LEVITICO 25
25
Ang Inugpahuway nga mga Tuig kag ang Tuig sang Hinugyaw
1Ang Ginoo nagsiling kay Moises sa Bukid nga Sinai, 2“Isiling sa katawohan sang Israel, Kon magsulud kamo sa duta nga ihatag ko sa inyo, ang duta magbantay sing inugpahuway sa Ginoo. 3Sab-ugan mo sa anum ka tuig ang imo uma, kag panapsan mo ang imo ulubasan sa anum ka tuig, kag pamopoon ang iya mga bunga; 4apang sa ikapito nga tuig inugpahuway sang maligdong nga pahuway nga sa duta, inugpahuway sa Ginoo; dili mo pagsab-ugan ang imo uma, ukon pagpanapsan ang imo ulubasan. 5Ang dagakan sang imo alanyon dili mo pag-anihon, kag ang mga uvas sang imo balagon nga wala mapanapsi dili mo pagpamopoon; tuig ini sang maligdong nga pahuway nga sa duta. 6Ang bunga sang inugpahuway sang duta manginkalan-on nga sa inyo, sa imo kag sa imo alagad nga lalaki kag alagad nga babayi kag sa imo sinoholan kag sa imo dumuloong nga nagapanlugayaw upud sa imo; 7manginkalan-on ang tanan nga patubas niya sa imo kahayupan kag sa kasapatan nga yara sa imo duta.#Ex. 23:10-11.
8“Kag mag-isip ka nga sa imo sing pito ka inugpahuway sang mga tuig, pito ka pito ka tuig, agud nga sa imo may mga adlaw sang pito ka inugpahuway sang mga tuig nga kap-atan kag siam ka tuig. 9Niyan ipapalibut mo ang budyong nga matonog sa ikapulo nga adlaw sa bulan nga ikapito; sa adlaw sang katumbasan ipapalibut ninyo ang budyong sa bug-os ninyong duta. 10Kag pakabalaanon ninyo ang tuig nga ikakalim-an, kag magbantala sing kahilwayan sa bug-os nga duta sa tanan niyang pumuluyo; ini manginpaghinugyaw sa inyo, kag ang tagsa ka tawo sa inyo magpauli sa iya pagkabutang kag ang tagsa ka tawo sa inyo magpauli sa iya panimalay. 11Manginpaghinugyaw sa inyo ang tuig nga ikakalim-an; dili kamo magsab-ug, ukon mag-ani sang dagakan sini, ukon magpamopo sang mga uvas sang wala mapanapsi nga mga balagon. 12Kay ini paghinugyaw; manginbalaan ini sa inyo; kaonon ninyo ang patubas sang uma.
13“Sa sining tuig sang paghinugyaw ang tagsa ka tawo sa inyo magpauli sa iya pagkabutang. 14Kag kon magbaligya ka sing bisan ano sa imo isigkatawo ukon magbakal ka sa kamut sang imo isigkatawo, dili kamo magdinayaay. 15Sono sa kadamuon sang mga tuig sa tapus ang paghinugyaw, magtaba ka sa imo isigkatawo, kag sono sa kadamuon sang mga tuig sang mga pagpatubas magbaligya sia sa imo. 16Sono sa kadamuon sang mga tuig dugangan mo ang iya bili, kag sono sa kadiotayon sang mga tuig buhinan mo ang iya bili, kay tungud sa kadamuon sang mga pagpatubas nagabaligya sia sa imo. 17Dili kamo magdinayaay, kondi magkahadluk ka sa imo Dios; kay Ako amo ang Ginoo nga inyo Dios.
18“Busa himoa ninyo ang akon mga palatukuran, kag bantayan ang akon mga pagsolondan kag himoon sila; sa amo magapuyo kamo sa duta sing malig-on. 19Ang duta magapatubas sang iya bunga, kag magakaon kamo sa inyo kabulusgan, kag magapuyo sa iya sing malig-on. 20Kag kon magsiling kamo, ‘Ano bala ang kaonon namon sa ikapitong tuig, kon indi kami magsab-ug ukon magtipon sang amon patubas?’ 21Sogoon ko ang akon pagpakamaayo sa inyo sa ikan-um nga tuig, agud nga ini magapatubas sing bunga nga sa tatlo ka tuig. 22Kon magsab-ug kamo sa ikawalong tuig, magakaon kamo sang mga bungang laon; tubtub sa tuig nga ikasiam, kon mag-abut ang iya mga bunga, magkaon kamo sang laon. 23Ang duta dili pag-ibaligya sing dayon, kay ang duta akon; kay kamo mga dumuloong kag mga manlulugayaw upud sa akon. 24Kag sa tanan nga duta nga inyo ginapanag-iyahan, magtugut kamo sing gawad nga sa duta.
25“Kon mag-imol ang imo utud nga lalaki, kag magbaligya sang iban sang iya pagkabutang, niyan magkari ang iya himata nga madason sa iya kag maggawad sang nabaligya sang iya utud. 26Kon ang tawo wala sing manuggawad sini, kag niyan magmanggaranon sia kag makakita sing tuman sa paggawad sini, 27mag-isip sia sang mga tuig sang pagbaligya sini kag ulian niya ang mabilin sa tawo nga ginbaligyaan niya sini; kag magabalik sia sa iya pagkabutang. 28Apang kon indi sia makasarang sa iya kaugalingon sa paggawad, niyan ang iya nabaligya magapabilin sa kamut sang nagbakal sini tubtub sa tuig sang paghinugyaw; sa paghinugyaw buhian ini, kag sia magabalik sa iya pagkabutang.
29“Kon ang isa ka tawo magbaligya sing balay nga puluy-an sa banwa nga nalibutan sing kuta, magawad niya ini sa sulud sang bug-os nga tuig sa tapus nga nabaligya ini; sa bug-os nga tuig may kinamatarung sia sa paggawad. 30Kon indi magawad ini sa sulud sang bug-os nga tuig, niyan ang balay nga yara sa banwa nga nalibutan sing kuta lig-onon sing dayon sa nagbakal sini, sa iya bug-os nga mga kaliwatan; ini indi mabuhian sa paghinugyaw. 31Apang ang mga balay sa mga minoro nga walay kuta palibut kabigon nga upud sang mga latagon sang kaumhan; magawad sila, kag buhian sila sa paghinugyaw. 32Walay sapayan ang mga banwa sang mga Levinhon, ang mga balay sang mga banwa nga ila kaugalingon, magawad sang mga Levinhon sa bisan ano nga tion. 33Kag kon ang isa sang mga Levinhon maggawad, niyan ang balay nga nabaligya kag ang banwa nga iya kaugalingon buhian sa paghinugyaw; kay ang mga balay sang mga banwa sang mga Levinhon kaugalingon nila sa tunga sang katawohan sang Israel. 34Apang ang mga latagon nga palahalban sa ila mga banwa dili mabaligya; kay kaugalingon nila ini sing dayon.
35“Kag kon ang imo utud mag-imol, kag kabson sang iya katungdanan sa imo, sapopoha sia; subong sang dumuloong kag manlulugayaw magapuyo sia upud sa imo.#Deut. 15:7-8. 36Dili ka magkuha sing saka sa iya ukon dugang, kondi kahadluki ang imo Dios; agud nga ang imo utud magkabuhi upud sa imo. 37Dili mo pagpasakaan sa iya ang imo cuarta,#Ex. 22:25; Deut. 23:19-20. ukon pagpasakaan sa iya ang imo kalan-on. 38Ako amo ang Ginoo nga inyo Dios, nga nagpagowa sa inyo sa duta sang Egipto sa paghatag sa inyo sang duta sang Canaan, kag mangin-inyo Dios.
Ang Pagkabig sang mga Sologoon
39“Kag kon ang imo utud upud sa imo mag-imol, kag magbaligya sang iya kaugalingon sa imo, dili mo sia pagpaalagdon subong nga ulipon: 40magpuyo sia upud sa imo subong nga sinoholan kag subong nga manlulugayaw. Mag-alagad sia sa imo tubtub sa tuig sang paghinugyaw; 41niyan maggowa sia gikan sa imo, sia kag ang iya mga anak upud sa iya, kag magbalik sa iya kaugalingon nga panimalay, kag magbalik sia sa kaugalingon sang iya mga ginikanan. 42Kay mga alagad ko sila, nga ginpagowa ko gikan sa duta sang Egipto; dili sila pag-ibaligya subong nga mga ulipon. 43Dili ka maggahum sa iya nga may kapintas, kondi magkahadluk sa imo Dios. 44Nahanungud sa imo mga ulipon nga lalaki kag babayi nga maangkon mo; gikan sa mga pungsud sa palibut mo makabakal kamo sing mga ulipon nga lalaki kag babayi. 45Labut pa makabakal kamo gikan sa mga anak sang dumuloong nga nagapanlugayaw sa tunga ninyo kag sa ila mga panimalay nga upud sa inyo, nga gin-anak nila sa inyo duta; kag sila mangin-inyo kaugalingon. 46Ipapanubli ninyo sila sa inyo mga anak sa olihi ninyo, sa paghuput nga kaugalingon; gikan sa ila magakuha kamo sang inyo mga ulipon sing dayon, apang sa inyo mga utud nga katawohan sang Israel dili kamo maggahum, ang isa sa isa, nga may kapintas.#Ex. 21:2-6; Deut. 15:12-18.
47“Kon ang isa ka dumuloong, ukon manlulugayaw upud sa imo magmanggaranon, kag ang imo utud upud sa iya mag-imol kag magbaligya sang iya kaugalingon sa dumuloong ukon sa manlulugayaw upud sa imo, ukon sa kaliwat sang panimalay sang dumuloong, 48niyan sa tapus nga nabaligya sia magawad sia; isa sang iya mga utud makagawad sa iya; 49ukon ang iya tiyo, ukon ang anak sang iya tiyo sarang makagawad sa iya, ukon bisan sin-o sang iya malapit nga himata sa iya panimalay makagawad sa iya; ukon kon magmanggaranon sia makagawad sia sa iya kaugalingon. 50Mag-isip sia upud sa nagbakal sa iya kutub sang tuig nga nagbaligya sia sang iya kaugalingon sa iya tubtub sa tuig sang paghinugyaw, kag ang bili sang iya pagbaligya manginsono sa kadamuon sang mga tuig; sono sa tion sang sinoholan mag-upud sia sa iya. 51Kon may madamu pa nga mga tuig, sono sa ila iuli niya ang bili sang iya gawad gikan sa cuarta nga ginbakal sa iya. 52Kon may mabilin nga pila lamang ka tuig tubtub sa tuig sang paghinugyaw, niyan mag-isip sia upud sa iya; iuli niya ang bili sang iya gawad sono sa iya mga tuig. 53Subong sang alagad nga sinoholan sa tuigtuig mag-upud sia sa iya; dili sia maggahum sa iya nga may kapintas sa imo itololok. 54Kag kon indi sia magawad sa sini nga mga paagi, niyan buhian sia sa tuig sang paghinugyaw, sia kag ang iya mga anak upud sa iya. 55Kay sa akon ang katawohan sang Israel mga alagad, sila mga alagad ko nga ginpagowa ko gikan sa duta sang Egipto: Ako amo ang Ginoo nga inyo Dios.
Currently Selected:
LEVITICO 25: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
