MGA SALMO 139
139
Ang Dalayon nga Pagtambong sang Dios kag ang Bug-os Niyang Paghibalo
Sa pangolong manuglanton. Salmo ni David.
1O Ginoo, nausisa mo ako kag nakilala ako!
2Nakilala mo ang akon paglingkod kag ang akon pagtindug;
nahangpan mo kutub sa malayo ang akon hunahuna.
3Ikaw nagausisa sang akon banas kag sang akon paghigda,
kag nakakilala sang tanan ko nga dalanon.
4Kay wala sing polong sa akon dila,
kondi, yari karon, O Ginoo, ikaw nakahibalo sini sing bug-os.
5Nalikupan mo ako sa likod kag sa atubangan,
kag ginabutang mo ang imo kamut sa akon.
6Ang amo nga ihibalo tama ka makatilingala sa akon;
mataas ini, indi ako makalambut sini.
7Sa diin bala ako makadto palayo sa imo Espiritu?
Ukon diin bala ako malagyo gikan sa imo atubangan?
8Kon magsaka ako sa langit, yadto ka didto!
Kon maghigda ako sa Sheol, yadto ka didto!
9Kon gamiton ko ang mga pakpak sang kaagahon
kag magpuyo sa kaukbungan gid sang dagat,
10bisan pa didto tuytuyan ako sang imo kamut,
kag ang imo too nga kamut magakaput sa akon.
11Kon magsiling ako, “Sa pagkamatuud ang kadudulman lamang magatabon sa akon,
kag ang kapawa sa palibut nakon manginkagab-ihon,”
12bisan ang kadudulman wala nagalipud sa imo, ang kagab-ihon nagabanaag subong sang adlawon;
ang kadudulman kag ang kapawa alangay sa imo.
13Kay ikaw naghuman sang akon mga kasudlan,
ginputus mo ako sa tiyan sang akon iloy.
14Magapasalamat ako sa imo, kay ginhimo ako sing makahalangawa
kag makatilingala.
Makatilingala ang imo mga binuhatan!
Ang akon kalag nakakilala sing maayo sini;
15ang akon lawas wala matago sa imo,
sang ginhimo ako sa tago,
ginhikot sing mauti sa manubo gid nga mga duug sang duta.
16Ang imo mga mata nakakita sang akon wala mahuman nga kinaugali;
sa imo tolon-an nasulat na sila tanan,
ang mga adlaw nga ginpat-ud nga sa akon,
bisan sang wala pa sila.
17Daw ano ka bilidhon man sa akon ang imo mga panghunahuna, O Dios!
Daw ano kadaku ang kadamuon nila!
18Kon isipon ko sila, madamu pa sila sa balas.
Kon magmata ako, yara pa ako upud sa imo.
19Sa pagkamatuud patyon mo ang malauton, O Dios,
busa palayo sa akon kamo nga mga tawo nga makidugoon,
20kay nagapamolong sila sing malaut batok sa imo,
kag ang imo mga kaaway nagagamit sa wala sing pulus sang imo ngalan!
21Wala bala ako nagadumut, O Ginoo, sa mga nagadumut sa imo?
Kag wala bala ako nagakalisud sa mga nagatindug batok sa imo?
22Ginadumtan ko sila sa himpit nga pagdumut;
sila nanginkaaway ko.
23Usisaa ako, O Dios, kag kilalaha ang akon tagiposoon!
Tilawi ako kag kilalaha ang akon mga panghunahuna!
24Kag tan-awa kon may bisan ano nga malaut nga dalanon sa akon,
kag tuytuyi ako sa dalan nga dayon!
Currently Selected:
MGA SALMO 139: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
