sa tagsa ka butang ang Dios nagapanghikot nga sa ikaayo upud sa mga nagahigugma sa iya, ang mga ginatawag sono sa iya tinutuyo. 29Kay ang ginkilala niya nga daan gintangdoan man niya nga daan nga manginsono sa larawan sang iya Anak, agud nga manginpanganay sia sa madamung mga kauturan. 30Kag ang iya gintangdoan nga daan gintawag man niya; kag ang gintawag niya ginpakamatarung man niya; kag ang ginpakamatarung niya ginhimaya man niya.

31Niyan ano bala ang aton isiling sa sini? Kon ang Dios apin sa aton, sin-o bala ang batok sa aton? 32Sia nga wala magpaiway sang iya kaugalingon nga Anak kondi nagtugyan sa iya tungud sa aton tanan, paano bala nga indi sia maghatag sing bunayag sa aton man sang tanan nga butang kaupud niya? 33Sin-o bala ang makasumbung batok sa mga pinili sang Dios? Ang Dios amo ang nagapakamatarung; 34sin-o bala ang nagatagudili? Si Cristo Jesus amo ang napatay, hoo, ang ginbanhaw, nga yara sa too sang Dios, nga nagapatunga nga nagapakilooy man tungud sa aton. 35Sin-o bala ang magapahamulag sa aton sa gugma ni Cristo? Ang kangitngitan bala, ukon kasakit, ukon paghingabut, ukon tiggulutum, ukon kahubo, ukon katalagman, ukon espada? 36Subong sang nasulat,

“Tungud sa imo ginapamatay kami sa bug-os nga adlaw;

naisipan kami subong sang mga carnero nga ilihawon.”#Sal. 44:22.

37Wala, sa tanan sining butang labi pa kita sa mga mandadaug paagi sa iya nga naghigugma sa aton. 38Kay ginatalupangud ko nga bisan ang kamatayon, ukon kabuhi, ukon mga manugtunda, ukon mga punoan, ukon mga butang nga sa karon, ukon mga butang nga palaabuton, ukon mga gahum, 39ukon kataasan, ukon kadadalman, ukon bisan ano nga iban nga tinuga, indi sarang makapahamulag sa aton sa gugma sang Dios nga yara kay Cristo Jesus nga aton Ginoo.

Currently Selected:

ROMA 8: ABHIL82

Highlight

Copy