LEVITICO 27
27
Ang mga Kasogoan nahanungud sa mga Paghalad
1Ang Ginoo nagpamolong kay Moises, 2“Ipamolong sa katawohan sang Israel, Kon ang isa ka tawo maghimo sing saad, ang mga tawo kabigon sa Ginoo sono sa imo pagpabili, 3niyan ang imo pagpabili sang lalaki kutub sa duha ka pulo tubtub sa kan-uman ka tuig manginkalim-an ka siclo nga pilak, sono sa siclo sang santuario. 4Kon babayi, ang imo pagpabili manginkatloan ka siclo. 5Kon sia kutub sa lima ka tuig tubtub sa duha ka pulo ka tuig, ang imo pagpabili sa lalaki duha ka pulo ka siclo, kag sa babayi napulo ka siclo. 6Kon sia kutub sa isa ka bulan tubtub sa lima ka tuig, ang imo pagpabili sa lalaki lima ka siclo nga pilak, kag sa babayi ang imo pagpabili tatlo ka siclo nga pilak. 7Kag kon sia kutub sa kan-uman ka tuig kag pa ibabaw, niyan ang imo pagpabili napulo kag lima ka siclo kon lalaki, kag napulo ka siclo sa babayi. 8Kag kon imol pa sia sa imo pagpabili, niyan ipahamtang sia sa atubangan sang sacerdote, kag ang sacerdote magapabili sa iya; ang sacerdote magapabili sa iya sono sa masarangan sang nagsaad.
9“Kon ini sapat nga ginadolot sang mga tawo nga halad sa Ginoo, ang tanan nga ginahatag sang bisan sin-o nga tawo sa Ginoo manginbalaan. 10Dili niya pag-ilisan ukon pagbaylohan ini, ang maayo sa malain, ukon ang malain sa maayo; kag kon baylohan gid man niya ang sapat sing sapat, niyan ini kag ina nga ginabaylo manginbalaan. 11Kag kon ini bisan ano nga sapat nga dimatinlo nga wala nila ginadolot nga halad sa Ginoo, niyan ipahamtang niya ang sapat sa atubangan sang sacerdote, 12kag ang sacerdote, magpabili sini bisan maayo ukon malain; sono sa pagpabili mo, nga sacerdote, manginsubong sini. 13Apang kon sa pagkamatuud gawaron niya ini, niyan idugang niya ang ikalima nga bahin sini sa imo pagpabili.
14“Kon ang isa ka tawo maghalad sang iya balay nga manginbalaan sa Ginoo, ang sacerdote magpabili sini kon ini maayo ukon malain; sono sa pagpabili sang sacerdote, manginsubong sini. 15Kag kon ang naghalad buut maggawad sang iya balay, idugang niya ang ikalima nga bahin sang cuarta sang imo pagpabili sini, kag ini mangin-iya.
16“Kon ang isa ka tawo maghalad sang bahin sang uma nga iya kaugalingon sa Ginoo, niyan ang imo pagpabili manginsono sa masab-ug sa iya; ang masab-ugan sing isa ka omer nga sebada pabilihan sing kalim-an ka siclo nga pilak. 17Kon maghalad sia sang iya uma kutub sa tuig sang paghinugyaw, manginsono ini sa imo pagpabili; 18apang kon maghalad sia sang iya uma sa tapus ang tuig sang paghinugyaw, niyan ang sacerdote mag-isip sa iya sang cuarta sono sang mga tuig nga mabilin tubtub sa tuig sang paghinugyaw, kag buhinon gikan sa imo pagpabili. 19Kag kon ang naghalad sang uma buut gid maggawad sini, niyan idugang niya sa sini ang ikalima nga bahin sang cuarta sang imo pagpabili, kag lig-onon ini sa iya. 20Apang kon indi sia maggawad sang uma, ukon nabaligya niya ang uma sa isa ka tawo, indi na paggawaron ini; 21apang ang uma, kon buhian sa paghinugyaw, manginbalaan sa Ginoo, subong nga uma nga napahanungud; ang pagtag-iya sina mangin-iya sang sacerdote. 22Kon ihalad niya sa Ginoo ang uma nga iya nabakal, nga indi uma gikan sa iya kaugalingon, 23niyan ang sacerdote mag-isip sa iya sang bili sang imo pagpabili tubtub sa tuig sang paghinugyaw, kag ihatag niya ang imo pagpabili sa sina nga adlaw subong nga balaan nga butang sa Ginoo. 24Sa tuig sang paghinugyaw ang uma magabalik sa ginbaklan sini, bisan sa iya nga naigoan sang pagtag-iya sang duta. 25Ang tanan mo nga pagpabili manginsono sa siclo sang santuario: ang isa ka siclo duha ka pulo ka gera.
26“Apang ang panganay sang mga sapat, nga ginhimo nga panganay sa Ginoo, walay tawo nga maghalad sini; bisan ini baka nga lalaki ukon carnero, ini iya sang Ginoo. 27Kag kon ini gikan sa dimatinlo nga sapat, niyan gawaron niya ini sono sa imo pagpabili, kag idugang sa sini ang ikalima nga bahin niya; ukon, kon indi ini magawad, niyan ibaligya ini sono sa imo pagpabili.
28“Apang walay butang nga napahanungud nga ipahanungud sang tawo sa Ginoo, gikan sa tanan nga iya, bisan sa tawo ukon sapat, ukon sa uma nga iya kaugalingon, nga ibaligya ukon ipagawad; ang tagsa ka butang nga napahanungud#Num. 18:14. labi gid kabalaan sa Ginoo. 29Walay bisan sin-o nga napahanungud, nga ipahanungud gikan sa tunga sang mga tawo, nga matubus; sa pagkamatuud patyon sia.
Ang mga Kasogoan nahanungud sa mga Ikapulo
30“Ang tanan nga ikapulo sang duta, bisan sang binhi sang duta ukon sang bunga sang mga kahoy, iya sang Ginoo; ini balaan sa Ginoo. 31Kon ang isa ka tawo maggawad sing bisan ano sang iya ikapulo, idugang niya sini ang ikalima nga bahin sini. 32Kag ang tanan nga ikapulo sang kabakahan ukon panong, ang bisan ano nga nagasohot sa idalum sang sungkud, ang ikapulo manginbalaan sa Ginoo. 33Dili sia magpili bisan ini maayo ukon malain, kag dili sia magbaylo sini; kag kon baylohan gid man niya ini, niyan ini kag ina nga binaylohan manginbalaan; dili ini magawad.”#Num. 18:21; Deut. 14:22-29.
34Ini amo ang mga sogo nga ginsogo sang Ginoo kay Moises nga sa katawohan sang Israel sa Bukid nga Sinai.
Currently Selected:
LEVITICO 27: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
