LEVITICO 26
26
Ang mga Kaayohan sang Pagtuman
(Deut. 7:12-26; 28:1-14)
1“Dili kamo maghimo nga sa inyo sing mga diosdios#Lev. 19:4. ukon magpatindug sing larawan nga tinigban#Ex. 20:4; Deut. 5:8; 16:21-22; 27:15. ukon obelisco, kag dili kamo magbutang sa inyo duta sing bato nga dinagwayan, sa pagyaub sini; kay Ako amo ang Ginoo nga inyo Dios. 2Bantayan ninyo ang akon mga inugpahuway kag tahoron ang akon santuario: Ako amo ang Ginoo.
3“Kon maglakat kamo sa akon mga palatukuran kag magbantay sang akon mga sogo kag maghimo sa ila, 4niyan ihatag ko ang inyo mga ulan sa ila panag-on, kag ang duta magapatubas, kag ang mga kahoy sang latagon magapatubas sang ila bunga. 5Kag ang inyo paglinas magalambut tubtub sa tigpamopo, kag ang tigpamopo magalambut tubtub sa tigsalab-ug; kag magakaon kamo sang inyo kalan-on sa kabulusgan, kag magapuyo nga may kalig-on sa inyo duta. 6Kag magahatag ako sing paghidait sa duta, kag magahigda kamo, kag wala sing magapahadluk sa inyo; kag dulaon ko ang malaut nga mga sapat sa inyo duta, kag ang espada indi mag-agi sa inyo duta. 7Kag lagson ninyo ang inyo mga kaaway, kag magakapukan sila sa espada sa atubangan ninyo. 8Ang lima sa inyo magalagas sing isa ka gatus, kag ang isa ka gatus sa inyo magalagas sing napulo ka libo; kag ang inyo mga kaaway magakapukan sa espada sa atubangan ninyo. 9Kag magakahamuut ako sa inyo kag himoon ko nga magmabungahon kamo kag magpabu-ad sa inyo, kag magapakigkatipan sa inyo. 10Kag magakaon kamo sang laon nga dugay na natago, kag pagowaon ninyo ang laon bangud sang bag-o. 11Kag ipahamtang ko ang akon layanglayang sa tunga ninyo, kag ang akon kalag indi magkangil-ad sa inyo. 12Kag magalakat ako sa tunga ninyo, kag mangin-inyo Dios, kag kamo mangin-akon katawohan.#2 Cor. 6:16. 13Ako amo ang Ginoo nga inyo Dios, nga nagpagowa sa inyo gikan sa duta sang Egipto, agud nga indi kamo mangin-ulipon nila; kag ginbugto ko ang mga tabang sang inyo gota kag ginpalakat ko kamo sing tadlong.
Ang mga Silot sang Pagkadimatinumanon
(Deut. 28:15-68)
14“Apang kon indi kamo magpamati sa akon, kag indi maghimo sini tanan nga sogo, 15kon isikway ninyo ang akon mga palatukuran, kag kon ang inyo mga kalag magkangil-ad sang akon mga pagsolondan, sa bagay nga indi kamo maghimo sang tanan nakon nga mga sogo, kondi maglalis sang akon katipan, 16ako man magahimo sini sa inyo: magatangdo ako sing kakugmat sa inyo, sang anus, kag sang hilanat nga magapahayas sang mga mata kag magapakag-as sang kalag. Kag magasab-ug kamo sa walay pulus sang inyo binhi, kay kaonon ini sang inyo mga kaaway; 17ipahamtang ko ang akon nawung batok sa inyo, kag laglagon kamo sa atubangan sang inyo mga kaaway; gahuman kamo sang mga nagadumut sa inyo, kag magapalagy kamo nga walay nagalagas sa inyo. 18Kag kon sa sini nga mga butang indi pa ako ninyo pagpamatian, niyan silotan ko kamo sing makapito pa tungud sang inyo mga sala, 19kag lumpagon ko ang bugal sang inyo gahum, kag himoon ko ang inyo langit subong sang salsalon kag ang inyo duta subong sang saway; 20kag ang inyo kusug gamiton sa walay pulus, kay ang inyo duta indi maghatag sang iya patubas, kag ang mga kahoy sang latagon indi magpatubas sang ila bunga.
21“Niyan kon maglakat kamo sing sumpung sa akon, kag indi magpamati sa akon, magadala ako sing makapito pa ka kalalat-an sa inyo sono sa inyo mga sala. 22Kag ipadala ko sa inyo ang sapat sang latagon, nga magakawat sa inyo sang inyo mga anak, kag magalaglag sang inyo kahayupan, kag magapapilagpilag sa inyo, kag ang inyo mga dalanon manginmamingaw.
23“Kag kon tungud sini nga mga butang indi kamo magbalhin sa akon, kondi maglakat sing sumpung sa akon, 24niyan ako man magalakat sing sumpung sa inyo, kag laglagon ko kamo, ako gid, sing makapito tungud sang inyo mga sala. 25Kag magadala ako sing espada sa inyo, nga magahikot sang pagtimalus sang katipan; kag tiponon kamo sing tingub sa sulud sang inyo mga banwa kag magapadala ako sang kamatay sa tunga ninyo, kay itugyan kamo sa kamut sang kaaway. 26Kon kuhaon ko ang inyo tinapay nga inugkabuhi, magabibingka ang napulo ka babayi sang inyo tinapay sa isa ka horno, kag ipanagtag nila sa inyo ang inyo tinapay tungud sa timbang; kag magakaon kamo, kag indi mabusug.
27“Kag kon tungud sini tanan indi kamo magpamati sa akon, kondi maglakat sing sumpung sa akon, 28niyan magalakat ako sing sumpung sa inyo sa kasingkal, kag silotan ko kamo sing makapito tungud sang inyo mga sala. 29Magakaon kamo sang unud sang inyo mga anak nga lalaki, kag sang unud sang inyo mga anak nga babayi. 30Kag laglagon ko ang inyo mataas nga mga duug, kag pudlon ang inyo mga larawan sang adlaw, kag ihaboy ang inyo mga bangkay sa mga lawas sang inyo mga diosdios; kag ang akon kalag magakangil-ad sa inyo. 31Kag wagwagon ko ang inyo kabanwaanan, kag pamingawon ang inyo mga santuario, kag indi ako magsinghut sang baho sang inyo mga pahumut. 32Kag pamingawon ko ang duta, agud nga mabulong sa iya ang inyo mga kaaway nga nagapuyo sa iya. 33Kag paaplaagon ko kamo sa kapungsuran, kag gabuton ko ang espada sa olihi ninyo; kag ang inyo duta manginmamingaw, kag ang inyo kabanwaanan manginkawagwagan.
34“Niyan ang duta magapangalipay sang iya mga inugpahuway samtang nga mamingaw sia, kag didto kamo sa duta sang inyo mga kaaway; niyan ang duta magapahuway, kag magapangalipay sang iya mga inugpahuway. 35Samtang nga mamingaw sia may pahuway sia, bisan ang pahuway nga wala niya maagum sa inyo mga inugpahuway sang nagpuyo kamo sa iya. 36Kag nahanungud sa nabilin sa inyo, padalhan ko sing kahadluk sa ila tagiposoon sa mga duta sang ila mga kaaway; kag ang kulas sang pinalid nga dahon magalagas sa ila, kag magapalagyo sila subong sang nagapalagyo gikan sa espada, kag magakapukan sila nga walay nagalagas. 37Magakadusmo kamo sa isa kag isa, subong nga daw sa atubangan sang espada, sa walay nagalagas; kag wala kamo sing gahum sa pagtindug sa atubangan sang inyo mga kaaway. 38Kag madula kamo sa kapungsuran, kag lamunon kamo sang duta sang inyo mga kaaway. 39Kag ang mga nabilin sa inyo magakag-as sa kalautan sa kadutaan sang inyo mga kaaway; kag magakag-as sila sa mga kalautan man sang ila mga ginikanan upud sa ila.
40“Apang kon magatu-ad sila sang ila kalautan kag sang kalautan sang ila mga ginikanan sa ila paglapas batok sa akon, kag bangud man nga naglakat sila sing sumpung sa akon, 41gani ako man naglakat sing sumpung sa ila kag nagdala sa ila sa duta sang ila mga kaaway; kon niyan magpaubus ang ila tagiposoon nga dicircuncidado kag sila magbaton sang silot sang ila kalautan, 42niyan magadumdum ako sang akon katipan kay Jacob,#Gen. 28:13-14. kag magadumdum man ako sang akon katipan kay Isaac#Gen. 26:3-4. kag magadumdum man ako sang akon katipan kay Abraham,#Gen. 17:7-8. kag magadumdum ako sang duta. 43Apang ang duta bayaan nila, kag magapangalipay sang iya mga inugpahuway samtang mamingaw sia nga wala sila; kag batonon nila ang silot sang ila kalautan, bangud nga ginsikway nila ang akon mga pagsolondan, kag ang ila kalag nagkangil-ad sang akon mga palatukuran. 44Walay sapayan sina tanan, kon didto sila sa duta sang ila mga kaaway, indi ako magsikway sa ila, kag indi ko pagkangil-aran sila sa paglaglag sa ila sing bug-os kag sa pagbungkag sang akon katipan sa ila; kay Ako amo ang Ginoo nga ila Dios; 45apang magadumdum ako tungud sa ila sang katipan sang ila katigulangan, nga ginpagowa ko gikan sa duta sang Egipto sa itololok sang kapungsuran, agud nga mangin-ila ako Dios: Ako amo ang Ginoo.”
46Ini sila amo ang mga palatukuran kag mga pagsolondan kag mga kasogoan nga ginhimo sang Ginoo sa tunga niya kag sang katawohan sang Israel, sa Bukid nga Sinai paagi kay Moises.
Currently Selected:
LEVITICO 26: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
